INNKUAN BUAI THEIHNA THUBULPITE

 

INNKUAN BUAI THEIHNA THUBULPITE

By: Mang Tung Thang ( MIT, Insein)

1.Ei Innkuan masak loh man hi.

2.Pumkhat hihna a kinusiat khak man hi.

3.Siamna, Dikna, Nopna Cilzat luat man hi.

4.Itna man kha lo-in Ki-itna bek ih neih man hi.

5.Kilem ding sawmloh man hi.

6.Ngaihsut a kibat loh man hi.

7.Lunggulh kituak loh man hi.

8.Kithusim lohna leh kihawmtawh man hi.

9.Itna leh Ngaihna kipulak loh man hi.

10. Kam kup khopna atawm man hi.

11.Innkuan nuam ding gelkhak loh man hi.

12.Midangte tawh kithuah nopsak zawk man hi.

13.Kipahtawi theih loh man hi.

14.Innsung ah athupi pen zi/pasal akithupit sak khak loh man hi.

15.Innkuan annek khopna atawm man hi.

Innkuan ih cih pen pawlpi sung, veng sungah a thupi bulpi hong suak ahih manin innkuansung kilemin daihna a om ding ilunggulh penpen ahi hi.

“Kitang neilo napi-in kilem het lo” cih pen innkuan sngah a kiphu kha thei thu ahi hi. A pua lam pan en leng ahoih, akilem tawh kibang napi-in a thuakta dingin ha natna tawh kibang thei hi. Tua thute a ven theih kei leh innkuan buaina tawh kizomto thei hi.

INNKUAN SUNG BUAI THEIHNA BULPI 15

1.Ei Innkuan masak loh man hi.

Midangte hong pahtak zongin I buai manin mi’n hong pahtak hangin I pasal/zi pen a nalungdam thei logige ahih lam kiphawk kha lo hi.

          Tua amanin innkuan bulphuh lo nupa kalah buaina tam thei mahmah hi. Buaina aveng ding zong baihlo hi. Tua ahih manin Pasian ih um kei phial zongin ei innkuan mah a masa a thupi pen a koih ding na hi gige hi. Innkuan lungkimna a om khit the midangte ading: kalsuan ding pen anihna hong suak ding hi. Tua hi leh kitelkhialhna hong tawm ding hi.

2.Pumkhat hihna a kinusiat khak man hi.

          Nupa pen pumkhat ahihna a kinusiat ciangin innkuan sung buai thei hi. Nupa pen nih ciangin pumkhat asuak ahi hi. Nupa kaalah KEI cihna a om leh khat hi lo-in alang bek ahih manin a hemsuakin meel hoih nawn lo-in buaina kipan thei hi. Nupa cih pen NANG, KEI cih a omthei ding hi lo a, EI kicih thei ding thupi hi. Pumkhat hihna nusitna in innkuan sung buai nading kipan sak hi.

3.Siamna, Dikna, Nopna Cilzat luat man hi.

          Nupa suah nading hong khih lingleng khat om a, tua in hong kheng sak zo lo-in nupa akisuak ahi hi. Na zi/pasal in nang tung ah khenlah khat anei na hi gige hi. Midangte  ipiak ma-in I zi/pasal tungah ih siamna, nopna, diknate suahkhia-in lui masa leng I zi/pasal in nuamsa mahmah ding hi. tua ciangin nang tawh kiten khak hampha lua ing kicici-in innkuan nopsakna kidim ding hi. Tawmvei sung ih kithuah pih ding mite sang khantawn kituahpih ding innkuanpihte Siamna leh Nopna tawh phungvuah huai den hi.

          A innkuanpihte in Ka lawm Siamna, Dikna nagengen uh hangin ko theikha kei ung e, acih lohnadingin innkuan suang mah ah pat masak ding a phamawh mahmah ahi hi. Tua ih neih khinkhian siamna, nopnate ihkipiak khak loh ciangin buaina hong piang thein a hi gige hi.

4.Itna man kha lo-in Ki-itna bek ih neih man hi

          Nupa apiangsak, a kitengsak itna pen kum hong tam semsem the hong peng pianin, kicimtak pianta uh hi. Ki-itna (Iloveyou) in ait leh bek itin, Itna ( God is Love) in a it lote nangawn it hi. ( Zolai tawm tawm hilhcian leng) ki-itna ciang bekah kinga-in itna ih muhban kei leh kikhen ding zong haksa kisa lo hi. Ki-itna hong picin ciangin ITNA kip hong suak hi. Ki-itna bek tawh ahih leh kuanmah kimaibiak nuam nawnlo tuak in, ki-itna hong kikaak, kihal semsemin a tawpna ah buaina hong piang thei hi. Ahi zongin Itna anei mi-in kikhen ding ngaihsun zo peuhmah lo ding hi.

5.Kilem ding sawmloh man hi.

          Innkuan kilem ding pen kikup akul hilo-in khensat ding hi bek hi. Kilem ding kihanciam peuh leh thusia pen na kinkin lel ding hi. Kitawg kei peuh leng ahoih bangin kingaihsun khathei a, (kitot lohna pen kilemna kisa kha) kilung nopmawhna om sim thei hi. Tua kilemna in ih inn nuam hong sasak ding a, mundang kilunggulh lo ding hi. Kilungleng lo ding a, tua kilemna in itna tawh hong khihkhawm ding hi. Tua bang ahih loh ciangin innkuan sung kisongsawlawi thei hi.

6.Ngaihsut a kibat loh man hi.

          Ka lawm pen ngaihsut nabang het kei ei, ci-in lungsim sungah a kici giugiau thei ahi hi. I lawm deih (pahtak) nam I sep khak ding kisam mahmah hi. Khat in a lawm deihte masak lo-in ama hoihsak bangin a sep ciang, amah lah gim kisa mahmah, a lawmin lah thupi na salo thei a, tua bangteng panin buaina hang khang toto thei hi.

7.Lunggulh kituak loh man hi.

          Khat in nasep thupi sakin, Khat in kamkhum tawh kihona thupisak in, athupit sak akibat loh manin buaina hong kipan thei hi. Mi pawlkhat inn nupi/papi hi-in nasep bekbek thupi sak ahih manin a innteng (sawltak) I sak khak om phial hi. Tua bang a ih duh ih deih akibat loh ciangin zong sauvei leh nangkai kisa kha thei hi. Kitel siamna a om masiah buaina tawmtawm a om kiukiu ahi hi.

8.Kithusim lohna leh kihawmtawh man hi.

          Apasal/zi thusim masak pen ding hi napi athusim loh man leh hawmthawh khak manin innkuansung buai ding hong kipan thei hi. Kiteng khin cih nungsangin Kithusimna a om ding kitangsam hi. En thusim kei leng hong thusim sak ding tawm mahmah kha ding hi. Kilangpanna cihte zong om thei a tuate ih hepkhiat zawh ding thupi hi.Mi hong gawmtawm a kiteng cih lah hilo ih hihmanin  ih thusim ding adang himasa lo-in ih zi/pasal bek ahi hi. Zi/pasal vai thupi tawh aciahhak ciangin nalupsan, gim piana hawhna pan hong ciahciangin donlo a om cihbangte panin kikhasiatna leh Kam kilawm lo kipau thei hi.

9.Itna leh Ngaihna kipulak loh man hi.

          Zomite phadiak pen kiten khit teh itna, ngaihna cihte kipulak kik a kul dingin kingaihsun nawnlo mawk hi. Mi gen ka zak khat pen Zomi numei khat mangte tawh kitengin a pasal in nikhat a tawmpen khatvei “I love You” hing ci-in, tua hikei leh kikhen ding ci hi. Nikhat alawmnu in cikha lo ahih manin kikhen ziau ih kici hi. Zomite in hong it, ngai ing cih pen cilzat huai lua lawmlawm hihang, cizat huai lo hi. Khat vei kicih khantawn man sawm huai nawnlo hi. Nisim ki-itna thaksuak sak den ding kisam hi. Tua ahih kei leh Hong ngailai tei mah ahitam maw cih kilungngai, lunghiang thei a, athu hoih lo-in hong nungzuih thei hi.

10. Kam kup khopna atawm man hi.

          Khat leh khat kam kupna aom mel lo, hawhna ciahna zong kithei lo a omna pen baina kipatna hi thei hi. Tua ban ah kikum sunsun leh zong kam kidawn lohmanin kithadah suak thei hi. Tua takteh ei thu tekin kipai-in kilem thei mahmah lo a, buaina kipan thei hi.

11.Innkuan nuam ding gelkhak loh man hi.

          Mi pawlkhat pen kum sawtpi nuntak ding zong ut khol lo hi. Tuate pen en pak leng innkuan sung nuamsa khol lo hi dingin upmawh huai hi. Innkuan sung nuam a sate pen si nuam nawn lo phial uh hi. Mi kimin ih neih innkuan suangah a om thei ding nopnate seelin nop mawhnate thu ih neihsak ciangin nopna pen na kihemkhia thei hi. Bang hun ciang zatding ahitam ihsiamnate innkuan sungah kizang lo hi, si pak kha leng bangcih ding! Innkuan pihte khualna in ihsiamnate sitlo in zat huai hi. Innkuan Nuam suah ding thupi a koih masiah kinop mawhna in hong deep thei hi. Innkuan nuam suakding kimlai Innkuan buai kisuak thei hi.

12.Midangte tawh kithuah nopsak zawk man hi.

          I innkuan pih tawh kithuah sangin midang tawh kithuah pen hong nuamzaw thei mawk hi. innkuan pih ten thanemna hongkawk thei in, midangten ih hoihna hong pahtawi-in  hong lungdam sak thei ahih manin,  midang tawh kithuah anuam zaw hong suak hi.Tua nuam ih sakte tawh kum tampi kithuah leng akicimtak ding ih hih lam kiphawk kha lo thei hi. Mi pawlkhat midang tawh kithuah leh nui zuaizuai napi-in inn sung ah mai gum ngeungau thei hi. Inn sung ah nuih ding akhak khat omleh kilawm hi. Tua bangin midang tawh nuam isak zawk ciangin innkuanpih tawh kithuah ding lunggulhna kiam ahih manin buaina kipan thei hi.

13.Kipahtawi theih loh man hi.

          Innkuan sung ah asiamte  a siam bangin ih kipahtawi siam kei leh khasiatna om thei, kilungnopmawhna om thei hi. Nuam hun ciangin kinuampih thei-in dah hun cing zong kidahpih theih ding thupi hi.  Ei innsung pen midang innsung tawh tehkak khak ding zong hi lo hi. Khat veivei kiphat thei le hang zong aheh omkhol lo ding hi. Midangte zong lungdam sak thei ih hih leh sawm peuh le hang Innkuan pihte lungdam, lungkim sak thei kihi hi. Khat leh khat kipahtawi in  kiphat kei le hang utlohpi teng piang thei hi.

14.Innsung ah athupi pen zi/pasal akithupit sak khak loh man hi.

          Nupa a pil/siam ta kei zongin tua innkuan sung a dingin athupi pen ahi hi. Na innkuan sung ah athupi pen dingin midang napahtak khat kikoih thei lo hi. Innkuan sung ah athupi pen in Zi/pasal hi pah hi. Zi/pasal lo in ma kinawt thei lo hi. Tua lo-in ma ih nawt khak ciangin athupi pen ki-awlmawh lo cih suak ahih manin tangtel sihtan abang om thei in buai ding hong kipan thei hi.

Innkuan sung tate hoihna ding ih deih leh Zi/Pasal kithupi sim mahmah ding kisam masa penpen hi, hih pumpi khat pen nih asuah teh nadang teng apai dan dingin pai thei lo hi. Motor tawh kibang hi a, apei lang khat hoih lo tawh gamlapi kitung lo in buai na kipan thei hi.

15.Innkuan annek khopna atawm man hi.

          Innkuan thunget khop, lasak khop cih khawng a nuam mahmah khat ahi hi.  Tua ban ah innkuan an nekkhop thupi sem hi. Tua ban ah nek kibang ding, gimnam kibang ding zong thupi hi. Vai thupi nei lah hisam lo innkuan an nek kingak mel lo cih bangin a om ciangin innkuan lungsim kihual thei lo hi. Innkuan sung ah nipi khat in khatvei zong thunget khopna , an nek khopna a om loh takciangin mapan khop hong tawm ahih manin thu leh la kitukalh thei hi. Innkuan lutang Muhtheih pen PA hi-in, muh theih loh pen PASIAN ahi hi. Innkuan in Pasian tawh vai kihawmkhawm ngeilo ahih manin asawt2 ciangin buaina lam manawh ta hi.

Thukhupna

          Atawpna ah mi hoih suahding bek kingaihsun thei in, Nupa hoih suah ding kigel lo thei hi. Nupa hoih hi leng minuamsa, nupa nuamsa kisuak in innkuan nuam sa kisuak ding hi.

          Electric mei pen Nu leh Pa in na asepkhop teh mei tangin khuavak hi. Ahi hangin tuate gel kizom khial leh meikuang in Inn kangin lauhuai mahmah hi. Tua (+)leh(-) in na zopna aman ding, na sep khop theih ding thupi mahmah hi. Nasem khawm leh na lianpi sem zo hi.

Tua hi a Innkuan nuam suah ding, ileitung tomvei nuntak sungin a thupi pen leh vangam malep bang ahih manin innkuan sung nuam sa-in ki-iplahin kilemna, pumkhatna tawh I innkuan lamzawhna dingin I kideihsak pen thu ahi hi.

Kawlte in Innkuan pen (eng-Thawng) acih zah khat un Nuam asalote adingin Thawng(jail) hi thei takpi a, Nuam asate adingin Vangam malep asuak thei lua ahi hi. Cilbawl lo-in ih siamna, ih diknate innkuanpihte adingin pia mengmeng ni. A mau hong lunggulh pi pen tua mah ahi hi. nupa suaksa kikhen ding pen pammaih lua ahih manin ki-itna en itundong delhni, kitelsiamna tawh inkuan nuam asuak dingin Topa itna thupha I kipaih hi.

          Innkuan nuam suah ding deihsakna tawh, Topa thupha.

June 22016

 

 

NGAIHSUTNA BEHLAP NI! Sia. JM Paupu

 NGAIHSUTNA BEHLAP NI:

J.I. Packer in, "Tulai biakinnte ah mite' nopsak nading kilim ngaihsut lua ahih manin "Tuilum sung kidiah biakna" (Hot-tub-religion) tawh kibang hi. Mi hong kikhawmte'n nuam sa khia mahmah ding uh a, ahih hangin kikhelna om lo hi," ci hi.

"Tuhun Pawlpite ah kikhelna (conversion) vai pen Psychology in khek khia hi. Tua hangin kikhelna om loin, ngaihsutna damsak i sawm uh hi."

"Kammal zat siamna, thugen siamna kicite kha-mi (spirituality) hihna hi lo hi. Thu hoih la hoih gen ziahziah theihna zong na hi masa tuan lo hi. Ama gamtatna in a zuih kei leh amah leh amah kikhem ahi hi." Jackie Hill Perry.

"Dawimangpa in zong Lai Siangtho deihna mun na nei a, Late 91 sung zangin Jesu na khem hi."

 

"Moses in a mi Israelte a muhtheih loh uh Pasian musak a, a muh nailoh gam uh musak hi," Rev. Dr. Khen Tombing.

"Leitung vai pen a nuihzakhuai hun zong om hi. Na huang sungah diamond mu leteh kumpi aa hi dinga, ahi zongin drug kimu leh nanga hi ding hi"

"Na kamzat (pau) pen Mother tongue "nu' pau" kicihna a hangin insungah pate'n pau hun ding ngah man mello uh hi."

Sia JM Paupu

ITNA TAWH KITEN KHIT CIANG

 

#ITNA Tawh KiTen Khit Ciang

💞Itna tawh pum khat ih suah khit ciang in ngim na le tup na zong kisam lai hi.

     Nupa in ngimna tupna, na neih tuan kei le nu pa kal ah kihawm thawh na om thei ve ve hi.

💞Itna tawh ih kitenkhit ciang in nek khawm dawn khopna zong kisam hi.

     Nupa hih khit ciang in an nek hun kiton lo cih zong om thei aa tuate in nupa kal hong susia thei lai hi.

💞Itna tawh kiten khit ciang in sepkhawmna zong kisam hi.

     Zi bek" in sem,pasal bek" sem cih bang hi thei lo aa nupa aa ih sep khop kei le kineumuhna zong om thei hi.

💞Itna tawh kitenkhit ciang omkhop ding zong thu pi hi.

     Nupa hih khit ciang in nupa ki khen,kigam la leng kikhenna piang thei aih man in nupa omkhop den ding zong thu pi hi.

💞Itna tawh pumkhat suah khit ciang in kitheihsiamna le kimaisakna zong kisam hi.

     Nu ih hih khit ciang in ih hat loh na,ih damlohna,ih kicinlohnate ih kimaisak zawh kei le nupa kitotna piang thei lai hi.

💞Itna tawh kitenkhit ciang in kithupit sak na zong kisam lai hi.

     Kiteng khin lel hang ci in kinawlkhin ding hi lo aa kinek sem" in ih zi ih pasal mah ih thupit sak ding kisam hi.

💞Itna tawh kitenkhit ciang in  kiniamkhiatna zong kisam hi.

     Nupa ih hih khit hang in kinial nawn lo ding,kitawng nawn lo ding cih hi lo aa nupa ih hih khit ciang in kingaih lai sang in kiniamkhiat zawk ding hi lai hi.

💞Itna tawh kiten khit ciang in han ciam na kisam lai hi.

     Nupa hih khit ciang in nu pa kithutuak aa inn le lo ding,nek le dawn ding, puan silh nik ten dingte ih nupa aa ih hanciam khop ding kisam mah" hi.

💞Itna tawh kiten khit ciang in cil dan,zeksiam dan zong kisam hi.

     Nupa ih hih khit ciang in ih nek ih dawn ding ih zon kul aa sum le paaite tha lawh kul aa tua ciang in sum zat siam na,ciltheihnate hong thu pi mah" ding hi.

💞Itna tawh kiten khit ciang in kihehpihna zong kisam mah" hi.

     Nupa cih pen mi 2 pen 1 hi ta ahihman in khat sep zawhte sem khawm aa,khat puak zawh lohte pua khawm aa khat thanemnate ih kitha piak ding kisam mah" hi.

💞Nikhat niciang

                  Page. Follow. Share. Like credit: 

USA PRESIDENT BIDEN IN A AWTPIH CHANGE

 new CHANGE: 

Nuta khat East County Health Office, Portland, OR ka paipih hi. Zunsuak uh ahih manin Numei zunbuk ah lut uh hi. A pua pan ka ngak hi. Pasal khat hong paiin tua numei zunbuk ah lut a, nopmawhsa in kongkhak hong in ka gal-et leh cubicle dang khat ah lut bilbel hi! Numei-Pasal in zunbuk zangkhawm thei cih US ah ka muhcilna hi. Obama in ‘change’ acih duakduakte hitah maw ka ci hi. Change pan ‘chained’ lam manawh ahitam kacita hi😎

Biden i nasep khit khat: Pasalte in a ut uh leh ‘kei numei hi ing’ ciin numei lak ah kihel thei ding ci... ahahaha🤡

Na pian in pasal in na pian hang na ut hunhun in ‘kei numei hi ing’ numei ut ing ciin ‘ana’ a khek loh hang amah a kicih dandan i sanpih tek kul hi. Gentehna in Biden in a sawtlo in ‘kei numei hi ing’ hong ciin nik hong teng seksawk sehsuah leh ‘himahteh’ i cihpih kul hita mawk hi. Khasiat huai. 

Nausuak thak: 

D. Na nau min uh bang phuak nai vua?

Dn. Phuak nai kei ung e.

D. Bang hanga?

Dn. Kum 18 a phak ciang numei ut ding maw pasal ut ding kithei nailo a😀

D. Ha ha ha....

America ah Pasian thu a kip kei leh leitungbup ah Pasian thu kiplo semsem ding hi. Pasian it takpite adingin tua pen na ngaungau hi. 

Pasian it masa khollo a US dollar zut hialhial peuh leh a lungkim khinte adingin Pasian thu a kip ding, a bit ding thupi masa khollo mah ding hi.

Pasian thu bulphuh leh Thuman thutak tawh a kipattah khollo, sum ngah nang hipeuh leh ‘a siangtho kisam kei’ aci te adingin a ut peuh in a ut bangin kumpi sem leh phamawhlo cikha ding hi. Ahi zongin siangtho taka innkuan kipattahte in ahoih pen mah deih ngaungau uh hi.

Sia. Dr. Cin Suante

ZOMITE IN ZOMI, ZOLAI, ZOGAM ITTAKPI MAH IHIAM?

 #ZOMITE ( Welcome to Tedim )cih ding na ngawn haksa sa zen mite in Airport na ngawn ah Kawllai palo phial in hih lel veh aw! Lungsim puakziate khel huai!

Hakha Chin State khuapite hih dan etteh in cing lel vua Welcome to cih vai akipan! Biden te pawl danin midangte khualna in pillo ding in Eileh ei kikhualna nei masa ding, Trump dan a ei kikhual masa ding! Anuai a lim mante enkak ziau vua

Eilehei kikhualzo lo pi midang khual dai2 inn guan hahlo gamguate kinzaw!!!

#Hong gelhkha ing sorry!!

Zomi kici buang Zomi Zolai Zogam it bek vevua

Keukhat pan Siam!

ZOMI THUKHUAL DAWI PAN SUAKTA NI

 ZOMITE THUKHUAL DAWI PAN SUAKTA TA NI!

#Khangluite'n agen mun mahmah uh thukhatin banghiam cih leh, (thukhualdawi)cih pen ei Tedimgam a Zomite'n naakzat lualiang hangin tuain supna ong piangsak mahmah hi.

Tedim vaimuakna kongpi pen ZOLAI tawh hoih takin thu neite'n nong gelhphat na dingun zahtaakna tawh kong pulak hi.

#THUKHUALNA_PEN_KIZANG_KHIAL.

1. Zomite ulian,milianin iom teh thu kikhual sak lua-in, tuain ih MINAM sungah supna tampi ong pia hi.

2. Zomite kumpi sungah ulian,zalian,thunei ki om napi'n,MINAM adingin sepkhiat tam hetlo mawk hi.

3. Zomite kumpi sung panmun tuamtuam ah ulian,zalian cihte ki om na pi'n, Zomite adingin bang na semkhia hiam? Thukhualdawi in ong khiimcip hiam?

4. Minam dangte'n Zomite ong khual hetlo napi'n,Zomite'n Minam dangte kikhual mahmah vet se hi. Tuain bang hiam cih leh na khat pepeuh ihsep ihbawlteh Minamdangte'n sim theikei khaleh, Minam dangte'n ihpau thei kei khaleh, Minam dangte'n ihlai thei kei khaleh, Minam dangte'n ka min ong sam thei kei khaleh ci-in, Mangmin peuh, kawlmin peuh athupisak ziauziau Zomite ihihi.

#Tedim pen Zogam khuapi khat hi a, banghang en ei lai thupisak lo ihiam?Minam dangte ong pai-in, Zomite lai in gelh un ong ci ngeilo ding ahih manin,ei Zomite mah in ihlai,ihpau ih ngeina cihte ih thupitsak kei leh tua in supna lianpi ong pia hi cih ih phawk ding ka ut mahmah hi.

Ih sanggam lamte'n amau lai bek thupi sak uh in, akhua sungvuah amaulai tamzat mahmah uh hi. Mite'n vanlengkuan nangawn ah amau lai-in gelh lel uh hi.Zomite aw khanglo nailo lailai ding maw ei, thukhualdawi kikhimkhim sak lai ding maw?

#Kumpi sungah kum30,40,50 cih bang asepkhit teh minsiatna om loin pension la hi cihte ahoih mahmah tawh akibat hangin, ko na Zomi pihte uh sum'mahmah hi-ung, banghang hiam cihleh ULian khatin nong om sungin na MINAM ading in bangmah sem ngamlo na hih man ahi hi.Nang leh na innkuan in bel nopsa bilbel, tua ciangbek maw na thu neihna na zat sawm? Lawmlawm cia.kiawi sam ciau.

#Zomite sungpan hih thukhualdawi hemkhia in, eileei ki thupi simin, kalsuanin nasem ta ni. 

#Tedim, Tonzang, Cikha cihte ah Zolai hong tamzat mahmah ta un maw. Tua-in ihpau,ihlai ihkepna hipah ahi maw.

Minam (Zomi) Veina tawh kiukhat pan kei mah:

Khualpu Zomi.

KA TUAH THUTE (4) Evan Do Khup

 THAN THAN OO, ZONG TAKTAK TA

11.1.2021 (Monday) 

12:30 PM 

hunin Pastor Rang Vum phone ka set a, Cia-En (ကြာအင်း)te na meltheih om hiam ka cih leh “Thei kha kei mai veng aw Sia” hong ci hi. 

12:37 PM 

ciangin Rev. Daniel Khen (Agape) phone ka set leh phone nambat kizang nawnlo kiset thei lo hi.

12:38 PM 

ciangin a tapa Pastor Khaipi phone ka set a “Na pa tawh hong kihosak ve” ka ci hi. 

Daniel :👨‍⚕️:Daniel Khen hing ei Sia Khup 

Khup: 🙏  "Dam maw Sia. Thukhat hong dong nuam hiveng, na behte Pu Thuan Sum a cihte na thei kha zenzen hia?"

Daniel:👨‍⚕️: Thei mah ing amah si khin ta a zi bel a dam lai diam maw? Letpanchiaung ah teng uh hiven.

Khup: 🙏 "Aw lungdam lua, phone ka set theih nading  khat hong vaihawmsak ve maw."

Daniel:👨‍⚕️: "Aw aw hong kansak pah ning ei maw."

Lampi khat hong kihong pian ahih manin lungdam lua, ngaihsutna bel hong tam to hit-hit a, lunghimawhna zong hong lian semsem hi. Lungdam leh dah ka thuah mawk hi. 

Ka zak theih ding thu nih om hi. “Than Than cidam mahmah ei, a lawmte zong hong phawk mahmah ei” cih za dingin ka kingaihsut ciangin Sia Daniel phone hong pai ding ka ngaklah mahmah hi. Ahih hangin “Than Than Oo leitungah om nawn kei mawk ei” hong kicih khak ding zong ka dah mahmah zel hi. 

Tuni ka om nuam mello ahih manin lupna ah ka lum hit-hiat a phone hong gin ding ka ngak ngak hi. 

1:03 PM 

ciangin phone hong ging takpi hi. Than Than thu nahi nai loin Rev.Thang Kim kiang pan nahi zaw hi. “U Khup aw, a thupi mahmah lai pen va la ta ing kei khut sung hong tungta ei” hong ci hi. 

*(Ka pianthakna ka Kha Pa ahi Dr. Khe Kung 👨‍🎓 in hong hopih a, “Kei na Pa ka kum tam ta, ka cidam nawn lo hi, kei kiangah nang ading lai thupi mahmah khat om a, ‘hong la in’ kong cih zel hangin tu dong nong la kei hi. Kei si leng hih lai leh na Pa mangthang khawm ding hi” hong ci ahih manin ka Kha Pa ka zahtakna-in kin takin ka laksak pah ahi hi.)*

“Lungdam lua ei Pu Kim hong buaisak zel ing ei” ka ci hi. “Kei’ mawtaw bawlsak kahih ciang a mawtaw ding om pak lo, na tuan zel ka lawmpa U Pau mawtaw tawh va la ing” hong ci hi. Kei guak ka nui khuut-khuut hi. 

Nungdeuhin Pasian nasep zawh kum 30 cinna ah Sia Do Khup’ thanemna gen dingin ka sawl lai-in, “Na, gen khol ngeilo, ei lam lem maw lem lo cih hong dong masa lo” a cih ka phawk hi. 

A tuaci phitphit Sia Do Khup pen Pasian in, a hehpih ding a vaite a vansak ding, ama mite thupia toto ahih lam ka phawk a Pasian hehpihna ka phat hi.

4:29 PM

Phone hong lut leuleu, dip kua vat leuleu. Sia Daniel nahi loin tulaitak a ka buaipih ka lawmte khat ii vai thupi mahmah khat nahi zaw hi. Hih bel a min kong gen thei kei hi. Pasian min tawh hong muang mahmah ten a innkuan sung thusim hong kuppihte uh kuama kiangah ka gen sawn ngei kei hi. Hong theisiam un maw lawmte.

7:06 PM

Ka monu Huaipi in “Pa ka Nu tawh nitak an ne ta vou leh” hong ci a, an ne in ka tu uh hi. Khuata mipa kahih manin gamsa ka duh a, Sakhi sa leh Ngalsa ka nei zel uh hi. Huaipi in Sakhi sa a niipin hong kansak ka nek laitakun phone hong lut a, ka lamet-et Sia Daniel nahi takpi ta hi. “Bang thu hong ging zen tam maw” ci kawmin ka khut zolpi tawh ka len pah samsam hi.

Daniel:👨‍⚕️:“Hallo Sia khup maw” 

Khup: 🙏“Himah ing ei Sia.” dipkua lua hita, pukpukpuk himai.

Daniel:👨‍⚕️: “Phone set thei ingin Pu Thuan Sum lah si, a zi zong si khin ci mawk ei Sia Khup”

Ngaihsutna hong kidang diaiduai peuhmah hi.

Khup: 🙏 “Tua aih leh Sia aw, a thu pen hong siang gen ningin amau nupa tawh kimu nuam hi kei zaw ingin, Cikha ah Kumpi nasem a hong om lai ua, a ompihnu uh Than Thang Oo kici numei khat a zong hi ung, a sangkahpih a lawmte  pawlkhat in a thu thei nuam lua hi ung,  kum 36 bang ama thu za kha vetlo, a sih a hin thei nuam hi ung” ci-in a thu ka siang gen ta mai hi.

Daniel:👨‍⚕️: “Tua aileh Sia Khup a naupa uh dam lai-in tua phone ka ngah nading hong hanciam ningin hong zasak kik ning maw”

Khup: 🙏 "Lungdam peuhmah ing ei Sia, hong buaisak  peuhmah ing ei."

Daniel :👨‍⚕️: "Ki-ngah lua ei, Sia Khup, a beisa thute hoih tak a na kan pen thupi kong sakna hizaw ei”

Tuni bel hih teng tawh Than Than vai man phot hi. Muh mateng zongzong kankan lai ni maw….

Lailunggelna bang zahna tawh hong kituak zen tam maw….?  ngak lai ni maw lawmte.

Tangthu luite kan kikin Topa hoihna a mu zel;

Khup

Khuata mipa