ZOMI LEH LITERATURE LAI GELZIA BY: Rev. Gin Lam Thang

ZOMITE LEH LITERATURE || Rev. Gin Lam Thang

Literature i cih bang a hia ? :

Literature pen mikang pau hi a, ei pau mah banga i zat kammal hi a, a huampi in bang genna hiam cih zong i thei hi. Literature i cih ciang, 'Lai gelh leh lai sim banah, thu leh la leh a kizoppih teng genna' hi mai. Literature tawh kisai gen nuam ihih manin a tangzai zaw in sut sawm dih ni.

 

Dictionary lama hilhcian dan:
Literature cih kammal in a huam tangzai mahmah hi. Dictionary ah hih bangin gen hi.

Compact Oxford Dictionary :

1. Lai gelh leh sim tawh kisai manphatna leh siamna tuam neia thu kigelh te,
2. Thu gelh khatpeuh ngimna tuam (subject) neia gelh laibu leh thu kigelh dangte,
3. Thu zaksakna (information) dinga thu kisuaksak (leaflet),

American Heritage Dictionary:
1. Gelsiamna leh ngaihsun thei dinga siamna hong pia thu kigelh,
2. Mi siamte leh telsutna (research) hihte in tup leh ngim tuam neia a gelh thute,
3. Siktawlai tawh kikhen laibu khempeuh,

John Darvan Pictorial Encyclopedia ah :
1. A tangzaipi a genna ah thu kigelh, mihing ahi a ganhing ahi zongin hun khat sunga telsutna thu genna,
2. A tom a genna ah theihna a tangzaina ding tawh kisai thu kigelh khatpeuh,

Nam tuamtuam in Literature kizang:

1. Gelh ding leh sim dinga hoih thu kigelhte:

I lai, A, B, C (Alphabet) leh laigelh dan leh laisim dan te literature hi a, tua banah laigelh leh laisim i siamna dinga vanzatte khempeuh zong literature ahi hi. I pau dan, i pau i gelh dan (thu leh la gelh dan) leh a mainawt theihna dinga malakna khempeuhte zong literature in huam khin hi.

2. Minam tangthu a i ngeinate leh a kihilh sawn zel thu leh late :

Mi pawlkhatte in laia kigelhte leh muh theihte bek literature hi dingin ngaihsun uh hi. Ahi zong minam khat in lai a neih ma huna kam (oral) tawh a kihilh sawn zel late, tangthute, pupa ngeinate leh thu leh late literature ahi hi. Zomi Literature tawh kisai gelh ding hi leng, mi tampi in hihte gelh kha lo ding hi. Mi namdangte in zong hih bangte Oral Literature/ Folk Literature ci uh hih tuak. Tua thu leh late leh mai a nawt toh dan leh telsutna dinga lai kigelhte zong literature kici hi.

3. Thu leh la khut gelh leh siktawlai a khet :

Mikang Dictionary khatin literature a lehkhiat dan, ‘printed materials of any kind’ ci hi. Hih in laibu, thukizakna bu, lai kikhep thugelh (broacher), magazine leh pamphlets, gam lim leh lim gelh dongin huam khin hi. Thu leh la gelhsa a kikoih ahih banah muh theiha kikoih ahihna tak pen literature hi. Tua ahih manin siktawlai tawh kikhen bek hi loin khut tawh kigelh (manuscript), mualsuang, signboard leh adangte zanga thu kigelhte zong huam khin hi.

4. Khawtheihna, mainawtna dinga manphatna nei thu leh la :

American Heritage Dictionary in literature pen, ‘Gelsiamna leh ngaihsun thei dinga siamna hong pia thu kigelh, mi siamte leh telsutna (research) hihte in tup leh ngim tuam neia a gelh thute, ci hi. Hih in subject tuam neia kigelh, siamna tuam neia thugelh thesis leh dissertation banah literature tawh kisaia manphatna nei thugelh khempeuh huam hi.

Awlmawh ding pawlkhat:

1. Pau dik zat leh pau ah mainawt semsemkisam.
2. Lai gelh dan dik leh sim dan dik kisam pha peuhmah.
3. Laibu tampi simin laisim mi hih ding kisam.
4. Thu leh la i neihsate lai tawh gelh a kepbit kisam.
5. Thu leh la lama mi siamte gelh laibu tam sem neih ding.
6. Laibu, thukizakna, magazine leh thu hawmkhiatna a tam leh a hoih neih kisam.
7. Thu leh la lamah kipattah kisam.

Literature lamah kiniam lua:

1. Pau tawh kisai i dinmun:

India gam hi ta leh, Kawlgam hi ta leh, Zomiten pau tawh kisai in mainawtna ding kisap tampi i nei hi. A hangin i pau kitam zat lo lua a, pau kisiam nawn lo hi. A diakin khawpi sunga omte in i pau zang loin, innkuan sung nangawn ah a zang nawn lo tampi om ta hi hang. Khangthakte bek hi loin nu leh pa khangham zawte in zong i pau a zang lo kitam ta hi. Ei pau nangawn kisiam nawn lo hi.

Pau dik leh dik lo koi pan the ding ? Kawlgam lama te zat ahih manin dik pen hi kici thei tuan lo ding hi. Tu hun ciang pau dik leh dik lo tehna dingin mi tampente in a zat leh dik hi-a a ngaihsut pen pau dik hi kici hi. Tua ahih leh kawlgam lama omte pau a dik pen hi ci-in i sang thei ding hiam?

Tua lai takin Kawlgam lama omte in a zat loh, India gama omte bekin a zat, ahih hang eimi khempeuh in i theih siam kammal pawl khat zong om a, tuate zong pau dik mah hi ci a san ding hi.

Pau pen a nungta (alive) kici a, nungta ahih manin khang thei a, kum 50 halah kilamdang ci uh hi. Tu ma hun peka English pen English mah hi lai a, ahi zongin tu hun khangte in thei nawn lo, zang nawn lo uh hi. A hun tawh kizuiin pau pen lamdang thei ahih manin a lamdanna manban a, a hun zuia pau dik zang thei dinga i kisakkholh kisam hi. I pau kizang lo lua ahih manin pau dik zat ding haksa kisa ciat hi.

2. Zolai sim tawh kisai I dinmun:

Zomite in Zolai sim kisiam het lo hi. Mi tam zawte Zolai sim dan a sin ngei lote hi uh a, English Alphabet a kizat man leh spelling i siam loh manin, Zolai sim nuam a sa lo kitam hi. Zolai sim siam loh manin sim dingin zong a ngaihsun lo kitam hi. Zolai I sim siam loh manin ei pau tawh kigelh laibute sang kim leh pamte lai tawh kigelh laibute sim nuam i sa zaw hi.

Zolai i sim ngei loh manin Zo ngeina, zia leh tong kithei lo pah a, minam ngeina tawh kituak thu hoih la hoih kigelhte kithei lo hi. A diakin lai i simte in hong zo (influence) peuhmah ahih manin, mi namdangte lai i sim mun leh i theih loh kalin amau ngeina tampi kila thei hi. Gentehna in Kawl lai bekbek i sim leh i theih loh kalin Kawlte ngeina tampi kila a, Kawl minam kisuak thei hi. A peuhmah thu in, Zolai i sim siam loh manin, ei pau tawh kigelh laibute sim hong thadahsak a, tangpi tangta in laisim kitha nuam zo lo hi.

3. Zolai gelh lama i dinmun:

Kawl gam sung ki-ukna hoih loh manin lai lam tawh kisai a gelh nuamte in zong suahtakna neilo a, tua in mi tampite lai gelh lama khantohna dingah tha nemsak hi. Nisim sangah Zolai kisin lo ahih manin zong lai gelh dan kisiam lo a, tua in hong thanem sak lai hi. Tua banah lai siamte lakah zong zolai gelh a siam lo kitam ahih manin zolai gelh sangin namdangte lai tawh gelh baih kisa zaw banah, laibu bawlte in a zuakna ding ngaihsut- na tawh Zolai gelh ding haksa sa uh hi. Tua ahih manin Zolai tawh kigelh laibu limci kinei zo lo hi.

Zolai gelh dan zong kisiam nailo hi. Lai pau (written language) leh kampau (spoken language) lim ngaihsut lua hanga, ei leh ei haksatna kibawl tawm hi hang. Lai i gelh ciang a sim nuam dingin, i paukhiat bangin gelh leng i lungsim ah kiciamteh thei deuh hi. Gentehna in i pau ciang, 'Khelhna, Vangletna, Zekai' Kici napi, i gelh ciang a lawh nuam lo dingin, ‘Khialhna, Vangliatna, Ziakai’ci citciat sese.

Lai i cih pen i kammal ciamtehna(ciaptehna hi loin), symbol khat hi lel a, i paukhiat banga i gelh siam kisam hi. Mizo literature leh Paite literature ah i pau khiat bangin gelh uh a, theih nuam ahih manin, lai lamah khan cih takin khang uh a, literature tawh kisai in amaute pen Zolai ‘u’ suak hi bek loin Zolai ‘pu’ suak ta uh hi.

4. Laibu leh thugelh lama I dinmun:

Zolai tawh kigelh laibu hoih i neih hangin tam zo nai lo hi. Hih pen nuntak haksat man, gam ki-ukna hoih loh man leh Zolai gelh i siam loh man hi thei ding hi. Tua banah Zomite in laisim kithadah lua ahih manin laibu bawl nuamte in zong bawl haksa sa uh hi.

Lam khat panin laibu a bawlte in Pasian thu tawh kisai laibu bawl zaw deuh hamtang a, tua in mipite kisapna donghu zo lo ahih manin, lai sim thadah lawh uh hi ding hi. Literature mainawtna ding tawh kisai laibu kinei nailo a, biakna tawh kisai laibu lo buang laibu gentham om lo cih theih phial hi.

Zolai khantohna ding leh laibu tam zaw i neih theihna dingin a khang hun tawh kituak laibu i bawl siam kisam hi. Khangnote adingin Christian Love Story tuamtuam, Adventure lam tawh kisai laibu leh, Novel khawng sim ding om hen la, naupangte adingin naupang tangthu bu leh comics bu khawng om thei hi leh, tua in kin takin Zolai khangsak thei ding hi.

Courtesy : Laitai Vol. 6. Issue 8. August 2014