KHUADO PAWI THU

KHUADO PAWI THU

Thumasa:

Tedim gam sungah Khuado a kizat ciat hangin, lasak akipan gamtatnate kibang kim lo hi. Bang hang hiam cih leh, omna mun kikhat lo ahih mah bangin ih omna mun tawh kituakin gam min, khua min, lui minte tampi-in phuisam, lasak leh gamtatna ah kizang ciat hi. A kibang lo nengneng a om hangin, Khuado ngeina kician omlo hi ci-a ngaihsut ding hilo hi. Khuado thu ih gen a kibat kim lohna zong athupitna mahmahna hi zaw hi, ci-in ngaihsut ciat ding ka deih hi.

Khuado pawi ih cih pen Zomite pawi neih thupi pen leh lim zat pen ahi hi. Hih pawi pen tuuk anlak khit ciang kibawl ahi hi. Khuado pawi bawl hun leh Vaite pawipi “Diwali Puja” leh Kawlte pawipi “Mithuun Puai” bawl hun kituak a, Khuado pawi ih bawl zia tawh kibat mahmahna nei-in mei kide tek hi. Kawl leh Vai ten “Khuaimeivak” de-in, Zomite in “Meilah” ih de hi. Hih panin Zomite pen minampite mah banga ngeina zia leh tong kician anei ih hih lam kilang mahmah hi.

Tua banga ngeina zia leh tong kician anei minam picing kihi napi in, minam picing hong hisak ih minam pawipi Khuado ih neihna natawm a theilo tampi ki-om ding hi. Minam pau, lai, ngeina, pawi leh khanglui vante kician a neilote minam picing kici theilo ahih anin a it lo, akem lo, apuah lote minam khangto suak ngeilo hi.

1.       A khiatna:

Khua cih in khiatna anam tuamtuam nei hi. Pasian genna –in “Khuavak” kizangin, Dawite genna in “Khuazing”kizang hi. “DO” ih cih in zong khiatna nam tuamtuam mah nei-in, a sia lam leh ahoih lamin kizang khawm thei hi. Ih it ih ngaih hong zin, hong lengla aom ciangin zin do, lengla do ci-in “Do” zatna mun ah om mah bangin, hong bawlsia thei dawi leh gaalte I sim ciangin zong “Do” ci-in zatna mun mah om veve hi. Zomite in “PAWI” ih cih pen Mikangte in “Festival/feast,” ci-in, Vaite in “PUJA” ci-in, Kawlte in Puai na ci uh a, Luhseite in “Kut” na ci uh hi.

Tua panin Khuado pawi pen thupha hong guan Pasian dona, lungdam kohna leh thupha ngetna pawi hi-in, a lang khat lam ah hong bawlsia thei dawi leh kaute lak pan kisiansuahna dinga dawi leh kaute hawlkhia a dina pawi hi hi.

2.       Kipatna:

Khuado pawi ih neih zwh kum za guk(600) peuh mah sawt khindingin ki-um hi. Khuado pawi pen khangthak ngeina zui-in Manipur gamah Tedim Chin Cultural Club makaihna twh October 11, 1969 kumin Tangnuam khua-ah zat kipanin, Mizoram ah Zomi Society makaihna twh November 12, 1994 kumin Sairang, Tlawnglui ah kizang hi. Tuipi galkai Zomite’n Singapore Zomi Innkuante makaihna twh 1995 kum panin Singapore khuapi ah “Leitung Bup Zomi Khuado pawi” min vawhin zat hong kipan to-in, tu ciangin leitung bup ah Zomite omna peuhmah ah kizang kawikawi ta hi.

3.       A zat hun:

Khuado pawi in “NI” neilo-in a hun bek nei hi. Ahi zongin ahun kum simin September leh October khasung hi hamtang hi. Bang hang hiam cih leh Khuado pawi in tuk hun anlak khit ciang a kibawl hi a, kumkhat leh kum khat khua khat leh khua khat anlak hun aki tuah lianlian theih loh ban ah khua sungah mipite om kim hun ding tawh kigel a, kibawl ahih manin ani kiciang tan lian thei lo hi. Ahi zongin Khuado ni ding leh vai khempeuh tangpi tawh kisai ahih manin hausa leh upate in agel loh phamawh hi. Upate in atunga ih gen Kha sungin nikhat seh phot uh hi. Bang hang cih leh khualzin gamvakte tua sungin hong tungkim theih leh cih deihna ahi hi.

Lam khat panin Aizawl dan khawng ah khuapite ah Khuado pawi ni ding kician khat seh a kipsak pen akilawm lahna om tuanlo ding hi. Bang hang hiamcih leh Khamtung nuntak ngeina dan a anlak cih bangi omlo hi. Tua hih mahbangin Mizoram ah Zomi Culture Society in 1998 kum paninKhuado ni dingin September 25 ni sehin kipsak hi. Manipur Zomite in bel October 2 niseh uh hi. Bang hang hiamcih leh October ni 2 ni pen India makaipipa Mahama Gandhi pianni phawkna ni holiday  hi-in  mi kimin hun awng a neih ni khat ahih man ahi hi. Ni khat ni ciangin  Zomite in ani kituakin Khuado pawi a zat ni uh  hong tung lai dingin ka um hi.

Khuado pawi pen ih Zomite  pawi thupi pen leh lim zat pen ahih mah bangin hihna, ngimna deihna tuamtuam tawh akidim, anuai a bangin tunkham tampi nei hi. Kum khen Pawi: Zolai simbu sungah “K Khuado pawi kumkhen pawi”  ci a akisin mah bangin Khuado pawi in Zomite kum khenna hunpi khat ahi hi. Hih akitelna dingin khangluite’n “la ih cihin thu hi”, acih bangin Khuado pawi a kisa la dawng khat en lai le hang:

Kum kikhen e sawlkha dang e, zin in avang khua zong hen aw,

Ziin in avang khua zong hen aw, sian sung tui bang siang heh aw.

Tukawl tawi kum khua ih khen a, Ningzu khum lai aisa aw e,

Ningzu khem lai aisa aw e, khan kumsawt ciam lai leng e.

Hih la in Khuado pawi pen Zo kum leu leh Kum thak khenna ahih lam kician sak mahmah hi. Tuhun ciangin Mikang hun khenzia Gregorian calendar zui-in kum lui beina December 31 ni leh kum thak kaina January ni 1 ni dan ih zuih zenzen hang Zo kum lui leh kum thak khenna ni Khuado ahi hi.

4.       Anlak pawi:

Khuado pawi pen anlak pawi zong kici thei hi. Bang hang hiam cih leh Khuado pawi in tuuk an lak khit bek cianga akibawl leh tua an thak khai thakte muanga akibawl hi a, kum khat sung tawntung ih khawh ih cinnate pana hong piang thupha khai leh an tuamtuam aihna leh tuate hog pia, hong siam pasian tungah lungdam kohni leh hong tungding kum thak ah vangphatna leh inn ma lo ma ahoihna dingin akizang pawi ahi hi.

5.       Khuai lak pawi

Khuado pawi cianga a minthang mahmah khat pen khuailakna hi. Khuado khuailak ih cihciangin a kimawk lak hi lo-in, khuaibu(khuaipheng) panin hong tung ding kum, kum hoih ding maw, sia ding; kicidam ding maw, kina ding cihte theihnopna a aisanna in akizang ahi hi. Khuaibu leh anote omzia panin kum thak sungah maban ding kithei ci-in khangluite in ngiahsun uh hi..

6.       Meidet pawi:

Khuado pawi akilawm sakpi pen meidetna hi hi. Khuado minasa pen meilah lak ni-in kizangin “Meilah lak ni” a ci zong om hi. Hih meilah te pawi sung tawntung kilim zat mahmah hi. Dawi lehkaute dona (kaubetna neidetna) a kipan khawsiam pasian avaak tawh dona in zong akizang, akitang sak, akivaak zihziah ahih manin khuado in mei det pawi zongcih theih hi.

7.       Siansuah Pawi

Khuado pawi pen siansuah pawi zong ahi hi. Ih pu ih pate in mihingte a nasak, asisak leh mihingte tunga tuahsiatna tuamtuam atungsak pen dawi leh kaute ngawh uh hi. Tua dawi leh kaute tawh a tengkhawm hidingin kingaihsun lai uh hi. Khuado  cianga “Kaubetna” leh Meidetna in a ngimpi pen zong mihingte abawlsia dawi leh kaute notkhia-a innsung, khuasung, gamsung siansuah ahi hi.

8.       Kigin ni;

(a)Sagawhna: Khuado pen neihsa, khawisa, vulhsa teng tyawh hih theih zahin kibawlin vok kigo pen hi. Zingsang vaikhuan hun ciangin, lawm papite in a pawl pawlin vik go-in, nithum sung akhom ding sit tuam pah uh hi. Sa semna ah sakuang namnih omin, sasem papite in a vok khawite leh a langte tan ding tuak a khen ma-un amauteng khamkhop ding thuk masa uh hi. Tua pen Sakuang balnek kici hi. Vik vulhte leh a langte hawm pen sakuang hawm kici leuleu hi, sagil bawl kawm , sa sem kawmin zu lup dawn kawmin tang ziahziah uhhi. Tua lai takin inn nupite in ah inn tek uh ah tangsih nganhuan uh hi. Naupangte in khuag leh zam, daktal leh sialki tumin asisate phawkna in mualte hah siang uh hi.

(b) daihawhna: sate amin phetin asin alung, atuap leh akalte themno khat tek eukhia in sawm tangvalte in tua kum sunga misi anei innkuanpihte puak uh hi. Hih sa sungkuate pen misite adding a kikhoih tuam hi-in, sun lam ciangin nupite in zu khaihsa leh tangsih tawh tua sate kengin hanah misite valui uh hi. Hih pen daihawh kici hi. Asisa  a innkuanpihte luguh sathau zutzut in zu leh sa, tangsih tah uh a, tua pen si annsuah kici hi. Khuado pen a sileh ahingte kizopna tawpna, kikhakna hunin kingaihsun ahih manin khuado ciangin mipawl khat lungleeng khawngai-in kapkap mai uh a, lazong hih bangin na sa khawm uh hi.

(a) Dona lingling, di na lingling e, gual in kumkhua dona ling ling e,

(b) Gualin kumkhua do nalingling e, do hanah nau bang va kap tange.

(c) Ankuang umna: Daihawh nupite inn hon gtun kik masiah ann kineksan theilo hi. Nitak annkuang um dingin kikai khawm uh a, mi a kimtak teh , papi atal taak pen in zu kam khat teepin phihin phuisam hi. Tua khit ciangin, aban a baanin zu gual teep uh a, annkuang sa kuang umkhawm uh hi. (hihin ann nek thunget dan ahi hi). Ann nek khitcaingin ih Zongeina bangin ki-it kingaihna, kideihsak zia lahna in sabaak leh sangoi kibaak khengkhang in gualnuam thei mahmah uh hi.

9. Kau betna:

Khanglui ih pu ihpate hun lai-in misi aom ciangin a kha misi khua ah pai pah lo-in, innsung, innnuai, innkun leh sumtawng teng khawngah khudo masiah thamcip den dingin ngaihsun uh hi. Tua ahih manin misite agil uh akial mahmah dingin ngaihsutna tawh misi a om the kawsah, ann khai, lukhung ahh cih bangin kilui hamtang hi. Khangluite in misite pen dawite peh hi, ci-in ngaihsun uh hi. Tua ahih manin khuado sung a gilna laina a om lohna dingin dawi leh kaute notkhiat in kau kibeng hi. Ann nekna a man khit uh ciangin kaubetna dingin meilahte sau silselin lim takin tenin alom a alomin kihencip hi. Kaubet ding ciangin kon gsak leh kongkhangah meilah takna ding nahtang kuak kikoih masa phot hi. Hausapa inn ah pasal teng kikaikhawmin phit lem uh hi. Tua ciangin inn kimin meilah de ciat uh hi. Tualteekpa (siampu pa) in athau lawnin kaubet hong kipan pah hi. Tuatekpa khit ciangin midangte in beng thei pan hi. Kaubet pen pasal tangzang khat peuh in khut lang khat lamah meilah lom det kawmin tuga, heiga leh singkhuah bawk khat peuh tawi-in innsung tawng panin inntung innnuai innkawm teng bansat in:

                “Dawi hang kau hang aw, na zun na ek namsia, Na ni na kha cingta, na zi natate’n hong lametna sawtta, Na inn na lo ah ciah, zuan in “

ci-in hawkinj kiko gamgam hi. Tua bangin innkawm teng ban satin inn kongbiang atun ciangin atuga daipua denna in, “A khebuuk, a ngaltak sat kha ing ei,” ci-in a meilah ken khen nih suahin, lom khat khang gawlah, lamkhat sak gawlah akuangsa in siatin nusia hi. Hih pen dawite hon glut kik ngam nawnlohna ding ahi hi. Tua khaubengpa mi thumin zui in khat in khuang, khatin daktal leh khatin thau tawi hi. Kaubet kipat ding ciangin thau khat vei lawnin, inn kong biang a tun ciangin khat vei lawm kik hi. Inn khempeuhah kau akibet laitakin tum theih tum mawh teng tumin, thau lanin kisa ngeingai hi.

10.Meidetna:

In khempeuh ah khaubetna a man khit ciangin , sawm tangval tengin gua dawnah meilah siatin adesa-in khuang, zam leh dak tawh a honin hausa pa inn tualah kisutahin thum vei kimvial uh hi. Dena khaubetna kammalte mah zangin kizui kawmin awngin kiko damdam uh hi. Tua panin tum theih teng khempeuh tumin a lawhsa kammal teng mah lo kik zelin khuatual (tualbiakna) ah pai-in thumvei mah kimvial leuleu uh hi. Hihpen dawi neng khau neng bang neng peuhmah om nawn kei hen a cihna uh ahi hi. Sawm tangvalte khua sung ahong lut kik uh ciangin meilah tum bang teng hong lutpih kik theilo uh hi. Bang hang hiam cih leh, dawi nawhna lamah meilahte natwm nin bangin siangtho nawn lo dingin she uh hi.  Meilah tum bangte khuanawl singdawn, phungdawn peuhah siatin nusia uh hi.

                Mun khen khatah tua meilah atum bang teng kaikhawm uh a, meiphual sat uh hi. A khuatam theihtheih nangin sawlbawk tawh khuh uh a, meikhu a paikhiatna ding a laiszang mun khat vangsak uh hi. Tua munsan apan mikhu hongzam khiat ciangin siampipa in

“SIM KUM pha hen na cih leh simah kai in, zokum pha hen na cih leh zo ah kai in, Khai gui kha gah kong ngetna hi, Zo kum kon ngetna hi. Sim kum kong ngetna uh hi. Tang bem kong ngetna uh hi. Min bem kong ngetna uh hi. Cidam ludam,  kong ngetna uh hi. Tusawn tasawn kong ngetna uh hi. Khi awh pha tau bulh pha kong ngetna uh hi. Gal manglu sa manglu kong ngetna uh hi” ci-in phuisam hi.

Meikhu pen khua sung lamah a kai lehkuasung kicidam ding hi, ciin khang luimite in upna nei uh hi.

11. Khuailakna:

Kaubet zawh lamna dianna teng aman ciangin, akihawisa khuaibu ladingin sawm tangvalte kuan uh hi. Tua khuaibu leh anote omzia panin kum thak sungah ann leh tui kham leh khial, nat leh dam a kipan tuahsiat tuahphat ding kihilna in ngaihsunin aisanna in a kizang ahi hi. Tua hi a, khuailakna pen kithupi sseh mahmah hi. Khuado khuai lakte pen zu(khuaizu) a neinam hilo-in no anei nam, mi adih thei nam, sing tungahih kei leh lei sunga akai nam tunpi, leh ngaltun, ngalthen, kuaimul le khuaithumte khuaibu kila pen hi. Tuaciang in khuailakna ah zat ding khuang khat, sial ki khat, daktal a kipua zo zahzah, zubeel peng siatsa belkhat, khuaisah zu a vekin , phitbu akibawl zahzah, nang lukhu kikeng hi. Zan puan ding leh azing cianga kizepna ding puan akoihcingte zong pua uh hi. Khuai lakna a akikeng zu pen Khuaisah Zu kici hi. Zute pen Hausa pa akipan ham upate in beel khat ciat  asik uh, sawmtangval teng in zingsang lama adon, nitak lama akhiahkhoih uh zute hi.

                Khuai omna mun a tun uh ciangin khuai pen mei tawh kihal lo-in apiteng khut tawh khatkhatin manin ahih kei leh guataitep tawh tepin that khin masa uh hi. Khuaipi teng amat khit uh ciangin khuaibu pen akua ahih leh to uh a, apheng ahih leh phelkham uh hi. Khuaibu sungah a pheng dal sawm ciang bang pha thei hi. Tua khuaiphengte lak apanin ahoih a limci pen leh atak pen ciamteh uh hi. Tua bang a ciaptehna a bawl khit uh ciangin khuainote tungah saphuk;ai bang a apan dildel dam takin hawkkhia uh hi. Khuaino zawngkhal khempeuh zong paikhia in aetlawm lo khempeuh nul siang uh hi. Kum saanna ding khuaibu akisia lo dingin kang takin liakhia uh a, nang lukhu sungah koih uh hi. Hih khuaibu lakhiapa tualtekpa in thuneihna a piakpa bek hi thei hi.

12. Khek leh ni:

                Hih ni pen khuado ni nihna khekleh ni kici hi. Hih niin khuai tawh ai kisanin, nitakin annkuang sakuang ki-umkhawm leuleu hi. Zingsang khuavak tungin khuailate khuaibu tawh inn lam zuanin ciah uh a, khuasungah lut suak lo-in khawmualah kinga-in khuaibu tangpi tangta muh theih dingin sungkungtung ahkoih uh hi. Khawmuala khuailate neek ding dawnding khawsung pan nungakte in ann phel tunsa leh zu vapuak uh a, khuailate in khawmualah khuazangpi kim ngakna in la tuamtuam khuaila , mualbawl la, khuamualpi lae sain lamlam uh hi, khuazang pi a tun kim khit ciangin zu kitulh, ann kibaakin nuamsa mahmah uh hi. Tua khit ciangin tualteekpa in khuaibu sangin khuasung lutpih uh hi.

13. Khuai tawh aisan na:

                Khawsung a tun ciangin khuaitawipa mah masa-in khuaibu pen tual biakna munlam manawhin kipaipih leuleu hi. Tua muna ana ngak upate in, “sanno na hih leh nakik in, miim leh sawmtang na hih leh hong lut in,” ci-in na kal uh a, tua leh khuaitawipa in,” sanpi sano hikei ing, miin leh sawmtang hi’ng” ci-in tua banga thumvei akikalh a kidawn khit uh ciangin lutsak pan uh hi. (sanpi sanno cihpen natpi nat neu cihna hi ). Tual a lut khit uh ciangin vialkhat kimkotin hih bang in khuaila sa uh hi.

(A)   Ngaltun e, ngalthen e, khuai aw e, kalo pam a khuai aw e, sim ngalthen, zo ngalthen,

(B)   Nang in kum khua na thei a kong dong e, ningzu a ken dong aisa aken dong.

Tua khit ciangin khuaibu tualsuang tunga akicing mawngkung tungah koih uh hi. Khuaibu tungah khawlu lam, khaw tawn lam gitin ciaptehna kibawl a, khuainote paan honsa-in koih uh hi. Tua khuaibu numei naupang leh nuoi naupaite et kiphal lo hi. Nitak lam ciangin upate in khuaibu veel uh a, khuaibu sungah khuainote inn a akhuhna a paan ana lamkik uh leh miinbem tangbem alamlam hi, ci uh in, kumkik ciangin ann kihau ding hi, ci-in ngaihsun uh hi. Khuaino asi peuh a na om lehkum kik sungah asi amang om ding hi hang , ci-in khuazang mite maban ding hilhkholhna in ngaihsun uh hi. Upate in khuaibu sial leh pha leh, mipi lungnop theihna dingin “Khuai hoih hi” ci-in pulak ping uh hi.

Thukhupna:

        Zomite kumlui leh kumthak khenna , kumkhat sung tawntung ih sep ih bawlnate ah thupha hong guan ih Biak Pasian Kiangah lungdam kohna mailam adding thupha ngetna, siatna hon gtun theih dawi leh kaute tawh ih kipelh nang leh eimahmah ah ih hoih lohnate tek pana ih kisiansuahna ding hun thupi “Khuado Pawi” bawl pen Khristian ngeina leh Pasian deihna tawh kikingkalh lawmlawm lo hi, cih ih phawk thak ding deih huai mahmahhi.

        Khangthakte in Khuado Pawi ih zat ciangin, Ihpu ih pate in ih khanglui hun lai leh ih zo ngeina tawh kituaka a zat danuh kizang thei nawnlo hi. Ih theih ding thupi a ka ngaihsut pen Khuado Pawi ih zat ciangin Khuado Pawi a khitna leh adeihna ngaihsun in tua leh ih Khristian biakna leh tunhun tawh kituakinih omna mun tek tawh kituakin ih zat ding kisam sa ing. tuhun ciangin Zomite leitung mun tuamtuamah ki-om ta a, Ngeina kician neite-Minankician ih hih mah bangin ih omna tekah ih Zopawite khahsuah lo-in keemcingin, ih Zo ngeina ahi ih Pawi thupi Khuado Pawi ih thupit sak ding kisam ka sa hi.

Laibu etkakte:

1.       Ciimnuai Magazine 1994, Yangoon.          4.  Guite khangthu, Kalemyo, 1986

2.       Khanglui ngeina, Aizawl,1999                      5. Zolai simbu kum sawmgiat cinna, Lamka, 1993

3.       Zolai simbu (tan IV), tedim, 1997.              6. Zolawkta Oct. 1999 Issue, Aizawl.

Atei khia: Siam Khaute

2010