NUNTAK GIMNAM By: Muana Khuptong

NUNTAAK GIM NAM

Leitungah inuntak sungin nuntak gimnam I cihte leh minthanna, vangneihna I cihte pen, sepgimna tawh thaloh kul na hi mawk mate, guai? Ahihhang, gim leh tawl a om tawntung ding cihna bel na hi hetlo zel hi.

Ahang bel, thupha I cihte pen sepgimna leh hamsatna I tuah lai nangawn in zong na om hi vaw. Pawlkhat te in, sepgimna leh hamsatna I thuak khit dikdek ciang bek a thupha kingah ding sa kha, na hilo, hamsatna I thuak laitak nangawn a, thupha, lungnopna tak tak aki nei thei na hi mawk dih zen hi vaw! Chepteh ding a hoih khat, tawldamna leh khamuanna tak tak pen, sepgimna, thalohzawhna, kuhkalna khit ciang a om na hi mawk hi.

I Topa Jesuh in bangci gen hiam? I cih leh, “Na semin vangik pua-in a gim mite khempeuh aw, ka kiangah hong pai ta un. Note tungah lungsim tawldamna ka hong pia ding hi. Keima hakkol zamin kisuan un la, kei kiangah hong kisin dih un. Kei pen kiniamkhiatin neem hithiat ka hih manin ka kiangah na tawl uh a dam ding hi” (Matthai 11:28-29) ci in ong cial hi. Na ngimna thakhatin lawhcing pah kei leteh zong, kipan kik in la, lungkia ken, na puuk khak leh zong thokik inla, ding kik in. Mihingte zankhuamial sunga khuavak nuai a nuamtaka I nuntak theihna ding a mihaipa cih ana thuak ngam pa Thomas Alva Edison in electric meivak a bulb a bawl lai tak in 1000 vei na lohsam khin hi. Enbel 1000 vei val tak na lohsam (unsuccessful) I cihlai in amah Edison in bel, “Electric bulb sunga meivak bawl na ding a vanzat ahi tua filament tul val te pen, kizang theilo ahih lam ka mukhia hi” na ci leh dih hi. Lawhsapna a tuat deksuai lo in, kisinna tentan dan in na ngaihsun lel dih hi. 999 vei a sin in na lungkia zen zen leh tuni dong in meivak ki nei nailo kha thei hi. Sawltak Paulu in “Cihmawhna leh cihtheihna a sinsa ka hi hi. Tua ahih manin ka hau a ka zawng zongin, ka vah a ka kial zongin, koi mun koi mun hita lehah a lungkimthei dingin a kisinsa ka hi hi” (Phil 4:14) ci in na gen hi. Lungkia ngei peuhmah loin nungkik ngei lo ding hi hang. Edison in zong nikhat nai 24 mah nei a, en zong nai 24 mah hun a nei hi hang. Zing ciang kipan ning ci lovin, na hoih sep tu mah mah in kipan pah tengtung in. Hun awng free time zat hoih sawm ken la, na hun neih khempeuh ahoih in zang mai le teh nuntak gimna na lampi a apai na hi pah lel hi.

Kamphatna hiam, ahih kei leh thupha I cihte thakhatin neih sawm pah kei in. Thupha detdo, thupha tak tak pen ahih leh ngimna kician leh sepgimna I neih khit tak cing in tua thupha ten ong nung zuih a, khang tampi daih in kicing hi. Zankhat a hauhpak na khong leh thupha “luita khan” I cih te khong pen kiam pah a, khang khat zong daih zo lo hi. Ngimna leh kisak kholhna hoih tak nei mahta se le cin zong sepgimna in a zuih kei leh na sun mang/zanmang sangin zong thupi zo tuan khol lo kha maithei ding hi. Mikang ten zong, “luck happens when preparation meets opportunity” na ci uh hi, maan mah mah hi. Mihau leh mipil I cihte zong mithuak zo te, nasep hanciamte leh micitak te na hi hamtang mawk hi. Tumging (music) tum siam mah mah a minthang mah mah Beethoven kiangah nupi khatin, “Kampha si cia, hampha lua teh, tumging music siam lua teh, keizong, nang bang a tua bang siamna nei leng ut sam ing ei” ci in gen a, (Beethoven a bil ngong ahih manin khua za pak pak lo hi) “bang e na gen” ci in a dot kik kik ciang in a bilbuk ah tua numei nu in va gen a, a zaak tak ciang in, aman tua numeinu kiang ah, “Topa thupha talent zo hi mah, ahizong in, kei hih dan in nikhat in nai 8 sung kum 40 sung tum in practice le cin siam lel niteh” cih san ziau hi. Leitunga milawhcing leh hampha I sak, I en mah mah te sep bangin sem leng thupha a kingah ding hi mai veh aw. Pilna nei I cihte pen mi lungkia ngei lo ten a hi mawk hi. Paunak 24:10 “Haksatna na tuah ciangin na lung a kiat leh a ginalo mi na hi hi” ci in na gen hi. Thupil khat in “mi meidoi te a sihma un tamvei pitak a si uh hi” ci hi.

Zomi siamsin sangnaupang te aw, hahkat ciatin I mai a I tuah ding thupha te lametna tawh en kawm in lungkia lo in lai hanciam ciat ding hi hang. 21st century ah omta ihih man in nisim nuntakna pen competitive ki demna sang mah mah ta hi. Pilna I neihna ding in laisim hanciam kul a, nasepgim komin zong pilna ki zong thei hi. Lungkia ngei vetlo in pilna sin ni. Lungke lo a, I sep nak leh payday lohcinna hun ong tung ve ve ding hi. Pilna leh hauhna thupha I neih theih ciatna ding in nahoih sep cimtak lo in sem ni. Laisim hanciam ni. Galati 6:9 phok ciat ni “Tua ahih manin na hoih sepding cimtak kei ni. Lungkia loin i sep nak leh a hun ciangin thaman i ngah ding hi.”

Lungdam                                                                                                       Oct 5,2015

-Muana Khuptong

GAM DANG A TENG ZOMITE THEIH HUAI KASAK

GAM DANG A OM/TENG ZOMITE THEIH HUAI KASAK

17/18 century lai-in Englishte zong Zomite mah bangin Man leh Mual kipia in, Ngeina nei-in Na nungta uh a tua hun lai in Uzawte zahtakna, Nu le Pate zahtakna, Innkuan sung ki-itna tawh nungta in, Pasian thu tawh nungta in nuam nasa mahmah uh hi.

19 Centuary panin tuciang nuntakna ih et takciangin Ngeina cihte leh Man leh Mual cihte Na beisakin Freedom cihtawh na kal suan uh a, Nupa vai ah Ui leh Ak bangin kimuh phetin taksa utna tawh kidelh pahin Kizui ziau, nihthu kimna tawh kalsuan ziau, leh ngeina cihte om nawnlo in, Kizui pah Kikhen pah in Ganhing bangin nungta ziau mawkta uh hi. Bang hang ahi tam? Ngeina leh Tawndan hong nusiat vua kipan hi ci leng kikhial lo ding hi.

Zomite zong Mundang, Gamdang ah ki-om ki-teng ahih manin, ih ta ih naute Ngeina leh tawndan, Man leh mual, cihte akipan Ngeina tuam2 te ih hilh a ih pattah tangtang kei uh leh Nikhat niciang Zomite zong, Ki freedom sak nuam lua in, Nu le Pa thusim lo, Uzawte nauzawte zahtakna hong bei in, Ui leh Ak mah kibang thei ding hi cih pen muh kholh huai leh theih huai mahmah ka sa hi.

English-te zong A Ngeinate uh nusia in (I am) kei hi thei lel ing, suahtak nopna tawh kalsuan in ah om uh teh Ui leh Ak bang, Ganhing bangin Nungta in Nupa kal Paten tate, Tate Nu le pa ki-itna, kikhualna hong bei hi.

Zomi-te zong ih pilvang mahmah kei leh Tua bang nuntakna Ih Innkuan, Community sung ah hong tung tham ding, mizia azui pahpah nuamte hi lai sawnsawn ih hih manin Ta leh Naute hoihtak in Ih lai, ngeina leh tawndante hilh tang2 English dan cilo in Zomi dan ih cih tang2 kul ding hi. Apua lam ah Midangte dan in om lua mahmah ding ahih manin Ih innsung, Pawlpi sung, ih Society sung ah eidan in ih uk control ding kisam ka sa mahmah hi. Bang dan in hilh ding hiam? Or kipan ding ih hiam?

Biakinn ah Sunday School ah Hoihtakin Eidan lian mah zuisak tangtang in Zolai, Laisiangtho, hilh, sinsak, gelhsak, in Makaih tangtang ding hi hang, English dan hikei, cilo in eidan in hilh ompih ding kisam hi. Apua lam ah eidan nak zat loh lua mahmah ding uh ahih manin Ei Biakinn ah eidan in makaih zuisak tangtang ding hi hang. Tua hi leh ei zia leh tawng, Dan leh ngeinate hong thei ding uh hi.

Nungak le tangvalte in Pasal Zi Mikang, Mivom, Misante tawh ih kiten zenzen leh Ih ngeina leh dante pulak tangtang in, Mopawi neihma in tuadan in kipi kikha cihte zang sak leng hoih mahmah ding hi.

Numei in Namdang Pasal na neih sawm leh UI dan le AK danin kimu a tonkhawm ziau, NU le PA thudong lo thusimlo, kipi NUman PUman cihte kinlo in kizui ziau2 lo ding hi hang. Na lawmpa Kiang Ko tuadan hi ung. Mopawi neihma in Ka nu le Pate tawh kimu in Lungdam koih leh NU man, Puman, etc te puan or Blanket  neng Piak kul cih pen thei sak in zui sak hamtang ding hi hang. Tua in Christian dan hi in, GANHING dan hilo, MIHING ih hihna leh Ngeina kician ih neihna kilang sak hi.

Pasalte in Mikang , Vom leh San te ih neih ding leh Mopawi ma in, A NU leh PAte koi ah om dong in kan masa in la, Mopawi ma in Nu leh Pate kiang ah Pai in, Lungdam ko in, Nu man, Pi man, etc, vapia in Zopuante mah vapia tangtang leng hoih mahmah ding hi. Tua in Ki-itna hong khang sak in amau zong tang lai a anuntakziate uh hong phawk kik mahmah ding uh a, Anuntakdan uh ahoih na leh Pasian hoihna hong muding uh hi.

UI leh AK danin kimu a na kiton pih ziau2 uh leh GANHING dan mah in ut hun ah Kitaisanna piang pah ding ahih manin kidawm un. English-te zong Ngeina anutsiat uh the UI LEH AK mah bangin anungta uh hi pah a, Nu le Pate in Tate don lo, Tate in Nu le Pa tek phinphian nusia in, awl mawh lo cih dinmun ih tun lohna dingin ZOMIte hanlung ciam in Ih omomna pan in panla mapang tek ni, Lungdam

Siam Khaute

Oct 2,2015

THU GENZIA KHEL NI

THU GEN ZIA KHEL NI

CHANGE THE WAY OF YOUR PREACHING

Lei tung ah Christian te nuntakna ka et kawikawi ciangin hih thulu ka lungsim ah Pasian in hong theisak hi cih pulak masa nuam ing. Jesus Pasian in Christian nuntakna pen Miten Pasian aphat theihna dingin GAMTAT HOIH ding, Khuavak Musak ding, Ci bangin al ding, SIANGTHO ding Tua hi leh Midangte in Pasian muthei ding cih Hong gen leh vaikhak ahi hi.

1970 ma le kim pawl in Pasian thugente in Lawkiite leh Jesus um nailote A up theina dingin genpih a, Christian hong suak le cin Vantung tung ding, Bangbang na sem zongin Jesus na sannak leh Vangam tung ding cihtawh Christian Life, nuntakzia ding hilh lo in Nazawl bawl in Pasian thu na muam uh hi.

Tuadam upna pen Tudongin Paisuak pian lai tawh kibang kasa mahmah a, Christiante tung pan in Khuavak Gamtat leh Siangthona tawh Pasian min akiphat theihnading (Mtt 5:16; 1pet 1:16) tuate kimuthei nailo hi cih pen Pasian in hong telsak sansan hi.

(New Delhi Ka omsung Don Bosco Ashalayam ah kum 4 kasep sungin Officer HITESH tawh kakikhawl den a, tuasung in Christian hong suah ding deihka hih manin Christian Book let kihawmte pia zel in kakam mahmah in Gupkhiatna kagen pih hi. Atawp ah Christian hong suak le cin hi lo ding hiam? Ci-in ka kamdot leh hih danin hong dawng hi.

Christian ka suah leh kasuah loh pen kibang sa ing. Bang hang ka ci hi. Hong dawnna ah a Nungta Pasian pen om hi cih Um in thei ing. Hindu pen Ka nute thuman na in ka zui zel a ka umtuam kei hi. Christian zong suahsawm kei ing, Bang hang hiam cih leh Christiante Siangtho ding, Gamtat hoih ding, thuman ding kasak leh tuaci kei mawk in Kei a dingin Christian ka suah leh ka suahloh pen kilam dang kei hong ci hi.)

Ka lungsim aw hi mawk maw ci-in tamdawn loin Natheih sa bangin Hindu ah zong nang dan in Siangtho om, siangtholo om, tuadan mah in Christian sung ah zong ahi hi. Anunta Pasian Na Biakkhak ding pen thupi hi Nang mawhpuak hi, Midangte hi lo ei kisam hi zaw ka ci a, Ka lungsim thungetna tawh kaphawk hi.

Hihteng ah bang hong musak hiam cih leh, CHRISTIANTE pen GAMTAT HOIH ding SIANGTHO ding hong musak mahmah hi.(Mtt 5:16; 1Peter2:12) Paul in Kote lai or laikhak hi uh the Mite sim theih laimal hih ding hong vaikhak hi.(2Kor 3:2).

CHRISITIANTE pen SIANGTHO  a nungta ding, (Siampi laibu 11:45; 19:2; 20:26) ah hong gen hi. Tua mah bangin “Kei Ka SIANGTHO bangin Note zong na SIANGTHO un.” (1 Peter 1:16) ci in hong gen hi.

Tulai 2000 kum huam tudong in Pasian thu akigen ciangin Gupkhiatna thu leh Christian nuntak zia akigen sangin Jesuh maw athupha cih bangin Athupha lam kigen ziah2 lua mahmah in, Mite lungdam na ding bek thu kigen ta mawk cileng kikhial lo kha thei ding hi. Kha sung ah Ih ta ih naute in Pasian upna pen Taksa thupha sanna ding dan ciang bekin ngaihsun in anuntaknate vuah Khuavak, Gamtat hoih, Siangthona, Ci bang a al cihte hong kimu theinawn lo mawk hi. A ngaihsutna leh adeihna te uh mu, hong tangtun loh teh Pasian cih hong phawklo in Pasian tawh kigamla, a upna uh hong kiplo in Pasian khasia sak hi cih pen ka lungsim in tel lua mahmah ahih manin hih apulak ka hi hi.

Mtt6:33 na ah agen “Pasian gam leh dikna thupi ngaihsut masa zaw un, Tua hi leh adang nate hong piak thuah ding hi”. cih pen Christian nuntakna ah ih thupit sak zawk ding thupi ding hi.

Pasian thugente in Pasian thu, gupkhiatna leh Christian nuntakzia mah gentangtang zaw le hang ihta leh naute in a upna uh ah zung thuk hong khakin ah upna uh leitung na dangte tawh hong kizo sak lo ding uh hi. Jesuh upna hangin Hauhna, Minthanna, Nopsakna, leh adang leitung hamphatna te ih tamgen luat takciangin Mite lungdam napi in sawtkhom lo thei hi. Jesuh ih upna tuadan ding bek mah in hong ngaihsun uh a, Na khat peuhpeuh ah haksatna hong tuah uh ciangin na dang2 tawh hong kihehnem in Pasian lampi pan hong pialsan den uh hi. Christian ahilote in Christian te nuntakzia ding hong thei mahmah a, ahih hangin ei Christiante tuadan in ih nuntak zawh lohna pen Athupha lam kitai lua, athupha lam bekbek kigengen, thupha bek kilam en, ahih manin in nuntakna Mite in amuh teh Pasian min phat thei lo, Pasian mu thei lo mawk uh hi.

Thupha pen genta kei le hang Jesuh anuntak pih taktakte pen Pasian in Koihkhonglo in Piakhawm lel hi, cih pen phawksak ding hi.( Mtt 6:33). Athupha lam taitai in thupha tampi nei in kitawngtawng in sameh nek sangin, Pasian phawkin ki-it diamdiam a, Anteh meh nekhawm, neih bangbang nekhawm diamdiam, kihuh diamdiam theih pen thupi zaw pek ding hi.

Tuni in atawpna ah Pasian thu genna ah Thupha lam ih tamgen sangin, Christian life mite in Pasian amuh theihna ding  Christian nuntakzia kihilh tangtang zaw ni cih pulak nuam hi ing. Tua hi leh Christian ahilote na ngawnin A nungta Pasian omtakpi,leh Pasian amuh theih takpina ding uh, Pasian thu ih genzia uh Khel huai mahmah ta hi. Thupha lam tam gen lo zaw in Christian nuntakna ding zia kihilh tangtang ding pen deih huaisa mahmah ing.

Asim kha mimal khat ciat in nuntakpih in, Kha thupha sanna hi hen la, Khatlekhat kihawm sawn ni.

Lungdam

Siam Khaute

Sep 12, 2015

                                    

GAM LEH NAM A DING TUIBANG LUANGKHAWM NI

GAM LEH NAM/ LAND AND NATION ading tuibang luang khawm ni

GAM khat hong pian theihna dingin NAM lian kisam a, GAM khat neih theihna dingin Kipumkhatna kisam hi. Singtang mite or Tribal mite in GAM khat ih neih theihna dingin NAM khat in om, Luankhop kisam mahmah hi. NAM or NATION khat suah lohin GAM or LAND neih dingpen thuhaksa khat zong hi veve mawk hi. Tua ahihmanin SINGTANG mite or TRIBAL mite Sim leh Mal, Sak leh Khang ate Zotate NAM khat in ih luan khop kei leh GAM/LAND khat neih ding pen haksa mahmah veve kha mawk ding hi. Pumkhat Ih suah kei leh Lui neu bangin min hong ngap, hong paltan in a deih2 in hong HEII ding hi.

GUAH or TUI en le hang, VANTUNG pan Omna, kipatna akibang Munkhat pan in hong Kia/zu in, Leitung hong tun teh, Mualsang, mualniam, ah hong tu/zu a, Hawkguam zui, guamkhuak zui, Luita/neu zui-in amau munsan tek ah hong luang ngeingai in, Lui lian ah hong kituah in hong luang ngeingai suk a, Gunpi ah hong luang khomin tuapan TUIPI ah hong vung khawm uh hi. Gunpi leh Tuipi ah hong vun ciangin Ngasa te belh theih, Mite in Luineu bangin aut danin hong hei, bawlthei nawn lo hi.

Tua guah tuite Van panin hong zu suk a, leitung ah hong tun tak teh amual aguam, guam kom zui in hong luang a, Luita/neu ah hong kituah in hong luang khawmin, Luineu hong tunma in, Hawkguam a luangte, mun tuamtuam a luang zeizaite, Lei keu ahih manin leiin hupmang thei hi. Luineu ah hong luangkhop uh teh ngasa pawlkhatte belh theihna hong suak in, tua panin Gunpi in hong luang teh Ngasa nam tuam2 Asan, Avom, Akang, leh tuisung ganhing tuamtuam te ading man nei in thupi mahmah hong suak a, Luineu a Min autut in Khaktan, Heiikhia, deihna lam ah luang sak ziau cih bang in hi zo nawn lo-in, Ni bang zahta in sata leh zong kang zo nawn lo hi.

Tuipi ah hong vung tak ciangin, Kua mahin Paltan, Khaktan, Heiikhia, cihbang in hi zo nawn lo in, Luineu a om ngasa sangin Tuipi ah ngasa NAMKIM hong om in tamzaw sem a, Mite I nuntakna ding nek lehtak zontheihna mun TUIPI hong suak in Hong vung zihziah ta hi. Nidangin Vantung Meilom lak ah om khawm in, Leitung hong tun the amau munsan ah hong om ngei ngai in,hong kikhen thang a, asawt lo in Luineu, Gunpi leh Tuipi ah Khat in hong luang khawm, Vung khawm kikin Mite ading, Tuisung ganhing leh, Ganhing tuamtuam te ading in man nei in, Tua Tuite hong kang ziau2 nawnlo in aman nei hong suakin Mun kician TUIPI in hong om den, vung den hi.

Tua dan mah in ZOMI te TRIBAL mite ih kipat khiatna uh guahtui bangin akibang hi a, tulai tak in Hawkguam, lui neu, leh Amual aguam ah luang ngeingai ih hih manin Mite in hong nopneh mahmah in luineu ngaptan bang, Luineu hei ziauziau bang, Luineu khaktan bangin, ih kim leh pam ate in hong HEI ziau, Hong khaktan ziau2 ahi hi.

Tuni in ih phawk ding uh thu in Tua LUI NEU te panin luang khia meng2 in GUNPI Zomi ah kigawm meng2 ding hang a, Tua GUNPI pan in TUIPI ah hi ZOMI NAM( ZOMI NATION) ah VUNG mengmeng ding Kipumkhat ding aman lang thei penpen in ih lungngaih ding uh ahi hi. NAM lian suak peuh le hang MITE in LUINEU bangin hong hei, hong khaktan, hong paltan ziau2 nawnlo, hong hih ngamlo ding a, NAM LIAN ih suahnak leh GAM or LAND cih pen Hong luang, hong pai ziau ding, vaihawm nuam ding, ih kim leh pam aten hong sim mawhin hong nuihsan lo in, ih vai hawm bang2 KUMPI lianten hong zui ding uh hi lel hi.

Tua ahih manin Sim leh Mal, Sak leh Khang a om TRABIL OR SINGTANG MI te in UNITY pen thupi takin ih ngaihsut ding uh KAWLGAM leh INDIA a omte hong hanthawn nuam mahmah ing.

GAM/LAND ih deih leh Ei Kipawl thei phot2 a NAM LIAN ih suah kul a NAM lian suak masa lo in GAM/LAND cih pen mual mong et hong bang ding hi. Ih etteh theih ding NAGA te om hi. Amau zong luineu pan in Gunpi ah Tuipi ah na vung khawm uh ahih manin Akampau uh Kithupi sim hi.
    Ei khang ah Gam leh NAMPI ih muhzawhna dingin tu mahmah in ih kipat kul hi. ih kipat kei leh ih tuta khang ah zong kimuzo lotheih ding ahih manin ih minam neu lungsim kituam bawlna teng pai khia in Gunpi khat in luang khawm ding hi hang.

Tutung a Lamka a thupiang leh Kawlgam thupiangte en leng Pasian in Ei ZOMI te Tribal mite kipumkhatna ding hong gelsak na hi ci leng kikhial tuanlo kha ding hi. Bang hang hiam cih leh Pasian theih loh in apiang om lo hi ven maw!

Asim kha mimal khat ciat in UNITY is STRENGTH  ahih lam phawk sansan leng deih huai sa ing. Hoihna sak leh Na share sawn in!

Lungdam

Siam Khaute

Sep 3, 2015

MAN NEI IN ZANGIN

IH NUNTAK SUNG NGAHSUT HUAI THU

 

Lai Siangtho in acih bangin Mihing nuntakna Tuikhu bang, meilum bang, pakpalh bang, pa bang, hi lel hi.

 

Ih nuntakna leh ih neihsa in lamsate ei uktheih Control theih hilo in Pasian deih bangin apiang aom hi lel hi.

 

Ih lam et loh lai tak ih nuntakna hong bei in Buan lei suak ding a ih neihsa lamsa Sum leh paite Hong muat lel ding hi.

 

Tomkal ih nuntak sungin ih neihsa leh lamsa sum leh paite Pasian a ding ih zat khat teng aman nei suak ding a, ih nuntakna bei leh akizat nang na a dingin om nawn lo hi.

 

Job in tang guak in Ka piang a Tang guakin ciah kik ding ka hi lel hi acih bangin, Taksa thu ah ih ken theih ding khat zong om lo a, Na kha in aken theih ding Na neihsa leh na lamsa te Leitung na damsung in Hong Pia Sianmang a dingin zangin Van ah Mihau nahi ding a Tuateng bek na keng thei ding hi.

 

Jesuh in Man neilo a nuntakna hong piak Nang ading in nasan nak leh tua na neihsa Lamsa Pasian a dingin na piakte Mannei kham lukhu hong hi ding a, Pasian Jesuh theih loh nuntakna tawh na piak hang amawkna suak veve ding hi.

 

Tuni in Jesuh Gumpa honpa in sang in nuntakpih in la Ih nuntakna leh neih leh lamte bang mah ahih loh lam phawkin Na hih theih zah2 in Sianmang a ding in Nungta in Piakhia in.

Van ah Mihau na suak ding hi.

Lungdam

Siam Khaute

July 10

 

KEI LO IN PA KIANG TUNG LO DING

KEI LO IN PA KIANG TUNG LO DING

John 14:6 Jesuh in ama kiangah, “Keimah in Lampi ka hi a, Thuman, leh Nuntakna zong ka hi hi. Kei hong suangloin Pa kiangah kuamah tung theilo ding hi.

Christian kici a Christian akici lote akipan akua mah peuh Vantung ih tun theihna ding, Pa Pasian kiang ih tun theihna dingin Jesus in kei mahin Lampi hing, thuman hing, Nuntakna hi ing, Kei hong suang lo in Pa kiang tung thei loding ci ngiat hi.

Van gam, Pa Pasian kiang ih tun theihna dingin Jesuh Hopa, gumpa  le Tanpa in ih neih, san ding athupi pen ahi hi. Jesuh loin Pa Kiang tung thei lo ding ci in Jesuh tektek in nagen hi.

Pasian in leitung mite hong it mahmah ahih manin ama Tapa a um mi khempeuh si nawnloin a hin' tawntung theihna dingun a Tapa neihsun a hong piak dongin a hong itna a hong lak hi. (John 3:16.)

Christian kici in A kicilo te hita le hang, Na pianthak  loh phamawh, Jesuh na honpa in san loh in Pa Pasian kiang tung thei lo ding ih hi hi.

1.      Vangam or Pa Pasian kiang ih tun theihna dingin, Jesuh gumpa leh honpa in sang a, ih Pianthak loh apha mawh akitang sam masa penpen KHATNA ahi hi.

GAMTAT PHA/HOIH IN

Christian ih hih khit a ih pianthak khit ciangin Gamtat hoih kitang sam mahmah hi. Christian mi pawl khat te in Jesuh gumpa leh tanpa/honpa in ih sang khit teh UTUT in om in GAMTAT nopbang ih gamtat hangin Vangam tan lo, tung veve ding cih UM khial mitampi om kasa hi.

Christian ih nuntakna sungah GAMTAT HOIH ding pen Pasian deihna hi in, Lai Siangtho in hong gen hi. Pianthak mi khat pen ahih theihzah in Gamtat hoih ding I hanciam kei leh tua pen Christian taktak lo, Piangthak taktak lo cihna hi lel mawk hi hang. Hindu leh Buddhists te leh Christian ahi lote in, Christian suahnak leh A GAMTAT HOIH ding leh A SIANGTHO dingin hong ngaihsun pah uh hi. Ih tua ci takpi mah hiam CHRISTIAN ten Ngaihsut huai!

¹⁶Midangte in na gamtatna hoihte uh a muh ciangin vantungah a om na Pa uh min a phat theihna dingun mite mai-ah na gamtat hoihna uh khuavak bangin na kilangsak un.  (Mathew5:16).

…Pasian aphat theihna dingun  NA GAMTATNA UH HOIH SAK tawntung un. (1peter 2:12)

Christian nuntakna sung ah Ih PIANTHAK khit teh Christian mipihte ahi a, Christian pih lote in Pasian hoihna leh Pasian aphat theihna dingun ih mawhpuak/tavuan in GAMTAT HOIHNA kitang sam mahmah hi. Gamtat hoih le hang Thukham tampi azui sa ih hipah hi.

CHRISTIAN  PIANGTHAK ih cihte pen Pasian Lai or Laikhat Midangte Simtheih leh Lungdam na LAI ih hih ding thupi hi.

²Note mahmah pen mihoih ka hihna uh lahna dingin kote' lai na hi uh a, mi khempeuh in simin a theihna dingun kote' lungtang tungah a kigelh lai na hi uh hi.  (2 Kor 3:2)

NUNTAK SIANGTHO IN

Christian le Piangthak khat nuntakna akitang sam mahmah leh KHA thu TAKSA thu ah thutampi hong gual zawhpih in NUNTAK SIANGTHONA  ahi hi. Christian kicite adingin kitangsam mahmah thu ahi hi. Jesuh Gumpa leh Honpa in kasan khit teh SIANGTHO zo ta kei leng Vangam tung veve ding, Pa Pasian kiang tung veve ding ci mitampi om kha ding hi.

Tuni in ih ngaihsut dingin ah Hongsam Pa Siangtho ahih manin Eite zong Siangtho dingin Pasian in or Jesuh in hong deih hi.

⁴⁵Bang hang hiam cih leh note' Pasian ahi dingin Egypt gam panin note a hong pai khiatpihpa pen keimah Topa ka hi hi. Tua ahih ciangin kei siangtho ka hih manin note na SIANGTHO ding uh hi,” a ci hi. (Siampi laibu 11:45)

“Note na SIANGTHO ding uh hi; bang hang hiam cih leh Topa note' Pasian keimah ka SIANGTHO hi.” (Siampi laibu 19:2)

²⁶Note pen keima-a' dingin na siangtho ding uh hi; bang hang hiam cih leh Topa ahi keimah ka siangtho a, note pen keima-a' na hih theihna dingun mite kiang panin note kong tuamkoih zo hi. (siampi 20:26)

“Kei Ka SIANGTHO bangin Note zong na SIANGTHO un.” (1 Peter 1:16)

Hih Lai Siangtho teng ih et suk the SIANGTHO ding hong deih mahmah hi. Christian khat a dingin Siangthona kitang sam mahmah hi. Asiangtho mikhat in KHA thu leh TAKSA thu ah, Thukhamte azui hi pah hi.

Christian ahi lo te zong a Siangtho zo leh Gamtat hoih na tam mahmah a tuate Sianthona leh Gamtat hoihna hang tawh Vangam Pa Kiang atung ding hi tuan lo hi. Tua mah bangin Christian Jesuh Palo Gamtat hoihna leh Sianthona in Vangam hong tun ding hi tuan lo zel hi. A hizongin Christian a kici khat Asiangtho leh Agamtat hoih dingpen Ahih ding mah hi a tuate ih Pianthak khit ciangin anungzui ding thu hi a, pel lo apha mawh thute ahi hi. GAMTAT HOIH in SIANGTHO zo ih hih nak leh Pasian Mai ah Christian hoih ih hi ding a, Jesus Gumpa a sanglo te adingin Tuate pen amawkna pi ahi hi.

PIANGTHAK mi khat in a nuntakna ah GAMTAT HOIHNA leh SIANGTHONA aneih kul, Automatic in neih ding thu hi a, aneih kei leh tua pianthakna pen et phatkul kha ding hi.

GAMTAT hoih in SIANTHO peuh leh Kha thu  leh Taksa thu ah,THUKHAM te tuasung ah akim khin hipah hi. Pasian it taktak ahih manin Gamtat leh Siangthona tawh alak nu/pa pen “Singkung agah in kithei” ah cih bangin kithei a, Thukham zui hipha in Pasian lungkim hi.

Kha thu taksa thu ah, Ih Pianthak ma in or Christian ih suahma in akisam lo thu ahih hangin, Ih pianthak khit teh akitang sam thu na hi hi. THUMAN na kitangsam hi. (Matt 5:20)

1.      Jesuh Gumpa honpa in sangin

2.      Gamtat hoihin, Siangtho nuntakna nei peuh le hang Thukhamte Automatic in azui na hih pah a, Pasian deihna/lungkimna ahi hi.

3.      Jesuh anei mikhat in tuate pelloin kitang sam a, Aneilo te in Gamtat hoihin, Siangtho ta leh tua tawh VANGAM, Pa Pasian kiang tunpih ding hi lo hi cih phawk tek ni.

4.      Singkung agah in kithei cih bangin Mite in hong mu in hong sim thei ding hi.

Asim Kha mimal khat ciat TOPA in ih taksa leh KHA nuntakna ah Picing leh thuman muhna hong suak sak semsem ta hen!

Lungdam

Siam

August 23, 2015

Sunday.

Zogam mencim vai Topa zia tawh

Zogam mencim vai Topa zia tawh

Zomi it teng; Tulai tak bang hamsiatna hiam thei zo khang in,ih gam ah
khua pawl khat kicim in inn ki tuah loha pha mawh leh losia zong tampi
om cih thei khin ciatni.

Tuipi galkhat leh Gam sung mipi te, Pawlpi taumtuam pan huhna te ong
tung ziahziah in ih mipih te tung lai natna ih neih thupi sa
ing.ZYA,Salom cih te thupi mahmah uhi hi te om kei leh a ki sih pah
loh hang hamsa mahmah ding cih hi.Khua sung biakna pawl tuamtuam ten
zong huh theih huh mawh in pang ciat ih hih teh lungdam huai hi.A hih hang sumbuk pawl khat leh van zuak pawl khat in bel men cip ma

pek a, a neihsa te uh mipi ham satna tung pan met bawk zong om mawh
hihang.Tedim a om namdang biakna tuam ten mipi khual lo ong sa lua uh
in,Sunday na ki khop uh bek ki lam dang mawk ong cih san uhi.
Ong cih theih ding mah uh hi sa ing Kawl ten ki naina zong omlo ong
leisak cih tha dah ong mawk piak cih te ngaih sut huaisa ing.A nungta
Pasain ih baik a bnag ci ih hitam.

Tu laitak a thupi penpen in Tedim-Kalay-Tonzang motor lam hi pi pen hi
a omsa teng piapia leng ong lut zo kei leh khua sung mipi ki tavai kha
ding cih ki patau hi.Kumpi lam mah in lampi ong sep kei leh ei sum ki
don tawm ding tawh baih lo ding hi.JCB lamto te 30- bang om hisam ven
a nei ten datsi ong thun unla ko ong sem nung a ci zong ki om nailo
dan hi

ZCD in bel huh zawhna ki neilo in,Kumpi te theih ding in nisawm val ta
Kumpi in lampi ong sem nailo cih VOA leh media ciang bek ah ki gen zo
hi pan hi.Ki gengen lai ding ciang hi phot hi.Party dang te leh MP ten
lah gen man nailo.a hi tam kiza nailo hi.Kumpi ten mipi ong khual lo
maw/ Baho thu neihna khuah lua maw Myone ten a mau thu tawh vai hawn
hamsa sa uhi.

A thupi penpen ah Topa tung thu nget ciat ding hi,Bang hang hi bang
thu ong piang,Leitung inn leh lo te kip lo cih Topa ong theih sakna hi
mai ding hi,huaiham,angsung ngaih sutna zong tam lua ih hi kha mai tam
maw cih zong ngaih sut huai hi.

Kamlian