GAL NIH A NEI KUMPI NASEMTE HI UNG

 #ZRAE na ngengen sangun ngaihsut huaithu 

#GAL 2 NEI KUMPI NASEMTE HI UNG

__________________________________

May 26/2021|Phualva Lungtuak Media 

Keipen Tan 8 sangsiamah khat ka hihi. CDM lutte misok te'n hong do ding a, CDM lutlote mipi te'n hong do ding ahih manin, ko pen gal 2 nei ka hi uhhi. 

Misok te'n ukna a buluh cil lai in lungphona ah kahih theih tawp in ma pangin CDM zong kalut pah hi. Misok te'n CDM lut te manin abanban in gilbem ah hong khum mawk uhhi. Kei zong mat dingin hong zong aa kalau mahmah hi. Ka inn ah giak ngamlo in kalawmte inn le khuanawl gamsung cihte ah kagiak kawikawi hi. 

CDM kalut a kipan ka khasum kasang nawn kei pah hi. Ka khasum ngak a tu dimdem ka innkuanpihte tawh zat ding sum le nek ding anletuite ka kitasam pianpian ta uhhi. Kha 1 paito lai le ka innkuan un anngawl ding cih thei kahih manin, April kha akipan CDM pan khawlkik in ka khasum kasang kik hi. Ka innkuan un nak thei zawdeuh ban ah misok te'n mat dingin hong sawm nawnlo ahih manin kalung nuamtuam mahmah hi.

CDM pan kakhawl kik khit ciangin mipi in CDM lutlote misokte tawh a kipawl hi, ci in amunmun ah hong kigen kawikawi ahih manin kalau mahmah leuleu hi. Lawmlegual le venglepam cihte in nidang bangin hong ho ziahzuah nuam nawnlo uh a, agal bangun hong en gap gap ta uh ahih manin kacih nading theilo in thanem in innsung ah ka omcip hi. 

CDM lut dinga hong tawsawnte le CDM lutlote amawhsakte tungah hih anuai aa teng gen nuam ing..

CDM lut ding hong hanthawn napi uhcin:

Misok te'n mat dingin hong zon ciangin na inn aa kongbuk vat ding bek zong nalau uhhi. 

CDM alut manin gilbem a tung te'n bangteng thuak hiam, cih gilbem ah nong en nawn kei uhhi.

Khasum ta'ng in kangah nading khasim in nong vaihawm sak zo kei uhhi. (Mihing ih hih manin ei mailam ciat kibuai hi)

Khasum itlah manin CDM lut ngamlo nong ci uhhi. Tua khasum dihdih thupi kasa het kei uh a, ahizongin an nelo in ka om zo kei uhhi. 

EO (Education Office) ah kumpi nasemte omna mun (Address) kim takin om ahih manin, misok te'n hong zong nuam le baih mahmah ahihlam nong theihpih kei uhhi. 

CDM lutlote bangmah theilo mihai hi/misokte tawh kipawl hi, ci in na mawhsak uhhi. Lai tawh ki navawhte in no sangin tangthu theizaw ding ban ah no sangin hai zaw samlo ding a, misokte adeihlohna uh zong no sangin lianzaw pek ding uhhi. 

Misokte ukna nuai ah keizong ka ut kei hi. Ahi zongin ei sa'ng a muanhuai zaw te tungpan ukna buluh zo khin ahih manin, kisutkik pak ding hamsa lai ding hi. (Hun in thu hong gen lel ding hi)

Khangthak ih naute nunnop nading luangkham in thaumuk mai ngat zeenin pang ni, na ci uhhi. Thaumuk kihta masa lo hi ung, ahizongin sih hun lopi in si nuam nai kei ung. Om nawnkei leng naupangte hilh manlo in kapilna tawh kabei ding pammaih ka kisa hi. 

Misok te'n hong man khin le hehpihna nei ngiatlo ahihlam na thei uhhi. Amawh atang khenlo in amat khempeuh tungah bangzah takin ngongtat cih nathei kei uhhi. Tua mun katun hun un nong en nawn kei uhhi. 

Misokte ukna nuai ah pilsinna kizangh thei kei, na ci uhhi. Laihilh ding pen misokte hilo a, Sangsiate ahihi. A hilhte ahilhsiam ding uh athupi hizaw hi.

Misokte ukna buluh pen kumpi nasemte mawhpuak bangin na ngaihsun uhhi. CDM lutlote amawhsak te'n no mimal mahmah in lungphona beek ah na kihel ngam ngei beek uh hiam? 

Mihing cihpen mipi in ih mimal lungsim hong khensat sak khuan omlo a, mipi deih bang bek in kalsuan ding cihzong om tuanlo hi. Ei sa'ng ahaizaw mipi pawlkhat zong omthei lua hi. Ei pen ei ih hi a, mipi pen mipi ahihi. Ei lungsim khensatna ciat kiheh sak theih omlo in kamu hi. 

A tawpna ah, ko Sangsiate in ''Naupangte laihilh in gam ading mipil mihoih tampi suakkhiasak ding'' ci in kiciamna kanei uh a, tua kumpi akah le laihilh ding/tua kumpi akah le laihilh lo ding cih kiciamna kanei kei uhhi.

A sawtlo in Sang kihong ding hi, CDM lutte sang pai ding uh a, a lutlote pailo ding uhhi. Kei kahih le, Sang kapai kei ding a, CDM zong kalutkik nawn tuan kei ding hi. Hih bang kagen ciangin alai ah om (a kai ngawi) nong ci uhhi. A lai ah ka om kei hi. CDM lah kahi kei a, Non-CDM zong ka hituan kei hi. Ka nasep laihilh simloh bangmah ah kapang nawn kei ding hi. Sanginn bek ah lai kihilh thei hilo hi. 

Misokte leh mipite athahat amanlang zaw belbel in hong mawhsak in hong manin hong hih masa lel ding uhhi. A hizongin hihthu khempeuh sangin naupangte ading ka deihsakna lianzaw hi. 

!Misokte azung amal in bei tahen!

Translated by SINTHU

#photo_crd - #Teachers_page

ZOMITE PI THIAN HUAI KAM VAIKHAKNA

 Ei Zomi te gam 3 na a tung khin khempeuh tate tute aw hih lai nong sim sak ciat nang un kong thum masa hi.

Pasian phalna om kei leh ei Zomi te gam 3 na ah kua mah i pai kha kei ding hi. Nidang in pilna nei te bek a pai hi aa, tuhun ciang in pilna nei lo bek tham lo in, a damlo, a cinglo teng leh puteek piteek te na leng i pai ta zen hi. Tate tute aw, mipil te gam, mihau te gam i tun ciang in agam kumpi te vai hawm siam na tawh, bang mah a sem zo nawn lo ahi kum tamte na ngawn in huhna sum hong ki pia lai aa, ei tum tak tek in an neek tuidawn, nikteen puansilh ki cing lai in nuam i sa ciat hi. 

Migam mi lei ah i om ciangin, i minam i ngeina a manthang loh na dibg ngaihsutna uh tawh Zomi makai te in kumsim in Khuado, Zomi Namni cih te nong vai hawm den uh zong makai te in nong geelsiamna uh thupi kong sa mahmah hi. Zomi te in "Ko Zomite" cin laphuak in " Zomi ka hi"  cin la sa in, khangno te nong om uh aa ka nuam mahmah hi. Mai  lamsang kumtampi i ngeina kipte i zat den theih nading in, hih US ah a suak te in  zong Zo pau zong a thei/zat/pau theih ding uh thupi ka sa mahmah hi. A hih hang i tu i ta te in i pau i ngeina a thei nawn lo om a hih man in a nu le pa, a u te nong siam mahmah uh kul ding hi. I pau i ngeina a theih kei uh leh, i minam i ngeina a mangthang semsem khak ding lam et om zaw hi.

Zomi te in minam dang te tawh ki bang lo in, i tate  pasal upa pen in innluah aa, a nu a pa te kem in a ki khoi hi aa, puteek piteek te ki kepna khawng ah i koih khak ding lau huai mahmah hi. Inn pan in na tate uh na hilhilh kei uh leh, kum 18 ong cing khin leh hong nusiat khak ding lau huai hi. I ngeina te na tate tung hilh in i kampau te zong hilh kei le uh cin khang 2 khang 3 khit ciang in, i ngeina i pau ong thei nawn kei uh leh mi mangthang i suak khak ding dah huai mahmah hi.

Tua ahih ciangin inn pan in nu le pa te mah in thupi ngaihsut in inn ah ei pau mah zangsak in hi leng haksa nai lo ding hi. Ei pau theihsak loh na pen haina hi aa, mangpau a thei lo te pen a pil lo teng hi.

Tedim khuapi sungah, Gawlkha minam te inn 3 khawng bek a om hang, a tate tute amau pau theih sak setset zo lai hi. Gam 3 na i tun zawh pen a tam zaw kum 10 ciang khawng hi pan ding aa, nu le pa mangpau a thei lo te na ngawn in, a tate Zo pau theihsak zawh loh pen ngaihsut theih loh man hi gige hi. 

Zomi te gam 3 na i pai theih na pen Pasian in a deihna om kei leh ki pai kha het lo ding hi. Pilna i neih loh hang in, a pil lo te zong Pasian deih nuntakna i theih na tantan ciat pan in citakna, thumanna, kiniamkhiatna, pumpi ki uk zawhna, teep le muam aa ki pan limpha a lak dingin hong deih na zong hi  ding hi.

I zolai zong inn ciat pan in Lai Siangtho simna tawh na ki pan sak ciat un. Lai Siangtho simna pen, Zolai siamna/sina, Pasian deih nuntakna le i tate lamman tot sakna ahih lam zong i phawk ding ki deihsak hang. I tate kum 12 hong kaan khit teh thu hilh ding baih nawn lo ding cih pen thupi ngaihsut ni. Nu le pa te pilvang in thu limtak ngaihsun ni.

Hihlai kong at ciangin mimal kong cihna hi lo in, i minam aa ding deihsak luatna tawh kong at a hihi. I om na ciat ah Pasian in ong cing ong kem ciat ta hen.

Pi Thian Huai 

Lungdam

TOPA HOIH HI, Topa lian hi!

TOPA HOIH HI

Key: G

Topa hoih hi, Topa lian hi Lungkham hun in hong huh a, Ama kiangah a beel mite Ama’n limtak hong kem hi.

Hong phat ning maw,

Toapa hong phat ning Na vangliatna lamdang si,

Thuk in zai e, Lamdang nong itna,

Ka belh suangpi To Zeisu

Lungsim tamkham, lam-et bei te, Meigong tagah genthei te, Leivui pan in nong lamto a, Zeisu hong itna bek hi.

Khasiangtho mit hong vaksak a, Itna khut tawh hong len a, Kei nong sap leh kong dawng ding a, Ka thu sim kong hilh ding ci.

HIBANG HUN ADINGIN

 HIBANG HUN A DING IN

( For such a time as this)

Esther 4 : 14

By Rev. Dr. Pau Khan En

Esther Laibu sung ah Judah mi khempeuh thah asawm mi gilo Haman vaihawmna a theih ciangin kongcingpa Mordekai in a tunu Esther kumpi nu kiang ah,  "Vaihawm khat naneih kei leh Judah mite bel lam khat peuhpeuh tawh suakta lel ding uh a, nang leh na innkuanpih te bel na si khin ding uh hi. Hi bang hun ading mah a hih kumpipa innsung khawng atung na hih mel kua in thei a hi hiam" na na ci hi.

(Esther 4: 14) Hih thu dapphah in " Hibang hun ding mah in anungta hoh hilo ding i hihiam? cih thulu atom mahmah in i en zual ding hi. Hibang hun ( such a time) i cih in :

Covid 19 hangin leitungbup tawh i buai khawm a, ki ukna vai (politics) hang in Myanmar gamkia i tang buai hi. Tual gal a tung hi mai hi.

Tua a hih man in,

a) i vai ding mahmah, a kician,  telmun mel om thei khia lo hi. (uncertainties) 

b) i mailam ding zong geelkholh, genkholh theih om lo hi.( unpredictable)

Tua ahih man in,

1. Pasian mah i muang tentan ding hi. Amah pen hong khahsuah ngeilo pa a hihi. ( Isaiah 4l: 10) Hong khahsuah ngeilo ding pa  zong hilai hi.

2. I minambup mah tawh i ki pom cinten ding hi. US  gam ah minam ki deidan na ( racism) a suuksiat mah mah laitak a netniam thuak mivomte a makaih Baptist Minister Rev. Dr. Martin Luther King Jr. (1929- 1968) in a mipih te kiangah, " I minam i tonkhop theih kei leh mihai bangin i hon sih ding hi. ( We must learn to walk together or we wii die together like fools) ci hi.

3. Ngaihsut i kikup na ah mimal thaneemna tawh kuamah i ki ko kei ding hi. Hipen Zomite i tual niamna pen leh i tha neemna pen a hi hi. Midangte eibang in mimal in kiko lo in athu kikum bek uh hi. Zomi te hong nungkaih ( draw back) alian pen leh mi i batlah na pen hih i mimal ( personal) kiko na hi- a, tua in mi hong bang sak zo lo hong tualniam sak pen pen a hi hi. Mipi lungsim hong paai sak zo lo in khuataa lungsim hong paai sak den hi.

4. Thuman (truth) tuh dih ni. I lungsim a eima' khensatna ah a man pen ding ngaihsun in tua i ngaihsutna (conviction) dinpih cinten ni. Tulaitak a i hanciam pen in zawhthawhthu leh ngongtatna (violence) ki ukna deihlo in, nial in tuahangin zong i mai ah mitampi in aluang uh na paai khin zo hi. Tuate zahtakna i pia a, ngongtatna nial in suahtakna paak bang in i lawh zawh mateng i kalsuan ding hi. Tuabang kuhkalna i neih zawh nading in eimah mah lunggulhna leh khensatna a hih ding kisam hi. Thumaan pen zawhthawh thu a kikaih paat zawh thu hi lo- in ei mimal mahmah in khensat in i minam tawh ding khawm a, i gam i lei i puah ding a hi hi.

5. I vai sah sangel ing.

I lungtup Federal Democracy tung le hang,  minam dang te bel bangtan ciang hiam khat kiging khin pian tek in om zo uh ka sa a, Zomi te bel a hici pi in omlai ka kisa hi. Tua hi- a, politics asiam leh thukhung siam hon khat hi thu ah nong kikup ding uh deih huai ka sa mahmah hi. A awng thei khempeuh pum ot mawkmawk lo- in, hih minam mailam vai geelna ah tem pukna anei zawdeuh mi tawm khat in pan nong lak ding uh ka lunggulh mahmah hi.

Hibang hun ading mah (for such a time as this, Esther 4 : 14) a Pasian in hong nuntak sak  hi mai lo i hiam guai aw ! I vaaipuak tolh sak kha lo- in, Nun leh nunpih taak, Sih leh sihpih taak ding in  hih hun ah nuntak siam tum dih ni. (  Let us live, A Life worth living and  A Death worth dying.) I biak i paai Pa Pasian in Kawlgam ah kilemna leh daihna hong om kik sak tahen!

..............................................

Source : Rev. Dr. Pau Khan En' Facebook Page.

INNKUAN BUAI THEIHNA THUBULPITE

 

INNKUAN BUAI THEIHNA THUBULPITE

By: Mang Tung Thang ( MIT, Insein)

1.Ei Innkuan masak loh man hi.

2.Pumkhat hihna a kinusiat khak man hi.

3.Siamna, Dikna, Nopna Cilzat luat man hi.

4.Itna man kha lo-in Ki-itna bek ih neih man hi.

5.Kilem ding sawmloh man hi.

6.Ngaihsut a kibat loh man hi.

7.Lunggulh kituak loh man hi.

8.Kithusim lohna leh kihawmtawh man hi.

9.Itna leh Ngaihna kipulak loh man hi.

10. Kam kup khopna atawm man hi.

11.Innkuan nuam ding gelkhak loh man hi.

12.Midangte tawh kithuah nopsak zawk man hi.

13.Kipahtawi theih loh man hi.

14.Innsung ah athupi pen zi/pasal akithupit sak khak loh man hi.

15.Innkuan annek khopna atawm man hi.

Innkuan ih cih pen pawlpi sung, veng sungah a thupi bulpi hong suak ahih manin innkuansung kilemin daihna a om ding ilunggulh penpen ahi hi.

“Kitang neilo napi-in kilem het lo” cih pen innkuan sngah a kiphu kha thei thu ahi hi. A pua lam pan en leng ahoih, akilem tawh kibang napi-in a thuakta dingin ha natna tawh kibang thei hi. Tua thute a ven theih kei leh innkuan buaina tawh kizomto thei hi.

INNKUAN SUNG BUAI THEIHNA BULPI 15

1.Ei Innkuan masak loh man hi.

Midangte hong pahtak zongin I buai manin mi’n hong pahtak hangin I pasal/zi pen a nalungdam thei logige ahih lam kiphawk kha lo hi.

          Tua amanin innkuan bulphuh lo nupa kalah buaina tam thei mahmah hi. Buaina aveng ding zong baihlo hi. Tua ahih manin Pasian ih um kei phial zongin ei innkuan mah a masa a thupi pen a koih ding na hi gige hi. Innkuan lungkimna a om khit the midangte ading: kalsuan ding pen anihna hong suak ding hi. Tua hi leh kitelkhialhna hong tawm ding hi.

2.Pumkhat hihna a kinusiat khak man hi.

          Nupa pen pumkhat ahihna a kinusiat ciangin innkuan sung buai thei hi. Nupa pen nih ciangin pumkhat asuak ahi hi. Nupa kaalah KEI cihna a om leh khat hi lo-in alang bek ahih manin a hemsuakin meel hoih nawn lo-in buaina kipan thei hi. Nupa cih pen NANG, KEI cih a omthei ding hi lo a, EI kicih thei ding thupi hi. Pumkhat hihna nusitna in innkuan sung buai nading kipan sak hi.

3.Siamna, Dikna, Nopna Cilzat luat man hi.

          Nupa suah nading hong khih lingleng khat om a, tua in hong kheng sak zo lo-in nupa akisuak ahi hi. Na zi/pasal in nang tung ah khenlah khat anei na hi gige hi. Midangte  ipiak ma-in I zi/pasal tungah ih siamna, nopna, diknate suahkhia-in lui masa leng I zi/pasal in nuamsa mahmah ding hi. tua ciangin nang tawh kiten khak hampha lua ing kicici-in innkuan nopsakna kidim ding hi. Tawmvei sung ih kithuah pih ding mite sang khantawn kituahpih ding innkuanpihte Siamna leh Nopna tawh phungvuah huai den hi.

          A innkuanpihte in Ka lawm Siamna, Dikna nagengen uh hangin ko theikha kei ung e, acih lohnadingin innkuan suang mah ah pat masak ding a phamawh mahmah ahi hi. Tua ih neih khinkhian siamna, nopnate ihkipiak khak loh ciangin buaina hong piang thein a hi gige hi.

4.Itna man kha lo-in Ki-itna bek ih neih man hi

          Nupa apiangsak, a kitengsak itna pen kum hong tam semsem the hong peng pianin, kicimtak pianta uh hi. Ki-itna (Iloveyou) in ait leh bek itin, Itna ( God is Love) in a it lote nangawn it hi. ( Zolai tawm tawm hilhcian leng) ki-itna ciang bekah kinga-in itna ih muhban kei leh kikhen ding zong haksa kisa lo hi. Ki-itna hong picin ciangin ITNA kip hong suak hi. Ki-itna bek tawh ahih leh kuanmah kimaibiak nuam nawnlo tuak in, ki-itna hong kikaak, kihal semsemin a tawpna ah buaina hong piang thei hi. Ahi zongin Itna anei mi-in kikhen ding ngaihsun zo peuhmah lo ding hi.

5.Kilem ding sawmloh man hi.

          Innkuan kilem ding pen kikup akul hilo-in khensat ding hi bek hi. Kilem ding kihanciam peuh leh thusia pen na kinkin lel ding hi. Kitawg kei peuh leng ahoih bangin kingaihsun khathei a, (kitot lohna pen kilemna kisa kha) kilung nopmawhna om sim thei hi. Tua kilemna in ih inn nuam hong sasak ding a, mundang kilunggulh lo ding hi. Kilungleng lo ding a, tua kilemna in itna tawh hong khihkhawm ding hi. Tua bang ahih loh ciangin innkuan sung kisongsawlawi thei hi.

6.Ngaihsut a kibat loh man hi.

          Ka lawm pen ngaihsut nabang het kei ei, ci-in lungsim sungah a kici giugiau thei ahi hi. I lawm deih (pahtak) nam I sep khak ding kisam mahmah hi. Khat in a lawm deihte masak lo-in ama hoihsak bangin a sep ciang, amah lah gim kisa mahmah, a lawmin lah thupi na salo thei a, tua bangteng panin buaina hang khang toto thei hi.

7.Lunggulh kituak loh man hi.

          Khat in nasep thupi sakin, Khat in kamkhum tawh kihona thupisak in, athupit sak akibat loh manin buaina hong kipan thei hi. Mi pawlkhat inn nupi/papi hi-in nasep bekbek thupi sak ahih manin a innteng (sawltak) I sak khak om phial hi. Tua bang a ih duh ih deih akibat loh ciangin zong sauvei leh nangkai kisa kha thei hi. Kitel siamna a om masiah buaina tawmtawm a om kiukiu ahi hi.

8.Kithusim lohna leh kihawmtawh man hi.

          Apasal/zi thusim masak pen ding hi napi athusim loh man leh hawmthawh khak manin innkuansung buai ding hong kipan thei hi. Kiteng khin cih nungsangin Kithusimna a om ding kitangsam hi. En thusim kei leng hong thusim sak ding tawm mahmah kha ding hi. Kilangpanna cihte zong om thei a tuate ih hepkhiat zawh ding thupi hi.Mi hong gawmtawm a kiteng cih lah hilo ih hihmanin  ih thusim ding adang himasa lo-in ih zi/pasal bek ahi hi. Zi/pasal vai thupi tawh aciahhak ciangin nalupsan, gim piana hawhna pan hong ciahciangin donlo a om cihbangte panin kikhasiatna leh Kam kilawm lo kipau thei hi.

9.Itna leh Ngaihna kipulak loh man hi.

          Zomite phadiak pen kiten khit teh itna, ngaihna cihte kipulak kik a kul dingin kingaihsun nawnlo mawk hi. Mi gen ka zak khat pen Zomi numei khat mangte tawh kitengin a pasal in nikhat a tawmpen khatvei “I love You” hing ci-in, tua hikei leh kikhen ding ci hi. Nikhat alawmnu in cikha lo ahih manin kikhen ziau ih kici hi. Zomite in hong it, ngai ing cih pen cilzat huai lua lawmlawm hihang, cizat huai lo hi. Khat vei kicih khantawn man sawm huai nawnlo hi. Nisim ki-itna thaksuak sak den ding kisam hi. Tua ahih kei leh Hong ngailai tei mah ahitam maw cih kilungngai, lunghiang thei a, athu hoih lo-in hong nungzuih thei hi.

10. Kam kup khopna atawm man hi.

          Khat leh khat kam kupna aom mel lo, hawhna ciahna zong kithei lo a omna pen baina kipatna hi thei hi. Tua ban ah kikum sunsun leh zong kam kidawn lohmanin kithadah suak thei hi. Tua takteh ei thu tekin kipai-in kilem thei mahmah lo a, buaina kipan thei hi.

11.Innkuan nuam ding gelkhak loh man hi.

          Mi pawlkhat pen kum sawtpi nuntak ding zong ut khol lo hi. Tuate pen en pak leng innkuan sung nuamsa khol lo hi dingin upmawh huai hi. Innkuan sung nuam a sate pen si nuam nawn lo phial uh hi. Mi kimin ih neih innkuan suangah a om thei ding nopnate seelin nop mawhnate thu ih neihsak ciangin nopna pen na kihemkhia thei hi. Bang hun ciang zatding ahitam ihsiamnate innkuan sungah kizang lo hi, si pak kha leng bangcih ding! Innkuan pihte khualna in ihsiamnate sitlo in zat huai hi. Innkuan Nuam suah ding thupi a koih masiah kinop mawhna in hong deep thei hi. Innkuan nuam suakding kimlai Innkuan buai kisuak thei hi.

12.Midangte tawh kithuah nopsak zawk man hi.

          I innkuan pih tawh kithuah sangin midang tawh kithuah pen hong nuamzaw thei mawk hi. innkuan pih ten thanemna hongkawk thei in, midangten ih hoihna hong pahtawi-in  hong lungdam sak thei ahih manin,  midang tawh kithuah anuam zaw hong suak hi.Tua nuam ih sakte tawh kum tampi kithuah leng akicimtak ding ih hih lam kiphawk kha lo thei hi. Mi pawlkhat midang tawh kithuah leh nui zuaizuai napi-in inn sung ah mai gum ngeungau thei hi. Inn sung ah nuih ding akhak khat omleh kilawm hi. Tua bangin midang tawh nuam isak zawk ciangin innkuanpih tawh kithuah ding lunggulhna kiam ahih manin buaina kipan thei hi.

13.Kipahtawi theih loh man hi.

          Innkuan sung ah asiamte  a siam bangin ih kipahtawi siam kei leh khasiatna om thei, kilungnopmawhna om thei hi. Nuam hun ciangin kinuampih thei-in dah hun cing zong kidahpih theih ding thupi hi.  Ei innsung pen midang innsung tawh tehkak khak ding zong hi lo hi. Khat veivei kiphat thei le hang zong aheh omkhol lo ding hi. Midangte zong lungdam sak thei ih hih leh sawm peuh le hang Innkuan pihte lungdam, lungkim sak thei kihi hi. Khat leh khat kipahtawi in  kiphat kei le hang utlohpi teng piang thei hi.

14.Innsung ah athupi pen zi/pasal akithupit sak khak loh man hi.

          Nupa a pil/siam ta kei zongin tua innkuan sung a dingin athupi pen ahi hi. Na innkuan sung ah athupi pen dingin midang napahtak khat kikoih thei lo hi. Innkuan sung ah athupi pen in Zi/pasal hi pah hi. Zi/pasal lo in ma kinawt thei lo hi. Tua lo-in ma ih nawt khak ciangin athupi pen ki-awlmawh lo cih suak ahih manin tangtel sihtan abang om thei in buai ding hong kipan thei hi.

Innkuan sung tate hoihna ding ih deih leh Zi/Pasal kithupi sim mahmah ding kisam masa penpen hi, hih pumpi khat pen nih asuah teh nadang teng apai dan dingin pai thei lo hi. Motor tawh kibang hi a, apei lang khat hoih lo tawh gamlapi kitung lo in buai na kipan thei hi.

15.Innkuan annek khopna atawm man hi.

          Innkuan thunget khop, lasak khop cih khawng a nuam mahmah khat ahi hi.  Tua ban ah innkuan an nekkhop thupi sem hi. Tua ban ah nek kibang ding, gimnam kibang ding zong thupi hi. Vai thupi nei lah hisam lo innkuan an nek kingak mel lo cih bangin a om ciangin innkuan lungsim kihual thei lo hi. Innkuan sung ah nipi khat in khatvei zong thunget khopna , an nek khopna a om loh takciangin mapan khop hong tawm ahih manin thu leh la kitukalh thei hi. Innkuan lutang Muhtheih pen PA hi-in, muh theih loh pen PASIAN ahi hi. Innkuan in Pasian tawh vai kihawmkhawm ngeilo ahih manin asawt2 ciangin buaina lam manawh ta hi.

Thukhupna

          Atawpna ah mi hoih suahding bek kingaihsun thei in, Nupa hoih suah ding kigel lo thei hi. Nupa hoih hi leng minuamsa, nupa nuamsa kisuak in innkuan nuam sa kisuak ding hi.

          Electric mei pen Nu leh Pa in na asepkhop teh mei tangin khuavak hi. Ahi hangin tuate gel kizom khial leh meikuang in Inn kangin lauhuai mahmah hi. Tua (+)leh(-) in na zopna aman ding, na sep khop theih ding thupi mahmah hi. Nasem khawm leh na lianpi sem zo hi.

Tua hi a Innkuan nuam suah ding, ileitung tomvei nuntak sungin a thupi pen leh vangam malep bang ahih manin innkuan sung nuam sa-in ki-iplahin kilemna, pumkhatna tawh I innkuan lamzawhna dingin I kideihsak pen thu ahi hi.

Kawlte in Innkuan pen (eng-Thawng) acih zah khat un Nuam asalote adingin Thawng(jail) hi thei takpi a, Nuam asate adingin Vangam malep asuak thei lua ahi hi. Cilbawl lo-in ih siamna, ih diknate innkuanpihte adingin pia mengmeng ni. A mau hong lunggulh pi pen tua mah ahi hi. nupa suaksa kikhen ding pen pammaih lua ahih manin ki-itna en itundong delhni, kitelsiamna tawh inkuan nuam asuak dingin Topa itna thupha I kipaih hi.

          Innkuan nuam suah ding deihsakna tawh, Topa thupha.

June 22016

 

 

NGAIHSUTNA BEHLAP NI! Sia. JM Paupu

 NGAIHSUTNA BEHLAP NI:

J.I. Packer in, "Tulai biakinnte ah mite' nopsak nading kilim ngaihsut lua ahih manin "Tuilum sung kidiah biakna" (Hot-tub-religion) tawh kibang hi. Mi hong kikhawmte'n nuam sa khia mahmah ding uh a, ahih hangin kikhelna om lo hi," ci hi.

"Tuhun Pawlpite ah kikhelna (conversion) vai pen Psychology in khek khia hi. Tua hangin kikhelna om loin, ngaihsutna damsak i sawm uh hi."

"Kammal zat siamna, thugen siamna kicite kha-mi (spirituality) hihna hi lo hi. Thu hoih la hoih gen ziahziah theihna zong na hi masa tuan lo hi. Ama gamtatna in a zuih kei leh amah leh amah kikhem ahi hi." Jackie Hill Perry.

"Dawimangpa in zong Lai Siangtho deihna mun na nei a, Late 91 sung zangin Jesu na khem hi."

 

"Moses in a mi Israelte a muhtheih loh uh Pasian musak a, a muh nailoh gam uh musak hi," Rev. Dr. Khen Tombing.

"Leitung vai pen a nuihzakhuai hun zong om hi. Na huang sungah diamond mu leteh kumpi aa hi dinga, ahi zongin drug kimu leh nanga hi ding hi"

"Na kamzat (pau) pen Mother tongue "nu' pau" kicihna a hangin insungah pate'n pau hun ding ngah man mello uh hi."

Sia JM Paupu

ITNA TAWH KITEN KHIT CIANG

 

#ITNA Tawh KiTen Khit Ciang

💞Itna tawh pum khat ih suah khit ciang in ngim na le tup na zong kisam lai hi.

     Nupa in ngimna tupna, na neih tuan kei le nu pa kal ah kihawm thawh na om thei ve ve hi.

💞Itna tawh ih kitenkhit ciang in nek khawm dawn khopna zong kisam hi.

     Nupa hih khit ciang in an nek hun kiton lo cih zong om thei aa tuate in nupa kal hong susia thei lai hi.

💞Itna tawh kiten khit ciang in sepkhawmna zong kisam hi.

     Zi bek" in sem,pasal bek" sem cih bang hi thei lo aa nupa aa ih sep khop kei le kineumuhna zong om thei hi.

💞Itna tawh kitenkhit ciang omkhop ding zong thu pi hi.

     Nupa hih khit ciang in nupa ki khen,kigam la leng kikhenna piang thei aih man in nupa omkhop den ding zong thu pi hi.

💞Itna tawh pumkhat suah khit ciang in kitheihsiamna le kimaisakna zong kisam hi.

     Nu ih hih khit ciang in ih hat loh na,ih damlohna,ih kicinlohnate ih kimaisak zawh kei le nupa kitotna piang thei lai hi.

💞Itna tawh kitenkhit ciang in kithupit sak na zong kisam lai hi.

     Kiteng khin lel hang ci in kinawlkhin ding hi lo aa kinek sem" in ih zi ih pasal mah ih thupit sak ding kisam hi.

💞Itna tawh kitenkhit ciang in  kiniamkhiatna zong kisam hi.

     Nupa ih hih khit hang in kinial nawn lo ding,kitawng nawn lo ding cih hi lo aa nupa ih hih khit ciang in kingaih lai sang in kiniamkhiat zawk ding hi lai hi.

💞Itna tawh kiten khit ciang in han ciam na kisam lai hi.

     Nupa hih khit ciang in nu pa kithutuak aa inn le lo ding,nek le dawn ding, puan silh nik ten dingte ih nupa aa ih hanciam khop ding kisam mah" hi.

💞Itna tawh kiten khit ciang in cil dan,zeksiam dan zong kisam hi.

     Nupa ih hih khit ciang in ih nek ih dawn ding ih zon kul aa sum le paaite tha lawh kul aa tua ciang in sum zat siam na,ciltheihnate hong thu pi mah" ding hi.

💞Itna tawh kiten khit ciang in kihehpihna zong kisam mah" hi.

     Nupa cih pen mi 2 pen 1 hi ta ahihman in khat sep zawhte sem khawm aa,khat puak zawh lohte pua khawm aa khat thanemnate ih kitha piak ding kisam mah" hi.

💞Nikhat niciang

                  Page. Follow. Share. Like credit: