NUIHCIAM KAM LEH PILKAMTE By: REV. GO KHEN THANG

Rev. Go Khen Thang Ciamnuihte

Rev. Job Nang Khaw Thawng in a bawlkhiat laibu apat lakkhiat ahi. A laibu min "Hong nusia khinsa Rev. Go Khen Thang' ciamnuih kam, pil kammal leh article tuamtuam." A thu ki gelhte hoih a hihman in tulai vai tak in tangpi tangta theih ding in hong kisuah khia hi.

Sia Thawngno in a gen na ah, Ciamnui cih pen ciap khat I neih khit ciang a nuih pen ciamnui hi. Gentehna in "zingsangin Bawng I khah ciangin bawngpiten zuntha a, a talten a zun ciapsakin nui se hi." Tua zong ciamnui himawk hi. Gen khat omlo, ciap khat omlo in kinui theilo hi. A minthang Rev Go Khen ABC ciamnuihna pen zong gen khat nei banah kammal kizom laimal kibang ahihman in kinui diak hi, ci hi. Ngaihsun taktak leng pilna kam, laisiamna kam hi in pilvai, teivai lua mahmah hi. Zomi mipil  Rev. Khup Za Go bangin pilvai, laisiamvai sa lua ahih manin, "Lai in hong khak un, cassettee khui in hong khak un" ci in ngen ngei hi.
Ama ciamnuih, pil kammal 100 in pan ni.

1. Sia Go Khen in biakinn sunga lususu ihmumu pawlkhat a muh ciangin “Biakinn sunga ihmute phong se kei un, ka Pa inn hi, ci-in ki-innteeksak lua a, ihmut kawm a biakinn cinghte hi,” ci se hi.
2. Mi khat in Sia Go Khen kiang ah “Sia aw, no Pastor pawlkhat kamtuam lah pau theilo, dawi lah hawlkhia theilo na hih uh teh Kha Siangtho neilo hi mawk lo ding na uh hiam?” ci hi. Sia Go Khen in “Ko ka muhtheih uh Vok leh Aakte bek hawlkhia thei mah ung, dawl leh kau bel mu theilo, a kampau uh zong theilo ka hih manun hawlkhia thei kei mah ung, no kimu thei kihawlkhia thei a, a phazah na ngawn kithei zen na hih uh leh anam kibang (dawi nam) mah himawk lo ding na hi uh hiam?” cih san ziau hi.
3. Mikhat in Sia Go Khen kiangah “Vantung gam ah khamlukhu a om diam?” Sia Go Khen in “Lukhu i cih bel guahzuk ciang leh nisat cianga kizang hi ven, Vantung gam innsung ding ahih banah guahzu lo nisa lo ding ahih teh lukhu zong kisam khol ding ai maw, innsunga lukhu zong om khollo hi. Tua banah cipeek innsungah naanglukhu khu nuam tuan lo a, singinn sungah zong singlukhu kideih tuan lo hi. Leiseek(brick) innsungah leiseek lukhu kikhu nuam tuan lo ding ahih teh Kham innsuangah zong khamlukhu kuamah in khu nuam(thupi ngaihsut) in um tuan kei veng aw, cihsan ziau hi.”
4. Mi khat in Sia Go Khen kiangah  “Nang Gupna bucing lungdam na bucing ahi Full Salvation, Full Gospel na sang nai hiam?” a cih leh sia Go Khen in “Thei khang ei! Tulai-in full cih bel nam nih om ven, full sang in fool tam kingah zaw sa mai veng aw,” cih san ziau hi. (Full cih pen ‘dim’, kicing cihna hi-in  fool pen hai, mihai cihna)
5. Sia Go Khen in a taltang tung ah meima tum vei-in na asak mahmah laitak thusuaknei pupi khat va hawh in “Sawm-ah-khat kimtak na piak loh man vua meimatum vei hi uh teh! ” va ci hi. Sia Go Khen hehpian ahih manin “Ka sumpi piaksa uh hong tuatpha pha nung in manlo kicing lo ahih leh zong biakinn ah na piak kik mai nu’ng, Pasian in ko inn ah a sik dingin hong sawl ahih teekteek khol kei leh zong va ciah kik mai in” cihsan hi.
6. Kikhopna khatah Sia Go Khen kiangah mikhat tu in “Pasian minthang ta hen!” ci thapai hi. Sia Go Khen in, “Lawm aw, Pasian’ min pen a thang denden hi. Pasian’ minsia ngeilo hi. A minsia zelzel bei ei mihingte hizaw hang. Tua manlin nang Pasian’ min siasak loin a siatna dingin gamta kei peuh leteh Pasian’ min a thang den ding hilel hi,” ci ziau hi.

7. Tuhun Pawlpi sung thukikupnate ah Upa makaite kitawng kilaii thei phial cih a muh ciangin Sia Go Khen in tuhun Pastor dingte hi bang hileh hoih ding hi, ci hi.
(a)Lai Siangtho sang panin sinna cing tawh ongte hi ding.
(b)A piangthak kei phial zongin a thatang hoih in a cidam mahmah hi ding.
(c)Karate, Judo, Kungfu khat teitei siamna nei-in, Upate akitok teh nih leh thum a khenzo lianliante bek hi leh hoih ding hi, ci hi.
8. Mi khatin, Sia Go Khen kiangah, “Haleluijah! Heleluijah!” a cihcih leh Sia Go Khen in, “Lawm nang a luisung bek tung pan maw? Kei a gal khat lam na tung ta ing ei.” ci ziau se hi.
9. Mi khat in khamangthang vei veng aw, a cihcih leh Sia Go Khen in “Vei ing ci se ken, vei taktak le cin, meimatum vei, gilsan vei nasa mahmah in na omkhongh theihloh bangin om khong theilo ding zah hi teh. Kua mah a vei zong om khang, vei taktak leng khua lam ah anne kimlai Vokpi tai mu leng kiko khia in delh huan hihang. Vokpi tai lunghimawh zah leh akigil kah lo lunghimawh zahin kha mangthang kuamah in lunghimawh zo tuan lo hihang”, cih belh lai hi.
10. Tu hun thungen pawlkhatte napitakin awngin, lei tuanin, sabuai tum geugeu om khawng Sia Go Khen in a muh ciangin “tu hun i thungetzia bel leibasik, a kitawng mah bang keei hangin, Pasian na ngawn sawl ziauziau ngam ta hang. 1988 kum akipan i biakdan leh i thunget, hunzat suak khin keei ta ei”, ci hiat-hiat se hi.
11. Sia Go Khen in Jesuh hong pai kik nawnlo ding ci-in a kiminsiatsak laitak Lai Siangtho sangkah lo khat in hunzangin, “Tuhun Laisiangtho sangkahte lau huai mahmah hi, kidawm mahmah un” ci hi. Sia Go Khen in hun awng ngenin ding to a, nam nih bek hong gen ning ci-in.
(a) “Lai Siangtho sangkahte lau huai ahih leh a kahlote lau huai zaw kan ding hi.”
(b) “Beel a hawmte a gin ngaih zaw hi,” ci in thuk kik ziau hi.
12. Mi khatin Sia Go Khen kiangah, “Vantung gam a cingin hong gen in” ci hi.  Sia Go Khen in “Kei zong zanni a Vantung pan a hong ciah hi sam lo inga, Van gam tung sa i dot theih ding lah kua mah omlo a, ih gengen hangin i upmawh i lamet ciat mah a gengen i hih manin, Vantung gam pen a mu omlo, a tungsate lah kidong kik theilo, i upmawh ciat gam hi-in upmawhte lakah upmawh huai pen cih ding hi.” ci ziau hi.
13. Pawlpi sung thukikupna ah a atamzaw thukima kithupisak lua mahmah cih a muh teh Sia Go Khen in “Mangkang gam khawngah bel a tamzaw mipil ahih manin atamzaw thukimna hoih mah ven, ei gamah a tamzaw tham mihai hi zaw mawk i hih teh, atawm zaw thukimna zong hoih zawk hun om hi veh aw”, ci hi.
14. Pawpi sungah thukikupnate ah a honhon a kisel kitawng thei ding cih amuh teh Sia Go Khen in “Hon tunget om ven, hon kitot om ngei buang kei veh aw,” ci hiat-hiat hi.
15. Nungak khat in Sia Go Khen kiangah, “Ko lawp mahmah a pulpit tung diang ziahziah lam ziahziah a, nang lawp lo kisa na khut zong na bet nop loh” a cih leh Sia Go Khen in, “No banga ka lawp theihloh ka dian theihloh hang nong neu-et tuan kei un, ka puanteen kawm a, ka khutpi ka sai kekkek zong no banga a diangdiang a lamlam zah a lawp a kingaihsun hi’ng,” ci hi.
16. Mi khat in Sia Go Khen kiangah Tuiphum Pawlpi leh Pawldangte kilamdanna hong gen pak in, a cih leh Sia Go Khen in, Thuphumten la a sak teh labu en, pawldangte’n labu enlo khutbeng, Tuiphumte’n thu a ngetteh lukun in mitsi, pawldangte vandak to in hak gige, a khut uh lamto in a kia masa penpen kei a ngah ding ci bangin dawn to uh,” cihsan ziau hi.
17. Mi khat in Sia Go Khen na tal nakkolh zen si! a va cih leh  Sia Go Khen in, “A kolh hi kei, a siang hi zaw”, cihsan ziau lel in, heh hetlo lel hi.
18. Mi khat in Sia Go Khen na mel hoih kei si! a va cih khak leh Sia Go Khen in “Nong muhcilna ahih man a hoih hong sa lo hi teh, kei ka neutunga kipan a hi ci hingin kisek lel ing. Mel hoihloh meima tum nat a na hilopi, mel hoih leng ze-etna tam, hoih kei leng ze-etna tawm zaw”,  cihsan ziau hi.
19. Sia Go Khen leh mi khat kiho.
Mi khat -Sia Go Khen, na zi a mel hoih vial ei.
Sia Go Khen- Hoih buang mah lo dia, Kansauzang inn 7 sungpana i teelteel hisam hi ven, zanggam a teeng ding kisa leng a vakzaw deuh khat  kingaihsun mah ding hi ven.
Go Khen’ zi-Eh! Tua zong kong hehpihna tawh kong teenpih hi. Melhoihte’n na khasum teng uh tanakha in bei khin in teh.
20. Mi khat in Sia Go Khen na zi a melhoih napi a tun tom zek, a cih leh Sia Go Khen in, “Phamawh kei! Nupa i cih pen i tunsanna kitehteh ding hi khol kei, a kiteh lo lam tawh kiteeng ding hizaw hang, kituak lel inteh!” cihsan ziau hi.
21. Sia Go Khen tano sih nitakin amahmah in inntek thupulakna nei a, “No innkuan sungah khat teitei sih loh phamawh hong kici leh kei leh kei kiphal nai keng, ka zi in zong hong phal nai ken teh, ka zi lah amah leh amah lah kiphal ken teh, kei zong zi kik deih veve ding ka hih teh phal nai keng. Tua manin tu a sipa mah kilawm kituak sa penpen ung,” ci in gen a, mipi nui ziahziah hi.  Thuaksiamna nei hi.
22. Khatvei Sia Go Khen in Sia dang khat ann nekpih in ann kuang uumkhawm uh a, a lawmnu in ann tehkan tuamtuam lui hi. Sia Go Khen in, “Mandalay khawng ate’ bawlte bel lim mahmah ven, i zite’ bawl taktak bel limtakin tui buak leng hing thei lai mai ding hi veh aw,” ci-in nui uh hi.
23. Nupi khat in Sia Go Khente’ inn ah anntang ngen a, hai 5 pia uh hi. A ngennu in a picing kei ven teh cimawk hi. Sia Go Khen in, “na lei sa nai maw? Picing lo ding na cihcih, hong kilet song hi. Ih leite bek pi(measurement) kiteh hi, Pi cinglo deihlo na cih leh picing dingte kiangah va ngen in”, cihsan hi.
24. Vanman kiam thei loin khang hi den keei cih a muh teh Sia Go Khen in,”van man pawh, teek hak ngel in teh, a khanglam hi den lawmlawm”, ci hiat lel hi.
25. Mi khat in Sia Go Khen kiangah, “Hau mahmah in, annkhing kham leng na ut hia?” a cih leh, Sia Go Khen in, “Ut mahmah keng, ken annkhing duh keng, anna bek duh ing, hau a annkhing kham sangin, zawng a annsa kham ut zaw’ng”, cih san ziau hi.
26. Sia Go Khen thongkia in a suahtak cianga a pau masak penpen in “Ka thongkiat hoih mahmah hi, hong khiate lungkim mahmah ding ahih teh”, ci ziau in thuaksiamna tawh pau hi.
27. Mopina pawi khat ah Sia Go Khen in hun zanga, “Nidanga mo kideih penpen Ni nungzui hi, tu hun in bel nungak ten, ni taang sa lua ta in, ni nungzui ut nawn lo in Kha nungzui bek ut ta uh hi”, ci-in mipi nuisak ziahziah hi.
28. Sia Go Khen leh galkap san thum lai-at pension lasa khat thukisel uh a, tuapa in “Hong simmawh ken, san thum pension hing, lai-at tentan ka kah lai un, a khat na ngah ing” ci hi. Sia Go Khen in “Nang a khatna ngah na hih teh a dangte nak hai ngei in teh maw?”, cihsan ziau hi.
29. Motor lambawl Lambo khat kiangah Sia Go Khen in, “Bo pa aw na lambawl uh alkatara(tar) tawm salua veng aw, annkamtui buak banga na taipih liang uh, tawm tamsak lai le uh teh hoih in teh” a va cih khak mawh leh Lambopa in “Sia na Pastor sinna vuah alkatara(tar) bangzah ding ci ahia?” na cih mawk manin Sia Go Khen pau thei nawn loin nui mawk hi.
30. Kumcin siwe khat ah Sia Go Khen in lawmte khat sam in, “Pai aw, niangtuisai-ah niangtui hawp ni, niangtui a taihte hong suaksuak nuam ing”, ci hi. A lawmpa in niangtui kitaih ding sain zui a, ann nek khit uh teh sia Go Khen in, “Niangtui a taihte kong suaksak ding kong ci ve leh”, ci-in a lawmpa kitaihsak hi.
31. Mualpi Siwe ah Sial tampi kigo cih amuh teh Sia Go Khen in a hunzatna ah Mualpi kong tun teh Liasiangtho mun khat pawk ing. “Sialsa bei mateng note tawh ka omkhawm tawntung ding hi”, ciziau se hi.
32. Nau ngekno khat sihna-ah sia Go Khen in hunzanga, “Ute naute mihing leh ganhing i kilamdanna i sihna mah zong hi. Ganhingte a sih ciangin kihuai kikah cih omloin Vokpi leh Zawhngeu bangin atano site ne kik mawk hi.” Mihingte kine samlo a, i kivui a kikah theih pen ganhing hileng i tano vui se loin kituh kawm a i nek lingling ding himawk hi, a cih leh mipi nak nuih ahmah uh a, tawpna thungen ding pa heh pian ahih manin ‘Topa tu mahmah in, dawi mangpa kammal za ung’, ci hi. Sia Go Khen in, “Pasian kiangah kinai khiat ngel hang ei”, ci ziau se hi.
33. Mikhat in Sia Go Khen kiangah, “Zanggam na tun zawh uh teh Khamtunggam hong kah zo nawn het kei mawk uh ciai, nuamsa ngei hi nuteh”,a cih leh Sia Go Khen in, “Suangtum tuk bel suktukin totuk kik zo kei mah ve aw”, ci ziau se hi.
34. Mi khat in Sia Go Khen zanggam a nuam mahmah hia, a cih leh Sia Go Khen in, “ Ni sa mahmah mawk in. Thopuan sung na ngawn ah i lawmnute tawh kisukha leng kimudah zo phial i hih teh nuam cih om thei sam ding ahia”,  ci hi.
35. Mi khatin Sia Go Khen, “No tuni ZCLS zum hong maw, nidangin lah na hong ngei het kei vua”, a cih leh Sia Go Khen in, “Nang tuni hong vak thei bilbel maw, nisim zum ka hon un hang lah hong mu ngeilo ung aa”, cikik ziau hi.
36. Sia Go Khen in, ZCLS ah a sep lai-in laibu kikhawng lua lo, kilei nuam lua lo cih a muh teh, “Lai gelh a, a bu a bawlna in bei hun nei ngeilo”, Laisiangtho in a cih man’ mahmah mawk ei, a tawi in zuak kul phial mawk” ci hiat-hiat hi.
37. Tangvalno khat in, Sia Go Khen kiangah, Pastorpipa a pyaka en maw, a cih leh Sia Go Khen in, “No a zang nailoten zong en hi ve uh cin, ko a zang dingten en mah lo ding maw, Pastorte’ etloh dinga kibawl hi tuan lo pi”, cihsan ziau hi.
38. Mopawi khat ah Sia Go Khen ciamnui dingin kisam a, puanten hual kuah in, nansetko khat tawh diang thiangthiang in siamna a tuamtuam lak hi. Khual ul ziat leh vei ah kaikeei ahih manin, “Ordination ngahsa Pastor lote peuhmah i sep zawh ding hi kei ei,” cih in mipite nuisak hi.
39. Sia Go Khen lai uuk mahmah ahih manin Sia dang khat in khamangthang vei kei teh a cih leh Sia Go Khen in, “Sia dangten khamangthang vei, Go Khen in typewriter (laikhetna) vei”, cihsan ziau hi.
40. Mi khat in Sia Go Khen kiangah, “Sia aw, mo na letthat(gawm) lam mu ngei mel keng, letthat(kitengsak) ngei mahmah lo na hiam?”, a cih leh Sia Go Khen  in, “Tulai nungak tangvalten Pastorte’ letthat ding ut se lopi, amau leh amau kithatthat lel uh hilo maw”, cihsan ziau hi.
41. Mi khat in Sia Go Khen kiangah, “Sia aw, Topa Jesu in ataklama pa’ kiangah, tuni-in Paradise ah i omkhawm ding hi. A cih pen, koilammun ai tam?”, a cih leh Sia Go Khen in, “Topa Jesu in tua a cih pen Paradise hi, cih ding lah hithei samlo ahih manin Jesu tawh om khawmkhawmna mun pen Paradise hi, cih himai lo diam”, a cih leh a dongpa in um mahmah keng! sang thei keng! ci hi. Sia Go Khen in, “ thei nuamin hong dong cin a, kong gen lah um tuan lo na hih teh na theihnop taktak leh nang zong ataklam a pa mah bangin sisuk leteh thei pah lello ding na hiam?”, cihsan ziau hi.
42. Sia Go Khen in nupa cih mawk pen pumkhat, sakhat i cihcih hangin lupna tung na ngawn ah kilem kei leng Kawl nambat ... bang in kilum hi in, kilem vanglak leng lah Kawl nambat ... a bang in zen ve hang aw’ ci hi.
43. Mi khat in Sia Go Khen kiangah vaimin na duh hiam, a cih leh Sia Go Khen in, “Vaimim ka duh taak in laisin kei ning, pilna zong kei ning, zanggam ah teeng kei ning”, ci-in dawng ziau hi.
44. Pasian’ nasem damlo a poi pawlkhat pen tulai thusuak nei pawl khat in mawhna hang hi. Pasian dantat thuak hi, cih bangin gen gawp thei uh hi. Sia Go Khen kiangah a kidot ciangin Sia Go Khen in, “Mawhna hangin kinungta zo tuan dingin zong um keng, mawhna hangin cina pah, sipah ding hileng kua mah teek sih zo tuan kei mawk ni” ci ziau lel hi.
45. Sia Go Khen in hunzangin thuumna a neih teh, “Ka mawhna hong maisak un, nong maisak kei uh leh note mawhna zong Topa’n hong maisak tuan lo ding ahih manin maisak zawh loh mawhna thuak veve ding hi uh teh, meet tuan lo ding hi uh teh”, ci masa se hi.
46. Kumcin siwe khatah inntekten ‘hoih takin zin hong do ung, Siate zong hong limbawl ung’, ci pianin thupulakna nei hi. Sia Go Khen in, “Innteek pawlpi te hong vaakna lungdam mahmah ung, nuam mahmah ung, ahi zongin nong vaak nong tahna khempeuh uh ko zong ka khua ka tui ciat vuah pua tuan loin, inn nunglam ciat mah ah hong kholsak ciat ung, ahawm mah a ciahkik ding hi ung”, cihsan ziau hi.  (Ekbuk agenna hi)
47. Inn tawm apha Pawlpi kem Sia pa khat kiangah Sia Go Khen in, “Na biakinn mai vuah bang suang nai vua”, a cih leh Siapa in, “Ka kiangah hong pia mite ka hawlkhia ngei kei ding”, cih suang ung, ci hi. Sia Go Khen in, “Bang hawlkhial mah ding nai vua, no kiangah kuamah hong pai lohpi”, cih sanziau hi.
48. Sia Go Khen in cina gimsim mahmah khat veh a, mai ngap mahmah khat zong ahih manin a muh phetin, “Kalai! Vantunggam tawh na kinai ngel mawk ve cia” ci masa hi. Tua cina tuni dong nungta in amah vangam tung masa zaw suak kik hi.
49. Sia Go Khen in daipam misite leh agina lua khollote, “misi nengneng”, ci-in  milian, mi thupi kilim uap piante pawl pen, “misi limci” ci se hi.
50. Kum 83 pha puteek khat si a, Sia Go Khen in a huam thu ngen hi. “Topa aw Late sungah mihing nuntakna kum 70 bang hi in cidam mahmah le ung, kum 80 bang hing nong ci hi. Ka pu uh kum 83, cing ahih manin na cihna zah val hi. Kawlgam nalemuh gam ahih bangin nalemuh tawh kum 3 nong nuntaksak manin ka nuam uh hi.” ci hi.  Mipi bel nak nuih mahmah tuak hi.
51. Mi khat in Sia Go Khen, “nang antan thunget nei ngei mel kei ve teh aw” a va cih leh Sia Go Khen in, “kalaisai! ann i tan khak ding lau a, na a kisemsem hi. Jesu in zong ‘nisim kham khop ann hong pia in’ ci-in thu ngen dingin hong sawl hi. Ken na nakpi’n ka sep nop teh ann tampi ka nek ban ah sun-ann pua lai hi zen veng aw.” cihsan ziau hi.
52. Mi khat in, “Sia Go Khen aw, nau- ap teh Vantung na tuno laibupi sung ah a min na khum in, i cih pen Vantungah laibupi om takpi ding hiam?” ci in a dot leh Sia Go Khen in, “Mangmuhna sung khawngah Tuno laibupi cih khawng om mah in, nau- ap teh zong ci thei zel mah hang. Ahi zongin laibu i cih pen i khuak ciapteh theiloh teng ciaptehna hi-in Pasian hilai mawk ahih teh, Pasian in zong mangngilh lo ding hi”, ci lel leteh lungmuanhuai zaw hi. Laibu zong kisia thei, mit thei, tuikawt thei lai hi”, ci-in gen beh hi.
53. Kawlpi inn khatah misi om in, Sia Go Khen in hunzanga inntekte Sihzang kampau ahih manin Sia Go Khen in, “Sihzang kamin bo cih pen bei, om nawnlo, bei taktak cihna hi. Ahizongin bo bo bo ci-in nih gawmleng beilo, omkik cihna hi zel hi. Tua mah bangin si cih pen si taktak mah, om nawnlo mah hi. Sisi ci le’ng zong nungta kik theilua hi”, ci-in hanthawn hi.
54. Sia Go Khen a neulai-in a lawmte tawh aktui gu ngei uh hi. Aktui neipa in, “Ka aktui uh gu uh teh!” ci hi. Amau, “gu kei ung” ci hi. “Gu kei ung na cih teitei na ang ip sung uah om hilo maw?” a cih leh Sia Go Khen in, “Tua ahih leh no aktui bangci ciapteh?”, a cih leh a ngawhte’n ngawh ngam nawnlo lian uh hi.
55. Sia Go Khen aneu lai-in midang ngawidawh khat va laksak ngei hi. Tua laitakin a ngawi neite tawh kituak lian se uh hi.
Ngawidawhpa     -Hei!! Go Khen, bang dinga ngasa gu?
Go Khen-A gu hi keng, a golte a en hi’ng.
Ngawidawhpa     -A en na hih leh a tung pan ensuk ve, but khiat kul sese maw?Go Khen-A tung pan en leng a nuai lam teng kimu lo hi ven.
56. Khatvei Sia Go Khen kawlte’ motor tungah tuangin, motor nuai lam sik gingging ahih manin kawlkam in bang gingging hiam? ci nuam in batantanle? ci hi. Kawlpa in dawng thei pak lo in, sikging hi ci nuam ahih manin tantanlitan ci-in nui tuak uh hi.
57. Sia Go Khen in tentan(training) pia ding, hunzang ding khawng akipat ding teh kua mah a ihmut a lusuk ding deihlo ahih manin, “Thu ngetna tawh ki-ap khin hi’ng, kuamah in thu hong ngetsak nawn kei un la, mang mu zong na om kei un, sunkim lai hi.” ci tawh pan se hi.
58. Sia Go Khen in Chairman sem leh sumpi don ding teh, “Kigap hun hisak ni” ci se hi.
59. Kumcin siwe khat ah nungaknote in lasa in, action tawh nikbawk teengin kilawm mahmah uh a, Sia Go Khen in, “Kilawm mawk mah ei, nikbawk bang siing pian zawzen in, buh suan ding sa phial hang”, ci-in nui veva hi.
60. Kikhopna khat ah latomno kisasa, khawl thei mahmah lo amuh teh Sia Go Khen in, “No lah la tomno cimawk uh cin, sa kikik zom kikkik na hih manun ken latomno sa hetken, vialnih vialthum zomzom mawk uh teh, ken bel taang 3 tun ding angak lah mahmah hi’ng” ci-in mipi nuisak hi.
61. Sia Go Khen in misi inn khat ah hunzang in inn kidei bialbual ahih manin mipi kimu khin theilo hi. Sia Go Khen in, “I mel i kimuh loh hangin i aw kiza ding ihih manin lungkim ciat ni. Lai i kikhak ciangin zong mel kimulo, aw kiza lo hinapi hangin a lungdam dingte lungdam, aheh dingte heh zo veve hihang”, ci phot se a, mipi in hi sa mahmah hi.
62. ZCLS EC kikhopna khat ah Sia Go Khen in a sep lai-in a khasum kikhangsaka amah lungdam in (......)tawh vaakin am pilpialin nui ngeingai uh hi. Sia Go Khen in, “Topa Jesu in zong khomun 5 leh ngasa tawh 2 tawh mpi 5000 a vaak, tampi val lai a, Cana mopawi ah lenggahtui bei pah cimawk ahih teh amau hun lai mah in zong a ha lam sangin a tuilam mah na kiva zaw pian uh hi.” ci-in mipi nuisak ziahziah hi.
63. Khamtung tangval khatin Sia Go Khen kiangah, “Khamtunga dingin bang ci nungak la leng hoih ding hiam?” ci hi. Sia Go Khen in, “Khamtung  a dingin  a melhoih a model kul kei, zingsang thawh tungin maitaii sa a tho, lokuan hat mahmah dingin lokhung panin mangthom sate a lotteh lotaw tusuk zo peuh leh hoih lel in teh” cih san ziau hi.
64. Sia Go Khen leh nungak ham kiho.
Go Khen - Tu laitak vantung kah lian leteh Topa Jesu kiang ah bang na gen masa pen tam?
Nungak - Ka gen pak ding thei tuan keng.
Go Khen- Lawmlawm! Topa nong piaksa vante zat lohin kekseu dek liangin hong puak kik ing, na ci kei ding maw.
Nungak-Tua zatloh van na cihte bang aa?
Go Khen -Theilo hetlo maw na van zatlohte? Ngaih sunsun le teh thei ni teh.
65. Sia Go Khen leh nupi khat kiho.
Nupi -Sia na zi nausuak maw?
Go Khen-He, zan nitakin suak ung.
Nupi-Zato maw? Inn ah maw? at maw atlo?
Go Khen-At kei ung, suah ngeina munpan mahin suak, ka lawmna a hin khiat lam hat bilbel aive.
66. Mi khatin thugen a, “Dawimangpa leh a pawlte ka hawlkhia hi. Kawlgam pua lam ah ka koih hi. Tuipi taw ka denna hi. Hong kileh kik nawnloh nangin Kha Siangtho tem tawh ka bansat hi.” a cih leh Sia Go Khen in, “Tua zah a hih thei na hih leh thatlum khin vet ve! Hong paikik nawn lo ding hiven,” cihsan ziau hi.
67. Khatvei mopawi khatah la kisa in Tedim Labu – 229, “Ki-it tawntungna hai kidawn ding hi, tum un, tum um” cih kisa hi. Sia Go Khen in, i ki-it ta zongin hai bel dawn ngap mahmah keng ei,” ci-in mipi nui ziahziah hi.
68. Sia Go Khen in tulai Upa pawlkhat bel zasan thak sangin kihta zaw ing. Hong ko ekek thei khawng lakah Sia ka sep sangin ka ngapngap in tawpat liangin bicycle bang a sik(ride) nuam zaw hi’ng, cihsan hi.
69. Sia Go Khen in ZCLS ah a sep lai-in lai cih pen haksa mahmah hi. Kawllai a (...................) cih zong a khiatna mitampi kikhawm uh hi, i cih hang in adang khat in cileng mi haite kikhawm uh hi, cih himawk lo hiam? Late 23:1 cih zong, ei kam in Topa Pasian pen eimau’ tuucing i sawltak, ei a tuu nei zong suak thei mawk hi. Tua manin lai cih pen baih lo hi, ci in gen hi.
70. Khangno pawlkhat in Tedim Labu – 218, ‘Ka lutung aksi taang a om diam?’ cih sa in nuam a sak mahmah laitak Sia Go Khen in, “Hih la phuakte in aksi a gol lam thei nailoin  a neu mahmah, lukhu tunga kisuang thei ding sa uh hi ding hi ven, aksi neu pen zong leitung sanin golzaw hiven,” ci hiathiat hi.
71. Pawlpi kikhen in nam nih a pha Pawlpi kem Siapa kiang Sia Go Khen in (............) Pastor kei mawk cin (...............) Pastor himawk ciai,” ci ziau se hi.
72. Sia Go Khen in zanggam teen bel nuam lua in, i zi i tate nasep omloin thadah semsem mawk uhi. I tate bang huansung ekbuk pai ding motorcycle bang zang nuam zen uh hi veh aw, khe a pai ding ut hetlo zen uh hi ven,” ci hi.
73. Sia Go Khen leh Sia dang khat kiho: 1995
Go Khen -ZBCM ah nong lut mengmeng kei uh leh nidangte “Mawhneite Jesu’n ngai hi” cih tawh nong lut hun uh om ding hi. Tun bel, “Jesu galkapte galsim ding kuan un” cih tawh a kipaikhia lenlen hi mawk hi.
Sia khat -Gi kei leng bel galsim ding om den mah ding ai ve. U Dai Liante’ inn himawkin  a sawtloin nong dai lian mai uh hiam, ci veng ee.
Go Khen-Dai Lian bek hisam kei Pau zong hi laisam hong paupau sam nung ee.

Sia Khat -Paupau lel bel na kam om kei leh va-ak in cih khat paunak nei hilo I hia? nui veva kawmin khawl tuak uh hi.
74. Sia Go Khen leh mipi kiho. Go Khen-Ka mel hoih nong sa uh hiam? Mipi-Hoih sa lo.
Go Khen -Hoih nong sak kei uh leh Pasian a simmawh, Pasian in ama’ melsuuna kei hong bawl hi.
Mipi -Hoihsa kik leuleu.
Go Khen- Ka hoihna hangin na mawhna uh hong maisak ing.
75. Sia Go Khen in, “tulai nungak melhoih i cihte bel mindangte’n zong hoih na sa tek mawkin(............) hi pahpah mawk ve aw,” ci hi. (mipi’ vanzat suakthei mawk cihna)
76. Kawlpi Tuiphum Pawlpi a Secretary sem Bo Vungh Khai pen Sia Go Khen teh hawh a, kahlei a kahtoh laitakin Sia Go Khen in Sihzang kam tawh to to to a cih leh Bopa in ko zong ka zat ngei mengmeng loh uh a khelkhel zang thei se na hiam,” ci-in nuikawmin kiho uh hi.
77. Sia Go Khen pen TV et uuk mahmah a, mi’ innah a etteh innteekten khak(sumit) zel uh hi. Kineisak si ci-in a hehsuakin khat lei a, innsungah mi dim den ahih manin nawngkaisa in aman zong sumit(khak) zel hi. Nidanga TV neite kineisak ka cih ahi ding mah hi ei,” cikik hi.
78. Sia Go Khen World cup et uuk mahmah in zanhak liang hi. Upa khatin a zingteh kilakkik lel hilo maw, zanhah liang sangin a zingteh enkik lel ve... a cih leh Sia Go Khen in, “A zo alel kitheih ma bek muhnop, a kitheih khit teh a en dingin ka nakpheh in nong kai zongin ut keng,” ci hi.
79. Sia Go Khen a neulai-in thadah mahmah danin om a, a Uten hizah a na thadah lawmlawm a cih leh kivaak zolo ding ka hih teh sang nong kahsaksak ding uh ahi ve, ci-in nui veve in dawng kik hi.
80. Khatvei mihon khat sabeng dingin kuan a, i mat bangbang hawm ding ci-in kiciam uh hi. Tampi mah mahin hawm ciat uh hi. Khatpa in a tuamin pawlkhat na selsim ahih manin alawmte lungkim loin i hawm ding hi, ci ci ta leh piakhia nuam tuan lo hi. A tawpna ah Sia Go Khen thukhen sak dingin pai uh a, Sia Go Khen in thukhen sak hi.
Go Khen -Na kiciam nasa bangun na sa matte uh hawm naivua hawmlo

Sabengte-Hawm khin ung, lawmpa in pawlkhat na gusim mawk hi.

Go Khen -Na kiciamna vuah a gusim a om leh tua a guksimte zong hawm ding ci nai vua, ci kha lo?
Sabengte-Guk cih limlim bel gen kei ung.
Go Khen -Tua ahih leh a gupa in hong hop nop leh hong hawmin, hong hop leh hong hawmin, hong hop nop keileh ama’ thuthu hi. Nget theih hilo hi.
81. Sia Go Khente teenna pen luigei ahih manin suang kiciang hi. Suang kilak ding phal loin kumsim a cian behbeh hi. Nupi khat in Suangsi sek nangin gusim den mawk hi. Lakhia ken cita leh laden hi.

Go Khen-Nihvei thumvei kong gensa la teitei kei ve, lau ding hong sa maw, a zumin zong zum mahmah lo maw?
Nupinu - Pastorpipi tua bangin pau se kei aw...
Go Khen-Pastorpipi ci se ke’n, Laisiangtho deihna bang hileh guta suang mah tawh kong denlup ding hi teh...
82. Khuapih sabengte in sa manin Sia Go Khente sa tan hi. A nu pau manlang leh a khial thei khat hi-in tua satan a ngahte uh ui khat in ne a, A nu-Go Khen Thang na pam a uisa ne!
Go Khen-Nu, a sial hilo maw, a min hilopi.
A nu-Min leh min ta keh ne..(na pam a sa ui in ne a ci nuam hi.)
83. Mi khat in Sia Go Khen hun na zat simin ciamnuih bekbek na gen a, mi na nuihsaksak a bangci mawk na hia? a cih leh Sia Go Khen in “Thu manpha, thuthuk i gen hangin lah kuamah in thei zolo a, ciamnuihna tawh thuah leng amau zaknop sa zaw uh hilo maw,” cihsan ziau hi.
84. Mi khat in Sia Go Khen kiangah “Na laibu bawlte a malkhial tampi om, puahpha mawk ve, a cih leh Sia Go Khen in, khial hi ci a, a khialna na muh na theih nak leh a khial nawn lo hi pah hi. A khialh lam kuamah in mulo, theilo hileh a khial suak hi ding hi,” cihsan ziau hi.
85. Sia Go Khen in Pastorte khasum tam hetlo cih a muh ciangin “Pawlpi miten siate hong it mahmah in, sikhang natna ngah zawh na ding, zunkhum natna ngah zawh nading in khasum hong piangam lo hi, i khasum tawh natna kingah zolo ding hi,” cihsan ziau hi.
86. Sia Go Khen in ann nek teh meh tui pian hi, cih amuh teh, “Tuiphum Pawlpi hihang ei, i sikkeute mehtui sungah phum ziahziah, baptize ziahziah ni” ci ziau se hi.
87. Sia Go Khen in,  “Pastor innkuan tengin anteh meh khawng aloo meh khawng sameh bang a muhtheihna mitlimlangh nei-in annek kuan teh bulh tek leng hoih ding hi veh aw, ” ci hi.
88. Khatvei Sia Go Khen in hunzangin sawtlua ahih manin a mailam a tu numei khatin, “Sia ko na koici om ding” ci hi. Siapa in tutnop leh tu, lupnop leh lum, cihsan ziau hi.
89. Palwpi khatin Sia Go Khen ciamnui dingin sam a, nitak pan kipan ciamnui in zingsang nai 2 pawlteh a ngaite lususu uh hi. Siapa in a ngaih na ngawn taak kei uh cin, ciah mawk vou,” cihsan ziau hi.
90. Pawlpi kilemlo lemtuah dingin Sia Go Khen pai a, tutung thugen ding hilo, (.............) sun dinga hongpai hing, ci hi.
91. Mi khatin Sia Go Khen lampi na paikawm a na nuih veva den bang himawk hiam? ci hi. Siapa in Leitung nuntak thu tampi ka lungngaih teh ka nuihza den mai hi veh aw,” ci hi.
92. Sia Go Khen Ordination akipiak dingin kipa pak loin kum khat enlai ni, a kicih zel teh Sia Go Khen heh lua in, “tua banga hong enen nuamte thupbunuai gawp ding ka cih phial hi-in, ka ngaihsut kik leh Eh, zenzen! tua Ordination nitak meh zingmeh a nektheih zattheih lah hilo ban a mang ding ka hiam? ka cih theih teh ka lung hong nuam” ci hi.
93. Sia Go Khen in “nitak khuamial cianga lamdung khawnga nungak nui ziahziah i cihte bel a pa ding na om uh leh ko a nu ding ngap lua ung, ci a kikoko uh hi in; khiatna nei a nuilualuate hi,”  ci hi.
94. Sia Go Khen in, “Khasum sangten lah khacing haksa, innsapten lah khacing baihsa ahih teh khasum sangta dingin nipi khat khakhat hi henla, innsap ta dingin khanih khakhat hileh hoih ding hi ven” ci hi.
95. Mi khatin Sia Go Khen kiangah, “Pastor ci-in mihaute inn bekah hawh nuam uh teh, ko a zawng daipamte kiang ah hong hawh nuam uh teh”, a cih leh Sia Go Khen in, “Mihauten a hauhna uh Pasian hong piak hi ci in lungdam ko ding in hong sam zel in, no zawn mahmah leh Pasian uploh, gitloh tawh kithuah lai zen mawk na hih uh teh, kong hawh ding uh haksa mahmah hi. Ganhing in zong a ngaite mah ngai bek hi,” ci hi.
96. Sia Go Khen thong akiat laitak thongah ah mi khat hawh a, niangtui leh moh a nekhawm uhi. A ciah ding ciangin inn ate vaikhak ding a om hiam? a cih leh, “Thongsung ahih hangin i Presidentpa tawh lum khawm ung, Pastor leh President thongkia khawm ding zong haksa, tawl khat hong om lai nung, bangmah na lunghimawh kei uh hen,” na ci in vaikhak hi.
97. Sia Go Khen hong nutsiat in mikhat in Siapa hong thokik vat leh bang a ci tam? ci hi. Midang khat mah in, “Hong thokik himawk leh, Pasian in khamangthang man dingin hong sawl napi, ngamangthang ka mat zawk leh nga in kei hong leh mat mawkin a si kihi ziau lel ei, ci-in teh” ci hi.
98. Mi khatin, “Sia Go Khen hankuang sungah a koici om tam?” ci hi. A dawngpa in, “nui veva in teh” cih san hi.
99. Khris leh Khrih a kituhtuh a kiselsel laitak a Sia Go Khen si ahih manin,a hankhuk tungah, “Kei a ka nuntakna in Khris hi. – Fil. 1:21 ” cih ki-at hi. Pawl khatin hankuang sung ah lungkim mahmah i nui veva ding hi,” ci hi.
100. Sia Go Khen hong nutsiat laitak mikhat in Sia Go Khen in hih a kapkapte mu leh bang a ci tam? ci hi. Khatpa in, “Na kah uh kituak sak un, a un a eu omsak kei un, a tawp hak a tawp baih zong om se kei un,” ci-in nui veve kawmin gen in teh, ci hi. 

Lungdam

April 2013

KAM MAL HOIH PAWL KHAT

Dear, All

I tate'n I khekhap hong zui den ding hi leh, I phal ding hiam cih ngaih sut huai hi. ( Dr. Khai Khan Suan )Na tate ' gei-ah ciangkang leh apple koih khawm den in''. ( Dr. Yonggi Cho ) Hih pen bang acih nop na,ahitam, athei ten ong hilh sawn un"Falam, Hakha -te Sia khat,makai khat in acih nak leh kimang diamdiam,kipanpih pah uh hi.Eimi te bel tuapa lellel bang peuh gen a,bang peuh sem hiam kici hi. ( Professor. C .Thang Za Tuan )Zomi te ' bulphuh Vaphual lim maw, Vaphual lungtang. ( Dr. Chin Do Kham )Tampi genna sang in, tampi sep na in mite' muanna kigah zaw hi. ( Rev. Suak Za Go )1. Thei lo a,a theih loh lam athei lo te,mihai hi,peel in.2. Thei lo a, atheih loh lam athei te,midik hi,lam hilh in.3. Thei a,atheih lam athei lo te,a ihmu hi, phong in .4. Thei a,atheih lam athei te,mipil hi,zui-in. ( Arab Te Paunak )HUN IN ;; A ngak lah te adingin zekai lua,A lau te ading in cing baih lua,A dah te ading in sawt lua,A hizong in hun nite in azang thei te ading in atawn tung hi. ( Wisdom,Jan. 1999 )Na nuntak sung thuman thutak gen in,tua hileh gilo pa maizum ding hi. ( Shakespear )Mi asim mawhmawh te kiam suksuk a,mi' simmawh te khangto hi. ( Edward Gibbon )Pasian a ento den mikhat in midang te enniam ngei lohi. ( William A.Werd )Pasian in alawh cing ding a hongsap hilo a,athu mang ding a hong sap hizaw hi. ( Mother Teresa )1." Christian tampi te vantung gam tunngap mahmah napi,Biak Inn tung zolo uh hi,2. Pawlpi hat naleh khan napen naupangte pianthakna ahihlam kaphawk hi,3. Thu angen den Nupi khat in a ang aa,atawi naungek ,satan' khut in ban zolo hi, " ( D.L.Moody )Zomi te sumzon na,naingangyi,biak nalam I tangthu te ka et kik teh,mai-ah lah pailo ding, nung ahlah zui loding, tonkhawm dingin I khete ki taihtaih ( kipal khakha ) ding. ( Dr. Gin Khan Khual )Sawm Pau- Ngaih Te

I tate'n I khekhap hong zui den ding hi leh, I phal ding hiam cih ngaih sut huai hi. ( Dr. Khai Khan Suan )Na tate ' gei-ah ciangkang leh apple koih khawm den in''. ( Dr. Yonggi Cho ) Hih pen bang acih nop na,ahitam, athei ten ong hilh sawn un"Falam, Hakha -te Sia khat,makai khat in acih nak leh kimang diamdiam,kipanpih pah uh hi.Eimi te bel tuapa lellel bang peuh gen a,bang peuh sem hiam kici hi. ( Professor. C .Thang Za Tuan )Zomi te ' bulphuh Vaphual lim maw, Vaphual lungtang. ( Dr. Chin Do Kham )Tampi genna sang in, tampi sep na in mite' muanna kigah zaw hi. ( Rev. Suak Za Go )1. Thei lo a,a theih loh lam athei lo te,mihai hi,peel in.2. Thei lo a, atheih loh lam athei te,midik hi,lam hilh in.3. Thei a,atheih lam athei lo te,a ihmu hi, phong in .4. Thei a,atheih lam athei te,mipil hi,zui-in. ( Arab Te Paunak )HUN IN ;; A ngak lah te adingin zekai lua,A lau te ading in cing baih lua,A dah te ading in sawt lua,A hizong in hun nite in azang thei te ading in atawn tung hi. ( Wisdom,Jan. 1999 )Na nuntak sung thuman thutak gen in,tua hileh gilo pa maizum ding hi. ( Shakespear )Mi asim mawhmawh te kiam suksuk a,mi' simmawh te khangto hi. ( Edward Gibbon )Pasian a ento den mikhat in midang te enniam ngei lohi. ( William A.Werd )Pasian in alawh cing ding a hongsap hilo a,athu mang ding a hong sap hizaw hi. ( Mother Teresa )1." Christian tampi te vantung gam tunngap mahmah napi,Biak Inn tung zolo uh hi,2. Pawlpi hat naleh khan napen naupangte pianthakna ahihlam kaphawk hi,3. Thu angen den Nupi khat in a ang aa,atawi naungek ,satan' khut in ban zolo hi, " ( D.L.Moody )Zomi te sumzon na,naingangyi,biak nalam I tangthu te ka et kik teh,mai-ah lah pailo ding, nung ahlah zui loding, tonkhawm dingin I khete ki taihtaih ( kipal khakha ) ding. ( Dr. Gin Khan Khual )Sawm Pau- Ngaih Te

NU HONG ITNA BANGCI'N NA THUK

Leitung ah sum neipeuh leng na khempeuh kilei thei hi. Na sum neih dan zui-in amanpha le amanphalo na deih bangbang na lei thei hi. Ahi zongin sum tampi I nei zongin a ki leithei lo khat om a tua pen ‘pianna tunnu’ ahihi. Nu-kik pa-kik kinei thei a ahi zongin haksatna tampi in hong nungzuih thei hi. Bang hang hiam cihleh sisan ki bang tak lo ahih manin nu-kik pa-kik neih cih pen alem (atuh) tawh kibang ahihi.

Pianna Tuunu: Nu’ in a gilsung ah kha 9 sung bang hong paii khit ciangin thaneih khempeuh suuk in a pumpi bup khua-ul tawh kidim in hong hing khia ahihi. Pawl khat te cidam a a suah khiat theih na dingin a gilpi bit lai ki kuikham in a nu ihmutza tawh tawl khat khua phawk loin ( sisak) phot a a suak zong ki om hi. I gol khit ciang I pian khiatzia I tel taktak loh hang Nu gilpi tung a mapawn a sih masiah manglo hi. Hih ciang na tun theih na dingin Nu in kha 9 sung hong paii sungin hoih tak mi cidam khat na suah theih na ding lunggulh na tawh a duh khempeuh zong nengam loin a utna khempeuh ah pai zoloin gim le tawlna tampi thuak hi. Hih ciang na phak theih na dingin na pa muhloh kaal in na asak hun, a patauh hun, a kah sim hun tampi tak zong na om hi. Leitung mawhnei mikhempeuh in gupna a ngah theih na dingun Jesuh in a PA Pasian taisan na a thuak khit ciang ni 3 sung si hi. Na pian na na tuunnu ngaihsun dih in. Na suah lai takin sih theih na ding lauhuaina pan hong hot khiat theih na dingin hong thuak sak nate, nai bang zah hiam sung a sih nate, tua hun lai tak in na Pa na ngawn in mungam loin a taisan nate…etc. Na pian khiat na ding a na Nu thuak nate sum tawh lei dingin kituat zolo hi.

Tua bang dan in hamsatna namkim thuak in hong nei ahih manin na Nu a lungdam na ding na bawl zo kei zongin na khasiat sak leh lauhuai mahmah ahihna hong musak hi. Ahi zongin a tawn tungin na Nu hong lamet pen itna ahihi. Hong it mahmah na tawh piang nahih manin nang zong na it mahmah ding hong lametna lianpen ahihi. Tua ahih manin pianna tuunnu bang ci it ding...?

1. Na kam tawh na itna lak in (gen khia in)
Zomite’n ‘hong it ingh’ cih kammal pen zat ding haksa I sak khat ahihi. I it taktak lohte hongit ing I ci ngam a, I it taktak ding te hongit ing I ci ngam kei hi. Kam mal thum bek ahih hangin I pusuah zo mahmah kei hi. Cik mah a I muh ngei loh tawm vei I muh pak mi’ tanu tapa khat tung ah zat ding I kam manlang mawh lo hi na pi’n, a nuntakna tawh hong lei hong tan I pianna tuunnu tung ah I zat khak meng meng loh pen I nu te a na thanem na khat ahihi. Nu aw, hong it ing ci a I pulaak khiat pen sum le paii sang manpha sazaw uhi. Tua kammal zak na hangin na cidam pih uh a, na ihmutpih thei in, mite mai ah na lungtaipih uhi.

2. Na pumpi tawh na itna lak in
Bang mah na hih theih ma in na kisapna khempeuh hong hihsak nu ahihi. Mi dang khoih nop loh lupna tung a na zun na-ek hong siaksak nataw hong sawpsak na tuunnu ahihi. A anglum ah hong tawi in nisa khasa hong dalsak na tuunnu ahihi. Na niik kek na puan kek hong khuisak na tuunnu ahihi. Na duh na deih khat a om ciangin hong pia keile na kap hi. Na lungkim na ding ahih naak le leitawi zong in na deih hong leisak na tuunnu ahihi. Tua ahih manin paak hoih pen zungbuh hoih pen na piak sang’ na nu ngawng kawi in a khut te letsak in a ta na hih na na lah siam ding a sung tawng lunggulhna khat ahihi. Tua in na nu kha muang sak a alungsim taksa cidam lawh hi.

3. Lungduai tak in it in
Ta ten nu te nasep phawkpih kha lo zel hi hang. Pa te le ta ten nasep nei keng e I cih laitak nangawn in nu te hunbit(full time)nasem na hi den uhi. Nu hih na tawh a nasep te: zing sang tho baih in tate thawh ma in nek theih ding niangtui/an kisam teng bawlsa in na koih uhi. An neek khit ciang kuang le keu sawp in na sunsiah ding guang a sang kah ding tate van hong ki thawisak hi. Tate sang kah/nasem in na om sungun inn sung innpua na hah in sun tha pai na buai lai uhi. Sang tuak/nasem ciah le cin na gil kial ding lau in nitak an huan in na buai to zel uhi. Nitak na vai tun ciang a sep ngei an le tui bawl in kuang le keu sawp in na lup dong mah uh buai hi. Na lup khit ciangin zing ciang na silh ding nik le puan te hongtaihsak a baihsain hong koihsak hi. Tua ahih manin nu nang bang mah nasem lo maw..? cih sawm kei in. Khat vei vei inn sung vai kisapna khat peuh aom le zong lungduai zawh na pen nu itna ahihi.

4. A thu gen limtakin ngaih sak in.(Thupi sim in)
Tate hong gol zawk deuh uh ciangin nute lung muan na khat in thu le la kikup pih thei ta ding cih ahihi. Na neu lai in a sia apha amah bek khensatna ahihi. A khensat khempeuh uh hoih pen cihna hilo hi. Tu’n nong gol tak teh a thanemna a thangahna hong kikup pih nuam hi. Inn kuan sung vai hong geel pih nuam hi. Na suah a kipan kum 15 sung bang amah guak geelna tawh hih ciang hong tunpih khit ciang tu-in nang tawh thu kikum in na vaihawm pih ding hong lunggulh ahihi. Tate gol semsem in nute a kum uh hong tam tektek hang a lung himawhna uh a bei hi lo hi. Pawl khat te’ pataauhna khawng hong tam tektek thei zaw lai hi. Bang hang hiam cihleh a thu gente uh, hong thudot te uh gina takin I dawn loh ciangin katapa in hongvaak mah tam…zi hong nei leh…azi tawh bang hong cih tam…? A tuam tuam a patauhna uh tampi mah omlai hi. Tua ahih manin na nu lungnopna ding le cidam na dingin hong thu gente thupi sim in. Thu dong khial kei in la kikup pih zel in. Tua in na daupai na ding hi.

5. Lungdam tak in it in
Nu hong itna cik mah hun in naloh zo kei ding hi. Ahi zongin na hih theih tan hanciam ding ahihi. Nu omlo hileh na piang thei kei ding hi. Pilna siamna tampi hong guan zo kei zongin mihing khat nasuah na ding lung khamna tampi naphu kha to hi. Tate hih ciang I tun theih na dingin lungdamna sang lung khamna tamzaw na tuak kha ding uhi. A tuah khak haksatna te a mal mal in na theih loh hangin ama hangin na lungdamna kilang khia sak in.

Na piak theih ding hamphatna khat peuh na nu a dingin lian lua ngei lo ding hi. Nang cidamna ding nang lawhcin na ding sangin thupi a sak zawk bang mah omlo hi. Jesuh in a ma pumpi ki balnen zah in leitung mite hong it bangin, na nu’n nang hong it luat manin a pumpi ki balnen ahihi.

6. Zahtaakna tawh it in Paikhiatna 20:12
Topa na Pasian un note hong piak leitang tungah na khan uh a sau theih nadingin na nu le na pa zahtak un. Leitung abawl pen Pasian ahihi. Tua leitang tungah lawhcin na dingin Pasian in nu le pa na tawn sak hi. Malaysia, Australia, America gam tun man a lawhcin na kingah hilo hi. Koi mun koi mun ah I om zongin Nute I zahtaak bawl a Pate I thupi sim leh lawhcin na kingah bek ahihi.

Tua hangin Kawlte bang in Pasian zom ah a nu le pa koih lian uh ahih manin bia ta ngial uhi. Nu le pa a zahtaak bawlna un lawhcing sak uh a nasepna mun khat peuh peuh ah zong ei pawl khat te sang’ panmun thupi nei zaw mawk uhi. Tate, na nu na it leh ka zi in zong hong itpih hen a ci na hihi. Tanute na nu na it leh ka pasal in zong hong it pih hen a ci na hihi.

Na Nu kamsung pan pusuak kammal in hong hau sak thei a, zong hong cimawh sak thei hi cih mangngilh kei in. Na nu’n hong samsia khol lo ding a ahi zongin sep ding le hih ding kilawm bang na hih khak keileh nang le nang a ki bum a bang a hihi. Nute a khuisasa sak ta/tanu hiloin, Nute hangin nuam a sa kim ding Topa’n thupha hongpia hen!

Sia Khuppi
ZCF Kota Daman Sara