A KIKHELLO PASIAN IN ZOMITE THUHILH

 A kikhel lo Pasian in Zomite thu ong hilh 

*** **** *** ***

I biak I paai Jehovah Pasian pen zanni, tuni a tawntung a a-kikhel lo Pasian ahi hi. Amah a kikhel loh bang in a vangliatna kikhel lo bek hilo in, hong itna zong kikhel lo a, a zia a tong zong kikhel lo hi. A hun zui a mihing’ khuak in a teltheih ding dan tawh thu a hilh hibek a, a thuhilh zia, a lahkhiat zia leh a deihna kikhel peuhmah lo hi.

Zomite tua Pasian upna leh biak le paaina tung ah I nisim nuntakna a kipan I lungsim thu ngaihsut zia khempeuh a kinga mahmah mite ihi hi. Ahi zong in, tua a lian mahmah leh a lamdang mahmah Pasian kuamah in tel zolo hihang. Tua thu I theihna ding a I kingakna ahih leh Pasian’ nasem siate’ ong hilh, ong makaih leh ong lamlahna ahi hi.

Nidang lai in Pasian in ami Israelte a tatkhialhna uh, pasian dangte a biakna uh, a nungta Jehovah Pasian tung a a cihtak lohna uh, ama’ deihbang a a nuntak lohna uh cihte pan thu a hilhnop ciang a kim a pam uh a namdangte sim sak, gal tung sak, mi tampi in sihlawh manlawh, cihmawh gilkial dangtak lawh in, namdangte’ nasem sila in kiman cihbang, pul natna tungsak, khuahun sia sak cihbang in thuhilh a, amau kisik kik a Topa a zuat uh ciang Makai khat peuh khangkhia sak in honkhia kik zel hi. Gentehna in Gideon (Jerubbaal), Samson, Jephthah cihte I theih ciat ahi hi.

Tu in tua Pasian in amah a bia a paai, Kawlgam ah Minam min a kilawh leh tua Pasian’ min tawh a kilo khawm Zomite, I sia it leh muan mahmah tampi khat khit khat ong laksak hi. US a Sia CiiCin, Sia KapMang cihte a kipan tampi ong laksak khin a, tu in Zogam ah Cikha a kipan Kawlpi, Yangon dong ah tampi mah ong laksak khinta hi.

Nu le pa, u le nau…. Daitak tusuk in, limtak ngaihsun dih ni. Topa I Pasian in onghilh nop, ong phawksak nop thu om hikha ding hi. A beisa a I tatna, I sep I bawlna, I vaihawmna leh I kihuai I ki-angvan ziate dong ah kiphatsakna, thuman thutak thei gige napi tuate lehngatsan a angsung leh tanau angvan tantan zia le tong a kipan, ama’ MIN a thupi ngaihsut mahmah Pasian’ MIN zangkhai ngaihsut thangbawlna, duhhop huaihamna tawh meetbawlna cihte dong a I zia I tong tampi limtak ngaihsun leh kisikna takpi tawh Topa’ kiang zuatkik huai kha ding hi.

Topa’n thu ong hilh hi. Thu ong gen hi. Tanglai a a zia a tong mah tawh tuhun a I teltheih ding in ong hopih hi kha ding hi. Limtak en ni. A aw ngai ni. Daitak tusuk in I lungsim khempeuh tawh Topa’ kiang zuankik ni. Topa itna leh zahtakna tawh amai ah lau in liing ding hihang. Daitak om in, amah bia ni.

Topa’n I gam ong cidamsak kik kha ding hi.

By: Pau Khat Suan 

Singapore 

PATE NI ADING PATE LUNGGULH

 PATE NI ADING PATE LUNGGULH

THUMASA:

Pa cihpen vaak, makaih,lamlak leh abulpi cihna hi a, Pa omlo innsung pen anungta zo mahmah phialzongin tate lungtangsungah lung patauhna leh khamuan zawhlohna omden hi. Pate ni hongtun ciangin Pate tungah thupha bawlding ki hanciam ngeingai in lungdam huai mahmah hi, ahizongin ahundangah itna lahding pen kingaihsun lo kha thei zel hi.

PATE NI BANGCI ZAT DING:

1. Topa tungah lungdamkohna in zangding.

2. Pate tungah thupha bawlna in zangding.

3. Pa neinawnlo ten Zeisu  pen Pa bangin ngaihsun ding .

4. Pate aomnawnloh hangin pate thupha omden cih mangngilh lo ding.

5. Pate itna pen han ah kivui khawmlo cih phawk den ding.

6. Pa te tungah itna kammal khum te zasak ding.

7. Pate in van leh nate tungah tate itding ngaihsun lo in nuntakna mahmah thupi sa hi.

8. Pa cih kammal sungah thupha leh vangliatna om cih mangngilh lo ding.

9. Pa te in tate itna khamnuam mahmah cih phawk ding.

10. Pate teekna pen tate hang cih phawk ding.

PATE BANGTAWH KIBANG HIAM?

1. Pate pen Suangmanpha tawh kibang hi.

2. Pate pen inn muanhuai tawh kibang hi.

3. Pate pen lampi tawh kibang hi.

4. Pate pen tuisiangtho tawh kibang hi.

5. Pate pen ciangkhut tawh kibang hi.

6. Pate pen khaci tawh kibang hi.

7. Pate pen engine tawh kibang hi.

8. Pate pen bizupi tawh kibang hi.

9. Pate pen store house tawh kibang hi.

10. Pate pen lupna tawh kibang hi.

PATE IN TATE TUNGAH  ALAMET UH:

1. It ding lamen hi.

2. Pahtawi ding lamen hi.

3. Thupit bawlding lamen hi.

4. Thudot ding lamen hi.

5. Zahtak ding lamen hi.

6. Amau sangin apilzaw ding lamen hi.

7. Amau sangin ahauzaw ding lamen hi.

8. Amau sangin alawhcing zawding lamen hi.

9. Amau sangin agualzo zawding lamen hi.

10. Alungnuamsak ding lamen hi.

PATE IN TATE TUNGPAN ALAMETLOH UH:

1. Simmawh ding lamen lo hi.

2. Midang tawh tehkakding lamen lo hi.

3. Neubawlding lamen lo hi.

4. Guallelh ding lamen lo hi.

5. Khasiatsakding lamen lo hi.

6. Maizum sakding lamen lo hi.

7. Haibawlding lamen lo hi.

8. Thunial nial ding lamen lo hi.

9. Tate gamtat siatding ding lamen lohi.

10. Tate gentheih cihmawh ding lamen lo hi.

PATE TUNGAH TU MAHMAH A SEPDING THUTE:

1. Na pa na awkhum zasak in.

2. Na pa tungah akimuthei ding thupha khat bawl in.

3. Na mailam ding thute theisak in.

4. Na pa lungnopna dingin kammal hoih nono zasak in.

5. Na pa in nangtunga hongtuh itna te agah lo sakkik in.

6. Na pa tungah na khasiat leh zong thupha bawl veve in.

7. Na pa cinlohna te kuama tungah gensawn kei in.

8. Na Pa hangin lungdamkohna kammal gen in.

9. Na pa hoihna penpen muhsawm in.

10. Na pa tungpan thupha dawhden  in.

THUKHUPNA:

Pate ni in thupha hongtun ding hilo in, Pate tungah itna leh thupha ibawlna in thupha hong tun ding hizaw hi. Tutunga Pate tungah itna tawh thupha abawl kha zonailo iom leh mailam ah thupha bawlsawm ciat ni.

Credit - Sia Pau Khai

NUPATE IN NO ZONG NASIN VEVUA

Tu Dong nupa ka hih uh hang , lawm kingaite mah bang a kiho” lai ( kam kinial vava nai lo )

June 4/2021

Innkuan nuam ka suah theih na ding vua ,Kum 10 sung ah ka zat ngiat ka innkuan sung Thu uh  

1. Innkuan sung no. 1 ah koih (midang thupi na sak leh na innkuan sung nuam masa ngei lo dg).ki thei siam ding.

2. Na innkuan sung tawh ki sai Mi Thu ngen um pah” lo ding( nu leh pa sanggam te a hih uh hang lungsim Sia a nei tampi tak om , thu khat peuh” a om leh na nupa vua ki dong tek” ding, na zi/pasal kam pan a pau khiat ciang um pan dg.Innkuan sung ong tel khial sak nuam masa pen midang pan ong pai hi lo cih phawk dg., Nupa ki khen leng ih innkuan pih te’n phamawh sa lo, ei bek in na ki sa, 

3. Nupa a Ki Muang giat ding( na zi/pasal ing khat vei ong muang leh a tawntung a ong muang den cih phawk ding.

4 . It na kammal zang den ding ( Itna kammal ki za nuam den hi cih phawk ding.

5. Na zi/pasal deih dan a om zawh na ding hanciam ding.( na om zawh kei leh zong ,to bawl lo ding, phin na nei lo ding , siat lak lo dg , heh pah” lo ding).

6 . Itna ih neih nak leh Ki hehpih na om den hi.

( numei sep pasal sep cih bang nei lo ding , a hi lo lawm” a ih pasal te na sawl” lo ding ).

7 . Mi mai ah zi/ Pasal te mai zum sak lo ding . 

8 . Nupa cih pen a kulna mun ah ki mai et ding( na khat peuh” ih deih ciang midang ih mai et  mah bang a, ki mai et ki sam mah”.

9. Mi’n ong phat leh deih nei, lam et na nei cih zong om kha thei a hih lam , a pua tham bek hi a, ( na lup pih, na an nekpi na innkuan pih te ing ong phat leh a tak” a hih lam phawk den in

Na sin ve vua, zang thei leng vangam malep tawh ki bang hi ven.

Ta te pattah dan bel siam kei , aih hang Han ciam ung .

laigelh : Hoihnu Nu 

GAL NIH A NEI KUMPI NASEMTE HI UNG

 #ZRAE na ngengen sangun ngaihsut huaithu 

#GAL 2 NEI KUMPI NASEMTE HI UNG

__________________________________

May 26/2021|Phualva Lungtuak Media 

Keipen Tan 8 sangsiamah khat ka hihi. CDM lutte misok te'n hong do ding a, CDM lutlote mipi te'n hong do ding ahih manin, ko pen gal 2 nei ka hi uhhi. 

Misok te'n ukna a buluh cil lai in lungphona ah kahih theih tawp in ma pangin CDM zong kalut pah hi. Misok te'n CDM lut te manin abanban in gilbem ah hong khum mawk uhhi. Kei zong mat dingin hong zong aa kalau mahmah hi. Ka inn ah giak ngamlo in kalawmte inn le khuanawl gamsung cihte ah kagiak kawikawi hi. 

CDM kalut a kipan ka khasum kasang nawn kei pah hi. Ka khasum ngak a tu dimdem ka innkuanpihte tawh zat ding sum le nek ding anletuite ka kitasam pianpian ta uhhi. Kha 1 paito lai le ka innkuan un anngawl ding cih thei kahih manin, April kha akipan CDM pan khawlkik in ka khasum kasang kik hi. Ka innkuan un nak thei zawdeuh ban ah misok te'n mat dingin hong sawm nawnlo ahih manin kalung nuamtuam mahmah hi.

CDM pan kakhawl kik khit ciangin mipi in CDM lutlote misokte tawh a kipawl hi, ci in amunmun ah hong kigen kawikawi ahih manin kalau mahmah leuleu hi. Lawmlegual le venglepam cihte in nidang bangin hong ho ziahzuah nuam nawnlo uh a, agal bangun hong en gap gap ta uh ahih manin kacih nading theilo in thanem in innsung ah ka omcip hi. 

CDM lut dinga hong tawsawnte le CDM lutlote amawhsakte tungah hih anuai aa teng gen nuam ing..

CDM lut ding hong hanthawn napi uhcin:

Misok te'n mat dingin hong zon ciangin na inn aa kongbuk vat ding bek zong nalau uhhi. 

CDM alut manin gilbem a tung te'n bangteng thuak hiam, cih gilbem ah nong en nawn kei uhhi.

Khasum ta'ng in kangah nading khasim in nong vaihawm sak zo kei uhhi. (Mihing ih hih manin ei mailam ciat kibuai hi)

Khasum itlah manin CDM lut ngamlo nong ci uhhi. Tua khasum dihdih thupi kasa het kei uh a, ahizongin an nelo in ka om zo kei uhhi. 

EO (Education Office) ah kumpi nasemte omna mun (Address) kim takin om ahih manin, misok te'n hong zong nuam le baih mahmah ahihlam nong theihpih kei uhhi. 

CDM lutlote bangmah theilo mihai hi/misokte tawh kipawl hi, ci in na mawhsak uhhi. Lai tawh ki navawhte in no sangin tangthu theizaw ding ban ah no sangin hai zaw samlo ding a, misokte adeihlohna uh zong no sangin lianzaw pek ding uhhi. 

Misokte ukna nuai ah keizong ka ut kei hi. Ahi zongin ei sa'ng a muanhuai zaw te tungpan ukna buluh zo khin ahih manin, kisutkik pak ding hamsa lai ding hi. (Hun in thu hong gen lel ding hi)

Khangthak ih naute nunnop nading luangkham in thaumuk mai ngat zeenin pang ni, na ci uhhi. Thaumuk kihta masa lo hi ung, ahizongin sih hun lopi in si nuam nai kei ung. Om nawnkei leng naupangte hilh manlo in kapilna tawh kabei ding pammaih ka kisa hi. 

Misok te'n hong man khin le hehpihna nei ngiatlo ahihlam na thei uhhi. Amawh atang khenlo in amat khempeuh tungah bangzah takin ngongtat cih nathei kei uhhi. Tua mun katun hun un nong en nawn kei uhhi. 

Misokte ukna nuai ah pilsinna kizangh thei kei, na ci uhhi. Laihilh ding pen misokte hilo a, Sangsiate ahihi. A hilhte ahilhsiam ding uh athupi hizaw hi.

Misokte ukna buluh pen kumpi nasemte mawhpuak bangin na ngaihsun uhhi. CDM lutlote amawhsak te'n no mimal mahmah in lungphona beek ah na kihel ngam ngei beek uh hiam? 

Mihing cihpen mipi in ih mimal lungsim hong khensat sak khuan omlo a, mipi deih bang bek in kalsuan ding cihzong om tuanlo hi. Ei sa'ng ahaizaw mipi pawlkhat zong omthei lua hi. Ei pen ei ih hi a, mipi pen mipi ahihi. Ei lungsim khensatna ciat kiheh sak theih omlo in kamu hi. 

A tawpna ah, ko Sangsiate in ''Naupangte laihilh in gam ading mipil mihoih tampi suakkhiasak ding'' ci in kiciamna kanei uh a, tua kumpi akah le laihilh ding/tua kumpi akah le laihilh lo ding cih kiciamna kanei kei uhhi.

A sawtlo in Sang kihong ding hi, CDM lutte sang pai ding uh a, a lutlote pailo ding uhhi. Kei kahih le, Sang kapai kei ding a, CDM zong kalutkik nawn tuan kei ding hi. Hih bang kagen ciangin alai ah om (a kai ngawi) nong ci uhhi. A lai ah ka om kei hi. CDM lah kahi kei a, Non-CDM zong ka hituan kei hi. Ka nasep laihilh simloh bangmah ah kapang nawn kei ding hi. Sanginn bek ah lai kihilh thei hilo hi. 

Misokte leh mipite athahat amanlang zaw belbel in hong mawhsak in hong manin hong hih masa lel ding uhhi. A hizongin hihthu khempeuh sangin naupangte ading ka deihsakna lianzaw hi. 

!Misokte azung amal in bei tahen!

Translated by SINTHU

#photo_crd - #Teachers_page

ZOMITE PI THIAN HUAI KAM VAIKHAKNA

 Ei Zomi te gam 3 na a tung khin khempeuh tate tute aw hih lai nong sim sak ciat nang un kong thum masa hi.

Pasian phalna om kei leh ei Zomi te gam 3 na ah kua mah i pai kha kei ding hi. Nidang in pilna nei te bek a pai hi aa, tuhun ciang in pilna nei lo bek tham lo in, a damlo, a cinglo teng leh puteek piteek te na leng i pai ta zen hi. Tate tute aw, mipil te gam, mihau te gam i tun ciang in agam kumpi te vai hawm siam na tawh, bang mah a sem zo nawn lo ahi kum tamte na ngawn in huhna sum hong ki pia lai aa, ei tum tak tek in an neek tuidawn, nikteen puansilh ki cing lai in nuam i sa ciat hi. 

Migam mi lei ah i om ciangin, i minam i ngeina a manthang loh na dibg ngaihsutna uh tawh Zomi makai te in kumsim in Khuado, Zomi Namni cih te nong vai hawm den uh zong makai te in nong geelsiamna uh thupi kong sa mahmah hi. Zomi te in "Ko Zomite" cin laphuak in " Zomi ka hi"  cin la sa in, khangno te nong om uh aa ka nuam mahmah hi. Mai  lamsang kumtampi i ngeina kipte i zat den theih nading in, hih US ah a suak te in  zong Zo pau zong a thei/zat/pau theih ding uh thupi ka sa mahmah hi. A hih hang i tu i ta te in i pau i ngeina a thei nawn lo om a hih man in a nu le pa, a u te nong siam mahmah uh kul ding hi. I pau i ngeina a theih kei uh leh, i minam i ngeina a mangthang semsem khak ding lam et om zaw hi.

Zomi te in minam dang te tawh ki bang lo in, i tate  pasal upa pen in innluah aa, a nu a pa te kem in a ki khoi hi aa, puteek piteek te ki kepna khawng ah i koih khak ding lau huai mahmah hi. Inn pan in na tate uh na hilhilh kei uh leh, kum 18 ong cing khin leh hong nusiat khak ding lau huai hi. I ngeina te na tate tung hilh in i kampau te zong hilh kei le uh cin khang 2 khang 3 khit ciang in, i ngeina i pau ong thei nawn kei uh leh mi mangthang i suak khak ding dah huai mahmah hi.

Tua ahih ciangin inn pan in nu le pa te mah in thupi ngaihsut in inn ah ei pau mah zangsak in hi leng haksa nai lo ding hi. Ei pau theihsak loh na pen haina hi aa, mangpau a thei lo te pen a pil lo teng hi.

Tedim khuapi sungah, Gawlkha minam te inn 3 khawng bek a om hang, a tate tute amau pau theih sak setset zo lai hi. Gam 3 na i tun zawh pen a tam zaw kum 10 ciang khawng hi pan ding aa, nu le pa mangpau a thei lo te na ngawn in, a tate Zo pau theihsak zawh loh pen ngaihsut theih loh man hi gige hi. 

Zomi te gam 3 na i pai theih na pen Pasian in a deihna om kei leh ki pai kha het lo ding hi. Pilna i neih loh hang in, a pil lo te zong Pasian deih nuntakna i theih na tantan ciat pan in citakna, thumanna, kiniamkhiatna, pumpi ki uk zawhna, teep le muam aa ki pan limpha a lak dingin hong deih na zong hi  ding hi.

I zolai zong inn ciat pan in Lai Siangtho simna tawh na ki pan sak ciat un. Lai Siangtho simna pen, Zolai siamna/sina, Pasian deih nuntakna le i tate lamman tot sakna ahih lam zong i phawk ding ki deihsak hang. I tate kum 12 hong kaan khit teh thu hilh ding baih nawn lo ding cih pen thupi ngaihsut ni. Nu le pa te pilvang in thu limtak ngaihsun ni.

Hihlai kong at ciangin mimal kong cihna hi lo in, i minam aa ding deihsak luatna tawh kong at a hihi. I om na ciat ah Pasian in ong cing ong kem ciat ta hen.

Pi Thian Huai 

Lungdam

TOPA HOIH HI, Topa lian hi!

TOPA HOIH HI

Key: G

Topa hoih hi, Topa lian hi Lungkham hun in hong huh a, Ama kiangah a beel mite Ama’n limtak hong kem hi.

Hong phat ning maw,

Toapa hong phat ning Na vangliatna lamdang si,

Thuk in zai e, Lamdang nong itna,

Ka belh suangpi To Zeisu

Lungsim tamkham, lam-et bei te, Meigong tagah genthei te, Leivui pan in nong lamto a, Zeisu hong itna bek hi.

Khasiangtho mit hong vaksak a, Itna khut tawh hong len a, Kei nong sap leh kong dawng ding a, Ka thu sim kong hilh ding ci.

HIBANG HUN ADINGIN

 HIBANG HUN A DING IN

( For such a time as this)

Esther 4 : 14

By Rev. Dr. Pau Khan En

Esther Laibu sung ah Judah mi khempeuh thah asawm mi gilo Haman vaihawmna a theih ciangin kongcingpa Mordekai in a tunu Esther kumpi nu kiang ah,  "Vaihawm khat naneih kei leh Judah mite bel lam khat peuhpeuh tawh suakta lel ding uh a, nang leh na innkuanpih te bel na si khin ding uh hi. Hi bang hun ading mah a hih kumpipa innsung khawng atung na hih mel kua in thei a hi hiam" na na ci hi.

(Esther 4: 14) Hih thu dapphah in " Hibang hun ding mah in anungta hoh hilo ding i hihiam? cih thulu atom mahmah in i en zual ding hi. Hibang hun ( such a time) i cih in :

Covid 19 hangin leitungbup tawh i buai khawm a, ki ukna vai (politics) hang in Myanmar gamkia i tang buai hi. Tual gal a tung hi mai hi.

Tua a hih man in,

a) i vai ding mahmah, a kician,  telmun mel om thei khia lo hi. (uncertainties) 

b) i mailam ding zong geelkholh, genkholh theih om lo hi.( unpredictable)

Tua ahih man in,

1. Pasian mah i muang tentan ding hi. Amah pen hong khahsuah ngeilo pa a hihi. ( Isaiah 4l: 10) Hong khahsuah ngeilo ding pa  zong hilai hi.

2. I minambup mah tawh i ki pom cinten ding hi. US  gam ah minam ki deidan na ( racism) a suuksiat mah mah laitak a netniam thuak mivomte a makaih Baptist Minister Rev. Dr. Martin Luther King Jr. (1929- 1968) in a mipih te kiangah, " I minam i tonkhop theih kei leh mihai bangin i hon sih ding hi. ( We must learn to walk together or we wii die together like fools) ci hi.

3. Ngaihsut i kikup na ah mimal thaneemna tawh kuamah i ki ko kei ding hi. Hipen Zomite i tual niamna pen leh i tha neemna pen a hi hi. Midangte eibang in mimal in kiko lo in athu kikum bek uh hi. Zomi te hong nungkaih ( draw back) alian pen leh mi i batlah na pen hih i mimal ( personal) kiko na hi- a, tua in mi hong bang sak zo lo hong tualniam sak pen pen a hi hi. Mipi lungsim hong paai sak zo lo in khuataa lungsim hong paai sak den hi.

4. Thuman (truth) tuh dih ni. I lungsim a eima' khensatna ah a man pen ding ngaihsun in tua i ngaihsutna (conviction) dinpih cinten ni. Tulaitak a i hanciam pen in zawhthawhthu leh ngongtatna (violence) ki ukna deihlo in, nial in tuahangin zong i mai ah mitampi in aluang uh na paai khin zo hi. Tuate zahtakna i pia a, ngongtatna nial in suahtakna paak bang in i lawh zawh mateng i kalsuan ding hi. Tuabang kuhkalna i neih zawh nading in eimah mah lunggulhna leh khensatna a hih ding kisam hi. Thumaan pen zawhthawh thu a kikaih paat zawh thu hi lo- in ei mimal mahmah in khensat in i minam tawh ding khawm a, i gam i lei i puah ding a hi hi.

5. I vai sah sangel ing.

I lungtup Federal Democracy tung le hang,  minam dang te bel bangtan ciang hiam khat kiging khin pian tek in om zo uh ka sa a, Zomi te bel a hici pi in omlai ka kisa hi. Tua hi- a, politics asiam leh thukhung siam hon khat hi thu ah nong kikup ding uh deih huai ka sa mahmah hi. A awng thei khempeuh pum ot mawkmawk lo- in, hih minam mailam vai geelna ah tem pukna anei zawdeuh mi tawm khat in pan nong lak ding uh ka lunggulh mahmah hi.

Hibang hun ading mah (for such a time as this, Esther 4 : 14) a Pasian in hong nuntak sak  hi mai lo i hiam guai aw ! I vaaipuak tolh sak kha lo- in, Nun leh nunpih taak, Sih leh sihpih taak ding in  hih hun ah nuntak siam tum dih ni. (  Let us live, A Life worth living and  A Death worth dying.) I biak i paai Pa Pasian in Kawlgam ah kilemna leh daihna hong om kik sak tahen!

..............................................

Source : Rev. Dr. Pau Khan En' Facebook Page.