Hong tung ding census
ciangin Zomi a kicih huaizia tawm kikum ni!
Amasapen in, Zomi pen
taangtawn a kipan ei leh ei ikilawhna minam min ahi hi. Zogam hong sik masa leh
Zomi te thu akan masa Mikang te Sir Henry Yule (1508), Father Vincentius
Sangermano (1783), Col. T.H. Lewin (1871-72), Dr. Francis Buchanan (1835),
Bertram S.Carey, H.N.Tuck te in i minam min Zomi ihihna tuma kum za tampi
lai-in na genkhin uh hi. Kawl mipil U Thein Pe Myint leh Daw Aung San Suu
Kyi te in zong Zomi ihihna hong ciaptehsak uh hi. Ei Zomite lakah isuan
imuan Dr. Vum Khaw Hau, Sangmang S.T.Hau Go, Dr. Vum Son te in zong Zomi ihihna
kipsak uh hi. Tu mahmahin Zogam khuata khat ah pai-in laithei lo piteek khat
kiangah bang minam na hiam ci lehang Chin hong ci hetlo in Zomi hing mah hong
ci ding hi. Zomi pen ihihna taktak hi. Tua ahih manin Zomi kici ni icih teh
meet nang, sup nang ngaihsutna hilo hi. I hihna akipsak ihi hi.
Zomi in kua teng huam
hiam cih tawh kisai in atunga mipil te in Kawlgam, India leh Bangladesh gamgi
dunga mualtungmite ahuam in gen uh hi. Tua pen maan hi. I pau tawmtawm a
kilamdan hangin ingeina, itatzia kibang mahmah hi. Hun khat lai in zong
biakna lam bangah ivekin Zomi min nuai a ki-omkhawm ahi hi. Ahi zongin, tuhun
teh Zomi pawlkhat Zomi ut lo tadih phot uh ahih manin Zomi a ut teng kipumkhat
a kalsuan khiat ding hong suak hi. Nikhat niteh ivek mahin Zomi nuaia h
kigawmkik ding cih ilam-etna leh ithungetna ahi hi.
Anihna ah, tulai taka
hong kilawhna Chin pen midangte hong piak hi-a, hong kipiak lai inzong
pahtawina tawh hilo in simmawhna (degratory) tawh hong kipia min hizaw ding
hi. Banghang hiam cihleh tuni dongmah in Chin hong kicih teh neu-etna,
simmawhna gim baang lai hi. Hih pen minamdangte tawh a kisawhkha ngei khempeuh
in theipah lel ding hi. “Chin ding hoih si e, Chin ding hau vial si e,” hong
kicih teh hong kiphat hilo in hong kineumuh mahmah cihna hizaw hi. Chin min
ipuak manin kumpinasemte bang pil in siam mahmah taleng itun dingzah kitung
ngeilo hi. Chin min puakna ah meetna peuhmah om ngeilo a supna vive hizaw
hi. Chin pen imin taktak ahih loh banah adeihhuai hetlo min ahi hi.
Ataktak in cileeng Khamtung mi lakah Chin minam om lo hi. Apu apa pan ua
Chin a kici om lo hi. Tuhun a Chin deihte in zong thei gige ding hi. Nidangin
amau zong Chin ut lo uh hi. Ahi zongin thu sau et loin meet nading
tuamtuam leh midangte dem nopna tawh Chin a deih a kineih pak uh hi-a mailam ah
a kisik ni uh om pelmawh ding hi.
Athumna ah, Zomi
min bek tawh minam picing suak zo ding hihang. Zomi nuai a ake ahi -Zo,
Sihzang, Teizang, Khuano, Saizang, Tedim,etc. te abei ding hi zenzen lo
hi. Tua teng kigawmna Zomi hizaw hi. Teizang, Sihzang, Zo, Khuano,
Saizang, Tedim ci-a atuamtek a ikigen khak leh tua minte tawh lah hong
kiciamteh tuanlo in Chin khutnuai mah a kitung ding ahi hi. Zomi ideih
pen Zo, Sihzang, Teizang, Khuano, Saizang, Tedim te laih nang hi loin Chin laih
nang hizaw hi. Tua ahih manin Zomi ah ikigawmkhop ding lunggulh huai
mahmah hi.
Alina ah, Code nambat
tawh kisai in 914 (Others) cih zat ding patauh huai het lo hi. Vuanzi U
Khin Ye in a thugenna tuamtuam leh VOA tawh a kihonate ah siangtakin gen a, ei
Zomi bang gentehna in zang zawzen hi. Minam 135 pen a bei zong om ding, a
kibehlap zong om thei ding, a kigelhzia (spelling) maan lo zong om thei ding,
tua teng mah theih nop mana census kibawl hi. Tu-a kipulaak lote a om lo a
kituat ding, hihna bangbang kipulaak nading hun hi, ci-in teltakin gen hi. Tua
banah hih Code 914 zang ding pen ei Zomi te kia hilo hi. Minam lian mahmah Po
Karen in zong code nambat nei lo mawk ahih manin azat kul ding hi. Kayan(Kaya),
Khami (Khumi) cih bangin minam tam simsim in azang ding ahi hi. Code 914
izat manin Kawlgam mi ihihna peuhmah kitaan lo lua ding hi.
Tua ahih manin, tuhun
teekteek a Kumpi in census hong bawl pen ei Zomi ta dinga Pasian hong geelsak
hi cih theih ahi hi. Topa Zeisu suah dingin Zawma kumpi te in
census nabawl uh ahih manin Topa Zeisu Betlen khua ah suak kha hi. Tua hi
keileh anu apa khua Nazareth a suak ding hi. Nazareth ah suak leh Laisiangtho
tawh kipelh in Davuih tokhom zong luah thei lo ding hi. Tua mah bangin
Zomi te minampi khat isuah theih nadingin Pasian in ikumpi te zanga census hong
bawl hi ding hi ci-in kei mimal in ka um hi. Tua ahih manin, u leh nau Zomi te,
tutung in Pasian hong piak hun manpha khahsuah kha hetlo in ivekin Zomi kici
liai dih ni ci-in khat vei kong zawnpha nuam hi. Zomite Pasian in hong
makaih in thupha hong pia tahen.
Rev. Dr. Do Suan Mung
General Secretray of
GZA
