NA HOIHNA DING IN AMAN HONG THUAK+**

NA HOIHNA DING IN AMAN HONG THUAK

Nidang in Khuapi khat ah Nuta Innkuan khat om in, Inn that/sawng 3 na ah om uh hi.Tua nupi nu in a tano numei ih musak in a ih mut kalin inn nuai ah van lei-in vapai hi. Kamsiatna tawh tualai tak in a omna uh Inn that/sawng 2 na panin Inn hong kang lualua a, Tua nupi nu in Inn kang amuh takciangin hong delh vangvang hi.

Ah Inn uh hong tun takciangin Inn tung ah kahto ding acih leh melkuang phalua ta ahih manin anu kahto thei nawnlo hi. Tua lai takin Inn nuai panin Tua numei no Kahna aw kiza ziahziah a anu in lah honkhia ngam nawnlo in Inn nuai lam ah kata nu hong hot sak un ci-in awngawng ta leh kua mahin huh ngam vet lo hi.

Tua bang hunlai takin Motor hoih sim khat panin Pasal khat hong pusuak a, Nupi kiang koih ah hiam ci-in hong dong ah Inn tungpen khansung ah katano ka sial om hi. Si ding hita hi hong ci hi. Tua ciangin tangval pa in ippi khat kikhuh in Kahlei tung ah kahto samsam in Tua numei no akap2 pen A ippi tawh hong tuam in ah angah hong pom in Mei kuang zuai2 lak ah step kahlei zui-in hong tuaksuk hi. Inn nuai hong tun takciangin tua tangval pa hong tuksuk in khua phwk nawnlo a numei no pen ippi tawh hong kikhuk suk bang mah ci lo-in anu kiang ah cidam takin hong tung thei a anu lungdam mahmah hi.

Tua bang laitak in tua tangval pa pen mei kuangin ahulna asamte amaite kang gawp ahih manin khuaphawk lo in Zato kipuak pah hi. Kamphatna tawh tangvalno pa zong hong dam zosam in ahih hangin nidang bang nawnlo in amai leh akhut ah meikang pawn tawh hong kidim in amel ngei hong bang nawnlo a nidang a melhoih mahmah Tangvalno pen tun putek hong bang mawk hi.

Tua numei no pen hong khangtoto in Pilna siamna hong nei in, 2016 Zomi Melhoih Model cih bangin Tua khuapi kim le gam ah Melhoih pen Model hong ngah hi. Tua bang in Melhoih hong ngah takciangin Mi tampite in pakta in ngaih bawl mahmah uh a, Khua kim khuapam panin tua numei hel in tangval melhoih, mihau, mipil kituah khengkhang zel hi. Tua bang lai takin tuakhua kiu ateng tangval melsia mahmah khat hong hawh zel a, tuanu hong helzel hi.

Tangval melsia mahmah khatin hong helzel in midng te lak ah pau zong paungam lo in hong tukhinkhian zel a, nitak bang midangte sangin ciah hak zaw thei zel hi. Tua nu in hoihtak zong hopih nuamlo ban ah, midang te tuisuah in alim thei2 pia ta leh amah pialo in nawlkhin den hi. Tua bek hilo in kamkha leh kamsia tawh hopih thei zel hi.

Nikhat niciangin thuakzo nawnlo ahih manin anu kiang ah hih mi melsia pa inn ah hong hawh den mihau milian mipil hihzah lai ah zum huai lua, ei zong melhoih pen kihisam  ahih manin hong hawh lohna dingin genin hong hawlkhiat sakin ci-in anu kiang ah gen hi.

Ni khat anu in atanu samin hong hopih a, thu khat hong gen ning. Na neu lai in Nang na ih mu a lupna ah kong sial hi. Tuakal in Inn nuai ah van lei-in ka pai kalin ih omna inn uh hong kangin hong hon un, ka tanu honglaksak un ka cihcih hangin kuamah in hong langam lo hong huh ngamlo hi. Tua bang laitakin ih khuapi sung a Pasal a melhoih pen amin thang ahi Tangval no pa in ka awtot azak ciangin nang huh dingin inn tung lam ah ippi sihin hong kahto a, nang cidam takin keikiang hong tunpih hi. Amah Nang hong huhna in kanggawp in khuaphawk lo in Zoto kipuak pah hi. Zato panin hong damsam a ahih hangin mibang nawn lo in amai leh akhut te ah mei kang apawntawh kidim in, Nidang in melhoih pa pen tun melsia pen suak hi. Tua pa pen tu a na huat mahmah melsia pa ahi hi. Ama hangin nang tun Melhoih leh mideih pen asuak thei hi teh ci-in a nu in atanu kiang ah hong gen hi.

Tua ciangin atanu in hong ngaihsunsun in aw, Kei kakhua theih ma-in amah Melhoih pen a na thang a tun amah kei hangin Melsia pen suak a, kei tun ama hangin melhoih pen leh mite deihpen suak hi-ing ei ci-in hong phawk takciangin, Bangzah ta in midangte pilin, hau-in, hoihta leh Tuni a kei hang a amelsia pen hong thuak ka umah ka nuntak sung a dingin tel ing, pom denning ci-in kitui lungsa in alungsim hong khensat hi.

Tua panin tua a U melsia mahmah pen kiangah hongpai-in nidang ah ka theih lo man a kong bawl khakteng hong maisak in Tuni a kipan in Ken nangtawh ka nuntakna zangkhawm dingin nang adingin kong kipiata ci-in angpom in hong gen in, Mihoih, melhoih, mipil, misaim, mihau zatam lai ah nang bek kei adingin ahoih penpen hi teh Ka bangkim nang a hitang ci in hong ki-ap hi.

_______________________

Tuni in ih nuntakna sung ah Jesuh zong ei ading in damna ih ngahna dingin  amah hong kisat nim, Nang leh kei hoihna ding in amah ahoih lo pen in kibawl, Nang leh kei hauhna dingin amah azawng pen hong thuak, Nang leh kei nunnopna dingin amah haksa pen hong thuak, Tuni in kei sihtang dingin Jesuh hong si, ci-in amah ih pom hunhun in amahin hong sangding a, leitung vantung ah amah tawh nuamtakin ih nungta khawm ding hi.

Asimkha mimal tung ah lungdam!

Siam Khaute

July 916

NU LE PA THUMANG ANAH LAWH PEK (II)"""

NU LE PA THUMANG ANAH LAWH PEK (II)

Nidang lai-in khuakhat ah Innkuan khat om a ta numei 2 nei uh hi. Apa in aneu lai un sihsan ahih manin anu bektawh hong khuasa uh hi. Atate sang khahna ding leh nek ding dawn ding anu bek mah in nisim in zong zel a, u nau pasal om lo, pa omlo ahih manin khuapihte in simmawh mahmah uh hi. Tua bang kawmkal ah atate hong khang lianto in hong nungakto ta uh hi.

Singtang gam ahih mah bangin Aneu vua kipanin anu in Tuk lam ah THEIPI vilzel in tua tawh atate hong en,vak toto hi. Zo lam ah a nu theivil in apai zelzel ahi hi. Tua mun ah thei avil ciangin thei pen gah hoih mahmah, amin zong tam, agah zong gol thei mahmah in seng dimdim pua in Inn lam aciah zelzel in Inn atunteh atate gel in tua theite ne-in, alungdam mahmah uh ahi hi. Nikhat tua mun mah ah vapai a thei lawh laitakin Pasal aw khat in hopih hi. Inn ah ta na nei hiam ci-in dong a, ta numei 2 nei mah ing anu in ci hi. Tua leh tua aw in Na tanu khat tawh hong kiteng sakin tua hi leh nidang ciangin thei navil ciangin gahpha mahmah ding a, tuk leh khal leh lungkham om nawnlo ding hi. Tua ahih kei leh hih theite kong losak nawn kei ding hi. ci-in agen ciangin anu in aw na ci hi. Anu in ngaihsunsun in lamdang sa mahmah in atate kiang gen ngamlo hi.

Nikhat thei vil dingin apai kik ciangin athei te minlo in puam elal uh a, kumkhat pen minmahmah in zong limci mahmah a, ahizongin sang lua mahmah hi. Tua phuang ah adak toh laitakin Tua Thei kungtung panin GULPI khat in hopih a Natanu tawh nong kiteng sak ding hiam, Nong kiteng sak leh hih thei kong losak ding hi. Tua bek hi lo nidang ciangin zong Hih nakim leh pam a theikumte min pha mahmah ding a, niam mahmahin na deih bangin na lo thei ding hi hong ci hi. Tua nu in Thei pua lo in ciah leng lah katate agil kial ding a, ta nute gultawh kiteng ding cih lah ngaihsun zo keng ci-in hong lung gel hi.

Atawp ah neik leh dawn ding mah hong lunghimawh ahih manin hong kiteng sak ning ci-in dawng a, tua ciangin Tua Gulpi in tua theikung tung a gah limci mahmah te niamsak suk in tua Nupi nu in asengdim taklo in hong cih a, inn atun teh maitai het lo in Inn ah hong tung hi. Theipi atanute gel tawh hong nek kawm in, tua thupiang teng hong gen a, Atanu upen kiang ah Nau nang tawh nong kiteng ding hiam ci-in atanu upen hong dong hi.

Ata nu in nu aw Gulpi tawh kiteng ding nong cih lawmlawm nasa lua in hong mang zo kei ning ci-in thal nial pah a, anu pau ngam nawn lo-in tuateng tawh zan hung hong man to hi.

Azing ciangin nek ding dawnding omtuan lo ahih manin Theipi avilna Zo lam ah hong pai leuleu in thei hong vil leh Gulpi in tua bangmah in na dong leuleu a, Nong kiteng sak kei leh thei konglosak nawn kei ding hi acih ciangin, aman zong hong kiteng sak mah ning ci-in dawn in thei sengdim tak pua in hong ciah kik leuleu hi.

Nitak ciangin anu in Nau aw Na u lah utlo mawk a, ei ih nuntakna haksa lua mahmah a theipi bek mah tawh akivak ih hih manin Nang nong kiteng diam ci in atanu neupen kiang ah agen ciangin atanu in Nu aw nang kiteng in na cih ahih nak leh nang cihbangbangin gamta ning  nu aw ci-in atanu neupen in hong thukim hi.

Nikhat theivil in pai kik leuleu a, Tua bang mahin a Gulpi in acih takciangin a nu in hong kiteng sak mah ning Hong zui-in acih takciangin Gulpi in, tua nupi nu hong zui nguainguai ta hi. Anu zong sengdim in thei gah hong pua kawm in Inn lam hong zuan a anung ah gulpi khat in zui guaiguai mawk ahih manin khuapihte muh ding, mi simmawh kawmkal ah amai zum mahmah ding hi.

Inn hong tung takciangin tuagul pi zong Inn sung ah lut nguinguai a, Ata nu neupen tawh hong kiteng saksuak mawk hi. Zingsang khuavak ciang in Tuagul pi pen Innka tung ah kualvenvan in nisa lum awi zel a, Khuapihte in Theivil zel nu atanu gulpi tawh kiteng cih hong theih takciangin lamdang lah sa, simmawh lai, tanute gultawh kiteng cih mahmah ci-in phun kawm leh munuam in hong tai henhan uh a tuagulpi Innka tung a kual venvan pen hon gen uh hi.

Anu zong thei avil mah bangin thei vil zel a, thei te pen minpha lua zong apumte nidang sang limci zaw in gahpha semsem ahih manin anu lungdam mahmah hi. Nikhat anu in zingsang ciang lah Gulpi inn katung ah om zel zanciang atanu tawh lumkhawm zel cih pen alungsim ah ngaihsun thei mahmah lo ahih manin Nikhat Za alup khit uh leh Zankim in thosim in atanute nupa va en sim hi.

Atanute nupa ava etsim leh Gulpi a ahpai nguai2 zel nisa lum awzel pen Ata nukiang ah Tangval mel hoih mahmah khat a n alum hiuhiau mawk ahih manin amah zong pau lo in alupna ah pai kikin ih mu a, zingsang teh tua tangval papen Gulpi bangin innka tung apaikhia nguainguai in nisa lum awi zel hi.

Kal khat bang hong cinteh anu alungnuam tuanlo ahih manin nikhat a et kik leuleu leh Tangval mel hoih mahmah khatin na lumin avang bang tang lian a, alupna nuai a et leh Tua tangval pa kituamna gul vun/lip pen kizial in om ah muhteh anu in tua selsim sak hi. Nupa te zingsang hong thawhteh Tangval pa akisel na gulvun na om nawnlo ahih manin kisel thei nawnlo a, mihing mah bangin hong om khia in kisel thei nawnlo hi.

Tua takteh khuapih tuipihte in Gultawh kiteng ci a asimmawh mahmah uh, tua thu azak uh teh a en dingin hong pai ngeingai leuleu uh a, Tangval papen mel hoih luakisa avang bang tang heuhau liang hi.

A U nu-in amuh teh anau nu eng leuleu in A nu kiang ah kei zong kapasal ding gul hong zon sakin ci leuleu a anu in athei vilna lam ah gulkhat mah tawh kimu a tuagul atanu a dingin hong tonpih leuleu in, Kalkhat khit teh anu in atate bang acimah hiam ci-in ava et leh atanu gulpi in na valh in, na valhtum dekta ahih manin anu in temta la in atanu honkhia kik hi.(atom a ihgelh pak hi)

Nu leh pa thuman pen Pasian in Nu le Pate tung ah thupha akoih ahih mah bangin  NulePa thumangte Topa in thupha hong pia a, A u in ama deihna tawh azonsak takciangin sihna tuak lawh dek hi. Tuni in Nu leh pa thumanna in Lawhcinna hong tun hi cih mangngilh kei ni.

Lungdam

Siam Khaute

July 4,2016

Add caption

NU LE PA THUMANG ANAH LAWH PEK (I)

NU  LE PA THUMANG ANAH  LAWH  PEK (I)

Neu lai  a Tangthu theihte kepna in pawlkhat gelh dih ni e,

Nidang lai-in ah Khua neu khat ah Innkuan khat om a, tuate nupa in ta Pasal thum nei uh hi. Gal le sa tamlai  ahih manin up mawh lohpi in apa in atate neulai in hong sihsan in tua tate anu bektawh hong khuasa uh hi.

A nu-in atate avakna dingin nisim in lokuan ban ah tuk sungteng Theipi vilzel in tuatawh atate hong vakto zelin Asawtsawt ciangin anu in guahpi nuam a, lokuan in theivilna hangin akhua hong sikin aci nasia takin hong na hi. Akha bang cina in Inn ah hong om takciangin dam zo nawn lo ding kahih manin ci-in nikhat anu in atate hong samkhawm in thu hong hilh hi.

Tate aw napa in hong nunsiat nungin haksapi in ih nungta to a tun kacina lua ahih manin damzo nawnlo ding, na pakiang lungkham dahna beina gulgal kingakna munah pai ding kahita hi tate aw, ih neihsa lah bang mah om lo ahih manin ih neih sunsun ih suangthu thumte na paina navuah khattek na pua un la, Khuapi lam nazuan un cin in anun hong vaikhak hi. Tua khit ciangin atate tawh kingawng kawi in khitui luangin, hong kipawm uh a, asawt lo in anu in hong nusia ta hi.

A nu-in hong nutsiat takciangin anu in avaikhak mah bangin asawt lo-in khuapi lam zuan dingin hong kithawi uh a, a unau un anu vaikhak bangin athuk uh suangtum khatta hong pua in hong paipai uh hi. A U pen in naute ngak zolo ahih manin hong paisan in lamkal ah asuangthuk zong giksa ahih manin, hih kimanna nei lo Suang thuk ci-in pai a, pai vingveng in Khuapi khat hong tung a tuateng ah, atom in genleng Khamtheih guih theih tawh hong khuasa in atawp ah mite na khawng gu-in thong ong tung hi.

A u nihna pen zong atawp2 ah anau neupen ngakzo lo ahih manin asuang tum puak pai in anau nusia in hongpaipai leh khuapi khat mah hong tung in tuateng ah a u bangmah in leitung nopna teng tawh hong nungta in atawp ah thong inn sung ah hong tung kik hi.

Anau neu pen ahih leh asuangtum mah pua in hong paipai a,… nitak nitung dekta ni in galmual teng hong kap silsial in tuate amuh teh anu tawh akithuah laite hong phawkin, a ute in taisan sawnsawn ahih manin alung hong leng mahmah in galmual nitak silsial te hong en in, Athuk anu vaikhak suangtum hong pom in amittui hong tak datdat hi.

#Tun aw hong ngai ing ei, na von no khattang sawl bang hei ing e, hong khawl aw tun laukha zua laukha aw ci-in lungzuan zatam hong sial hi.

Tua kawmkawm in agal khat lam aet kik leh khuapi et lawm mahmah pak silsialte hong gal muh a amittui hong nul in katun lungtup na mun galin dontang ei, ci-in a luankhi nul kawmin hong pai leuleu in sawtlo apai khitteh gal a ni tang silsialte hong mangta ahih main khuamial dingin lengthete hong khuang ciaiciai a, amah zong bang le bang leh ci-in Singkung zam didiai tung khat ah hong kahto in adawn ah kabom ah hong tu-in tuazan, tulsing dawn ah lungzuan zatam sial in Nu ngaihna, ute ngaihna sial kawm in asuangtum tawh hong ih mu hi.

Zan takciangin Anuai lam ah hong ging sialsial khatzavat in hong khang lo a, atuanna singkung phung aet sut leh Gulpi khat amit tang lela in hong khakto a, hong Tulum, hong neding aive maw cih lungsim tawh laumahmah in singkung tung ah tang ngamlo in asuangtum (thuk)pomtinten in agul hoihtak in hong en hi. Agul in naih toto ahih manin akiang nai mahmah hong tuntak ciangin aman zong asuangthuk tawh alu deng a, tuagul anuai ah kiasuk in, tua akipan zingsang khua vak dong ihmu ngam nawnlo in singkung tung ah lau kawm, lungleng, nulepa ulenau ngiahna tawh zansung hun hong mang hi.

Zing sang phalvak khua hong vak hiuhiau a anuai aet suk leh tua gulpi si pen kiang ah Gul nei khat hong pai mu a, tua Gul in akam ah singteh hing sitset khat pet in hong pai hi. Tua gul neu-in asi Gulpi kiang hong tunciangin Gulpi asi lutung ah tua singteh hing hong pei leklek leh agul hong tang in hong hinsawm mawk ahih manin amah zong kumsuk samsam in Tua Gulneu pen Ciangkang tawh satlum in akam a ahpet Singteh hing sitset pen a-ip sung ah pua in akhual zinna hong zom kik hi.

Asawtlo in agal muh khuapi hong tung a, tua khua nawl hong tun takciangin khuasung pen gamlum henhan in kahna aw, tangkona aw kiza ngeingai ahih manin amah zong lamdang sa in hong dong hi. Tua lai takin Tua khuapi a Kumpipa tanu na si ahih manin Kumpi pa dahlua mahmah a agammite kiang ah Katanu kua-in hing kiksak thei ding ahihiam? A hing kiksak thei aom leh Katanu tawh kiteng sak ding kham le ngun tampi leh kagam phel langkhat pia ding cih thu hong za hi.

Tangval no pa zong hong paipai in Kumpipa inn, misi omna lam hong zuan a, mitam mahmah ahih manin amah zong damdam in tua mite lak ah hong lut a, Kumpipa tanu kisial na mun hong tung hi. Tangval no pa in zong aip sung a singteh hing sitset apuak hong lakhia a, tua singteh asi Kumpipa tanu taltung ah hong pei leklek leh Kumpipa tanu hong hing kik mawk a mipite in lamdang sa mahmah in Kumpipa lungdam lua mahmah hi.

Kumpipa in akamciamsa om bangin Tua tangvalno leh atanu hong kiteng sakin Gamphel lang khat ukna pia in Azi tawh nuamtak in hong khuasa uh hi. Hih bangin Kumpipa tanu tawh kitengin hau mahmah in, agam phellang khat aneih hangin alungsim nuam khit tuan lo a, Alungsim sung ah ka sanggamte koi ah om hiam cih ahi hi.

Tua kawm mahin asanggamte hong Kankan leh Tuakhuapi sung ah thong inn ah a-om lam hong thei ahih manin Nikhat vapai in A ute gel thong panin vala khia in nuamtakin asanggamte tawh hong nuntak khawm kik uh hi.

Hih tungtawn in Zomite Paunak ah “ Nu le Pa thumang Anah lawh pek” cih kimu thei a, Nisim ih nuntakna sung ah Nute Pate thumanna pen Pasian deih hi a, Na Christian nasep uh hi ci in Kolose3:20, efasa 6:1 ih muthei hi. Topa in Hih tangthu tungtawn in ih nulepa thumang siam dingin Asimkha mimal khat ciat Topa hong lamthak hen!

Lungdam

Siam Khaute

July 4,2016

A BANGCI PA KA HI HIAM?

A bangci Pa ka hi hiam?

Khangno tampitakin zi deih mahmah(zi neih ding kin mahmah)hinapi-in, Pa' dinmun taktak ah dingnuam lo thei mawk uh hi. Zi nei ding ihih leh i zi tawh i ki-it i kingaihna ciang bek tawh lungkim ding hi hetlo a, mai lam hun ding saupi ngaihsut kholh kul hi. Tanu tapa khawng nei leeng bangci pattah in, bangci khansuah dinga, innkuan nuam bangci lam ding ihiam cih khawng nak ngaihsut kholhhuai mahmah hi. Hi bang ngaihsutna neilopi-in, zi kimawk neih gawp thei ahih manin, leitung bupah nupa kikhenna leh innkuan sung buainate hong om pian den hi.

Pa khat ihih khit ciangin, hoih den, kicing den cih bel omlo mah dinga, ahi zongin Pa hoih khat hih zawh nading i hanciam det ding ahi hi. Koimun koikuam ah hei-in, bangsem bangbawl in i om zongin,  zi leh tate mah mangngilh hetloh ding thupi hi. Tua bang ihih nak leh i zi leh i tate'n hong theihpih pah kei zongin, Pasian' muhna-ah a phattaak leh a pahtawihuai Pa khat ihi gige hi. A pahtawihuai leh a phattaak Pa pawlkhat a om mah bangin, a pahtawihuai hetlo leh a phattaak hetlo Pa pawlkhat zong na om veve hi. Pasian it-in a zahtak Pa peuhmah in a zi leh a tate it dinga, innkuan lutang ahihna a mawkna suaksak lo ding uh hi.

Thu a thei nai mello na tate' mai lam ding na ngaihsutsak zel hiam? Tate'n Pa a neih mah bangun a Pa uh tawh omkhawm le-uh ut mahmah uh hi. Lawm leh gualte' lakah a Pa uh kisaktheihpih nuam ciat uh hi. Ahi zongin Pa pawlkhat in tate taisan thei ahih manin, nu leh pa nei pipi tagah tangh kitam mahmah hi. Pa tawh a omkhawmlo tate in, sangkahna khawng leh munkhatpeuhpeuh-ah pai le-uh simmawhna leh kosiatna khawng thuak thei zel uh a, tua bang hun ciangin amaute' lungsim naa mahmah hi. Hi bang dinmunte i mitkha-ah bawl zel in, "A bangci Pa ka hi hiam,?"  cih khatvei ki ngaihsunkik ding hi hang. Topa'n hong telsiamsak ta hen. Pa khempeuh tungah cidamna leh khansauna om hen la, zi leh tate' adingin Pa hoih ahi zo ngiat dingin, Sian in hong siam ta hen.  Amen!

Itna leh deihsakna tawh, Khazih sungah, David Tuang

ZI PIL - HIH TENG BEK ZONG THUPI SA ING""""

zipil
Agelh - GSPau

1. A pasal' ukna mang hi.
Numei' thuneihna bangkua sung leh pawlpi sung cikmah hunin nuam ngeilo hi. Bang hang hiam cih leh Pasian in numeite pen thunei lutang dingin a bawl hilo a, pasalte ahuh dingin a kibawl hi zaw hi.(Pian 2:18 ) Pasal' lutang in Khris ahih mah bangin zite' lutang in a pasal ahi hi. Tua ahih manin zite in na khempeuh ah a pasate ukna a man' ding uh ahi hi. (Efe 5:23,24) Hih pen ei' deihkaih gawp pong hi lo-in Pasian' kammal Lai Siangtho' gen thu ahi hi.

Khatvei England kumpinu Queen Victoria, a pasal Prince Albert tawh kikamtam kha uh ahih manin nuakin vakkhia vingveng hi. Hong ciah ciangin a pasal in kong na kalh hi. A zi in kongkhak a kiuh ciangin a pasal in theigigepi mahin,"Kua na hia," ci se hi. A ziin,"England kumpinu," ci-in dawngkik a, kong kihon' lo hi. A ngaih zawdeuhinhong kiu leuleu hi. A pasal in,"Kua na hia," a cih leuleu leh a zi in,"England kumpinu," mah cileuleu a, kong kihon' tuan nailo hi. Tawmvei sung hong dai phot a, a den teh a nakgin' mahmahin kongkhak hong kikiu leuleu hi. A pasal in,"Kua na hia,: ci leuleu hi. A zi in,"Keimah na zi hi ing ei, Albert aw," a cih ciangin kongkhak kihon' pan hi.

Zipil in a pasal sangin pilzaw, lian zaw-in kumpinu keek ahi phial zongin a pasal pen ama' lutang mah hisak veve hi. Thu khempeuh ah a pasal' ukna mang den hi.

A sung aom Thute:
-----------------------
2. Zipil in a maa khuat hi
3. Zipil in a pasal telsiam hi
4. Zipil in a pasal' thanemnate huh den hi
5. Zipil in a pasal vaang pia hi
6. Zipil in a pasal' tungah thuman hi
7. Zipil in inn sung nuntakna khangto sak hi

Acing akim in Simna ‪#‎Link : http://www.laibusaal.com/2016/06/zipil-agelh-gspau.html

Cinpu Zomi
Zomi eLibrary / Laibusaal
www.laibusaal.com

Phone +1 9188519036
Email : cinpuzomi@gmail.com
Facebook : Cinpu Zomi

 

-------------------------------------------------------------------------------------------------------------------------------

PASAL ZAHTAK DING (Numei mawhpuakna);

Laisiangtho ah numei in a pasal thu aman ding, zahtak ding, Pasian tung a akiniamkhiak bang a apasal tung a akiniamkhiak ding cih thupiak khauhtak mai kimu hi. Numei lutang pasal ahi a, tua ahih manin kiniamkhiak a, a lutang a zahtak pen Laisiangtho deihdan ahi hi. Laisiangtho ah Sara kiniam khiakna teltak in i mu thei a. A pasal Abraham pen ‘TOPA ’ ci in sam a, hihpen nume khempeuh in a etteh ding ahi ci in i Laisiangtho in gen hi. Numei in a pasal pen a ‘Topa’ dan a a koihtheih leh bel a

mawhpuakna zo hoih mah mah cihna ahi hi. Numeite’n a pasalte uh a ‘Topa’ dan un koih kha ngei hetlo uh a, tua ahih manin nupa kal buai kha thei zel hi. Sara etteh  ding Laisiantho in a gen pen numei teng in zuithei leh nupa kal cidam mah mah din upmawh huai mah mah hi.

Numei in a pasal a zahtak leh a gamtatna ah hong kilangkhia ding hi:

A meh huan ah – a pasal duhdan,

A sum zatdan ah – a pasal in gimtak a azon te mawkzat ngamlo ding, amah muhsa tezong apasal thulo in mawkzat ngamlo ding hi,

A kizem dan ah – pasal neihsa ahi cih a kizemdan ah kimu dinga, apasal deihlo dan in kizem lo ding hi,

A kampau ah – a pasal maizumna ding genlo ding a, apasal lamto ding hi, 

Pasal dang a pol danah –  pasal dangte a polhna ah nupi ahi cih mangngilh lo ding hi,

A pasal innkuan te a kepdan ah – a pasal a zahtak leh a pasal innkuante tung ah thusiam ding hi,

Muan huaiding –  a pasal omloh kal in muanhuai ding hi,

A pasal deihdan mawk kalhlo ding – a pasal in thu a gen pen amah ngaihdan ahih ciah kei le zong su zuk zuk mawk lo ding a, nemtak in a ngaihdan gen zaw ding hi,

Thu khensatna lahna ah – a deihna ngaihsutna bel gen ding a himahle a pasal pen bangkim ah thukhensatna neisak ding hi,

Numei in pasal a zahtak theihlohna khat bel in ah, pasalte sang a tungnunzaw a ut zawk man ahi hi (pasal thuzawh ut). Eden huan apat kipan, Evi in Adam thuzawh in khelhpih hi (a pasal thu manglo in amah thu a pasal mangsak hi). Hihpen tungnunzaw tuh cihna ahi hi.  Eden huan apan ki pat numei in tungnunzaw tuh gige uh hi. Pasalte thuzawh pen numei ut lam tak ahi hi. 

Numei in a tuploh leh theihloh kal in a pasal thuzawh sawm (tungnunzaw) tuh  den kha thei hi. Numei khenkhat in a pasalte uh a ‘Topa’ uh ahihlam phawk kha lo in simmawh cih bang om tham hi. Pasalte eisang sang a naupang zaw hileh   ‘U’ kici pen zuilo in min khong a sam zat zat, pasalte haibawl, tua bek  hilo in Pasalte tung ah khutkhia ngam numei zong hawnkhat om ta hi. . Topa’n bang cin angaihsun diam? Numei in a lutang a zahtak keileh bel amah leh amah kitawlem cihna himai ahi hi. Laisiangtho  in  ‘na lutang zahtak inla thunuailut in’ a cih numeite a ding sansiam haksa mah mah  leh pom ding a thupiak ahi hi.

Numei mawhpuakna pen a lutang thu aman ding leh zahtak ding ahi hi. A tuacih zawh kei leh bel a mawhpuakna zolo cihna ahi hi. Pasalte zahtakna leh thunuai lutna ah Christian te sang in Hindu leh Muslim numeite’n a mawhpuakna uh zo mah mah uh hi. Pasian tate’n isuahtakna ineih pen zangkhial lua  deuh i hi diam.? Numei in a mawpuakna a zawh ut a leh a pasal a lutang ahi cih a theih gige a, a zahtak ding ahi.

http://tuangboihzomi.blogspot.in/2015/05/nupa-kikal-mawhpuakna.html

INNKUAN BUAI THEIHNA THUBULPITE

INNKUAN BUAI THEIHNA THUBULPITE

                                                        By: Mang Tung Thang ( MIT, Insein)

Innkuan ih cih pen pawlpi sung, veng sungah a thupi bulpi hong suak ahih manin innkuansung kilemin daihna a om ding ilunggulh penpen ahi hi.

“Kitang neilo napi-in kilem het lo” cih pen innkuan sngah a kiphu kha thei thu ahi hi. A pua lam pan en leng ahoih, akilem tawh kibang napi-in a thuakta dingin ha natna tawh kibang thei hi. Tua thute a ven theih kei leh innkuan buaina tawh kizomto thei hi.

INNKUAN SUNG BUAI THEIHNA BULPI 15

1.Ei Innkuan masak loh man hi.

Midangte hong pahtak zongin I buai manin mi’n hong pahtak hangin I pasal/zi pen a nalungdam thei logige ahih lam kiphawk kha lo hi.

            Tua amanin innkuan bulphuh lo nupa kalah buaina tam thei mahmah hi. Buaina aveng ding zong baihlo hi. Tua ahih manin Pasian ih um kei phial zongin ei innkuan mah a masa a thupi pen a koih ding na hi gige hi. Innkuan lungkimna a om khit the midangte ading: kalsuan ding pen anihna hong suak ding hi. Tua hi leh kitelkhialhna hong tawm ding hi.

2.Pumkhat hihna a kinusiat khak man hi.

            Nupa pen pumkhat ahihna a kinusiat ciangin innkuan sung buai thei hi. Nupa pen nih ciangin pumkhat asuak ahi hi. Nupa kaalah KEI cihna a om leh khat hi lo-in alang bek ahih manin a hemsuakin meel hoih nawn lo-in buaina kipan thei hi. Nupa cih pen NANG, KEI cih a omthei ding hi lo a, EI kicih thei ding thupi hi. Pumkhat hihna nusitna in innkuan sung buai nading kipan sak hi.

3.Siamna, Dikna, Nopna Cilzat luat man hi.

            Nupa suah nading hong khih lingleng khat om a, tua in hong kheng sak zo lo-in nupa akisuak ahi hi. Na zi/pasal in nang tung ah khenlah khat anei na hi gige hi. Midangte  ipiak ma-in I zi/pasal tungah ih siamna, nopna, diknate suahkhia-in lui masa leng I zi/pasal in nuamsa mahmah ding hi. tua ciangin nang tawh kiten khak hampha lua ing kicici-in innkuan nopsakna kidim ding hi. Tawmvei sung ih kithuah pih ding mite sang khantawn kituahpih ding innkuanpihte Siamna leh Nopna tawh phungvuah huai den hi.

            A innkuanpihte in Ka lawm Siamna, Dikna nagengen uh hangin ko theikha kei ung e, acih lohnadingin innkuan suang mah ah pat masak ding a phamawh mahmah ahi hi. Tua ih neih khinkhian siamna, nopnate ihkipiak khak loh ciangin buaina hong piang thein a hi gige hi.

4.Itna man kha lo-in Ki-itna bek ih neih man hi

            Nupa apiangsak, a kitengsak itna pen kum hong tam semsem the hong peng pianin, kicimtak pianta uh hi. Ki-itna (Iloveyou) in ait leh bek itin, Itna ( God is Love) in a it lote nangawn it hi. ( Zolai tawm tawm hilhcian leng) ki-itna ciang bekah kinga-in itna ih muhban kei leh kikhen ding zong haksa kisa lo hi. Ki-itna hong picin ciangin ITNA kip hong suak hi. Ki-itna bek tawh ahih leh kuanmah kimaibiak nuam nawnlo tuak in, ki-itna hong kikaak, kihal semsemin a tawpna ah buaina hong piang thei hi. Ahi zongin Itna anei mi-in kikhen ding ngaihsun zo peuhmah lo ding hi.

5.Kilem ding sawmloh man hi.

            Innkuan kilem ding pen kikup akul hilo-in khensat ding hi bek hi. Kilem ding kihanciam peuh leh thusia pen na kinkin lel ding hi. Kitawg kei peuh leng ahoih bangin kingaihsun khathei a, (kitot lohna pen kilemna kisa kha) kilung nopmawhna om sim thei hi. Tua kilemna in ih inn nuam hong sasak ding a, mundang kilunggulh lo ding hi. Kilungleng lo ding a, tua kilemna in itna tawh hong khihkhawm ding hi. Tua bang ahih loh ciangin innkuan sung kisongsawlawi thei hi.

6.Ngaihsut a kibat loh man hi.

            Ka lawm pen ngaihsut nabang het kei ei, ci-in lungsim sungah a kici giugiau thei ahi hi. I lawm deih (pahtak) nam I sep khak ding kisam mahmah hi. Khat in a lawm deihte masak lo-in ama hoihsak bangin a sep ciang, amah lah gim kisa mahmah, a lawmin lah thupi na salo thei a, tua bangteng panin buaina hang khang toto thei hi.

7.Lunggulh kituak loh man hi.

            Khat in nasep thupi sakin, Khat in kamkhum tawh kihona thupisak in, athupit sak akibat loh manin buaina hong kipan thei hi. Mi pawlkhat inn nupi/papi hi-in nasep bekbek thupi sak ahih manin a innteng (sawltak) I sak khak om phial hi. Tua bang a ih duh ih deih akibat loh ciangin zong sauvei leh nangkai kisa kha thei hi. Kitel siamna a om masiah buaina tawmtawm a om kiukiu ahi hi.

8.Kithusim lohna leh kihawmtawh man hi.

            Apasal/zi thusim masak pen ding hi napi athusim loh man leh hawmthawh khak manin innkuansung buai ding hong kipan thei hi. Kiteng khin cih nungsangin Kithusimna a om ding kitangsam hi. En thusim kei leng hong thusim sak ding tawm mahmah kha ding hi. Kilangpanna cihte zong om thei a tuate ih hepkhiat zawh ding thupi hi.Mi hong gawmtawm a kiteng cih lah hilo ih hihmanin  ih thusim ding adang himasa lo-in ih zi/pasal bek ahi hi. Zi/pasal vai thupi tawh aciahhak ciangin nalupsan, gim piana hawhna pan hong ciahciangin donlo a om cihbangte panin kikhasiatna leh Kam kilawm lo kipau thei hi.

9.Itna leh Ngaihna kipulak loh man hi.

            Zomite phadiak pen kiten khit teh itna, ngaihna cihte kipulak kik a kul dingin kingaihsun nawnlo mawk hi. Mi gen ka zak khat pen Zomi numei khat mangte tawh kitengin a pasal in nikhat a tawmpen khatvei “I love You” hing ci-in, tua hikei leh kikhen ding ci hi. Nikhat alawmnu in cikha lo ahih manin kikhen ziau ih kici hi. Zomite in hong it, ngai ing cih pen cilzat huai lua lawmlawm hihang, cizat huai lo hi. Khat vei kicih khantawn man sawm huai nawnlo hi. Nisim ki-itna thaksuak sak den ding kisam hi. Tua ahih kei leh Hong ngailai tei mah ahitam maw cih kilungngai, lunghiang thei a, athu hoih lo-in hong nungzuih thei hi.

10. Kam kup khopna atawm man hi.

            Khat leh khat kam kupna aom mel lo, hawhna ciahna zong kithei lo a omna pen baina kipatna hi thei hi. Tua ban ah kikum sunsun leh zong kam kidawn lohmanin kithadah suak thei hi. Tua takteh ei thu tekin kipai-in kilem thei mahmah lo a, buaina kipan thei hi.

11.Innkuan nuam ding gelkhak loh man hi.

            Mi pawlkhat pen kum sawtpi nuntak ding zong ut khol lo hi. Tuate pen en pak leng innkuan sung nuamsa khol lo hi dingin upmawh huai hi. Innkuan sung nuam a sate pen si nuam nawn lo phial uh hi. Mi kimin ih neih innkuan suangah a om thei ding nopnate seelin nop mawhnate thu ih neihsak ciangin nopna pen na kihemkhia thei hi. Bang hun ciang zatding ahitam ihsiamnate innkuan sungah kizang lo hi, si pak kha leng bangcih ding! Innkuan pihte khualna in ihsiamnate sitlo in zat huai hi. Innkuan Nuam suah ding thupi a koih masiah kinop mawhna in hong deep thei hi. Innkuan nuam suakding kimlai Innkuan buai kisuak thei hi.

12.Midangte tawh kithuah nopsak zawk man hi.

            I innkuan pih tawh kithuah sangin midang tawh kithuah pen hong nuamzaw thei mawk hi. innkuan pih ten thanemna hongkawk thei in, midangten ih hoihna hong pahtawi-in  hong lungdam sak thei ahih manin,  midang tawh kithuah anuam zaw hong suak hi.Tua nuam ih sakte tawh kum tampi kithuah leng akicimtak ding ih hih lam kiphawk kha lo thei hi. Mi pawlkhat midang tawh kithuah leh nui zuaizuai napi-in inn sung ah mai gum ngeungau thei hi. Inn sung ah nuih ding akhak khat omleh kilawm hi. Tua bangin midang tawh nuam isak zawk ciangin innkuanpih tawh kithuah ding lunggulhna kiam ahih manin buaina kipan thei hi.

13.Kipahtawi theih loh man hi.

            Innkuan sung ah asiamte  a siam bangin ih kipahtawi siam kei leh khasiatna om thei, kilungnopmawhna om thei hi. Nuam hun ciangin kinuampih thei-in dah hun cing zong kidahpih theih ding thupi hi.  Ei innsung pen midang innsung tawh tehkak khak ding zong hi lo hi. Khat veivei kiphat thei le hang zong aheh omkhol lo ding hi. Midangte zong lungdam sak thei ih hih leh sawm peuh le hang Innkuan pihte lungdam, lungkim sak thei kihi hi. Khat leh khat kipahtawi in  kiphat kei le hang utlohpi teng piang thei hi.

14.Innsung ah athupi pen zi/pasal akithupit sak khak loh man hi.

            Nupa a pil/siam ta kei zongin tua innkuan sung a dingin athupi pen ahi hi. Na innkuan sung ah athupi pen dingin midang napahtak khat kikoih thei lo hi. Innkuan sung ah athupi pen in Zi/pasal hi pah hi. Zi/pasal lo in ma kinawt thei lo hi. Tua lo-in ma ih nawt khak ciangin athupi pen ki-awlmawh lo cih suak ahih manin tangtel sihtan abang om thei in buai ding hong kipan thei hi.

Innkuan sung tate hoihna ding ih deih leh Zi/Pasal kithupi sim mahmah ding kisam masa penpen hi, hih pumpi khat pen nih asuah teh nadang teng apai dan dingin pai thei lo hi. Motor tawh kibang hi a, apei lang khat hoih lo tawh gamlapi kitung lo in buai na kipan thei hi.

15.Innkuan annek khopna atawm man hi.

            Innkuan thunget khop, lasak khop cih khawng a nuam mahmah khat ahi hi.  Tua ban ah innkuan an nekkhop thupi sem hi. Tua ban ah nek kibang ding, gimnam kibang ding zong thupi hi. Vai thupi nei lah hisam lo innkuan an nek kingak mel lo cih bangin a om ciangin innkuan lungsim kihual thei lo hi. Innkuan sung ah nipi khat in khatvei zong thunget khopna , an nek khopna a om loh takciangin mapan khop hong tawm ahih manin thu leh la kitukalh thei hi. Innkuan lutang Muhtheih pen PA hi-in, muh theih loh pen PASIAN ahi hi. Innkuan in Pasian tawh vai kihawmkhawm ngeilo ahih manin asawt2 ciangin buaina lam manawh ta hi.

Thukhupna

            Atawpna ah mi hoih suahding bek kingaihsun thei in, Nupa hoih suah ding kigel lo thei hi. Nupa hoih hi leng minuamsa, nupa nuamsa kisuak in innkuan nuam sa kisuak ding hi.

            Electric mei pen Nu leh Pa in na asepkhop teh mei tangin khuavak hi. Ahi hangin tuate gel kizom khial leh meikuang in Inn kangin lauhuai mahmah hi. Tua (+)leh(-) in na zopna aman ding, na sep khop theih ding thupi mahmah hi. Nasem khawm leh na lianpi sem zo hi.

Tua hi a Innkuan nuam suah ding, ileitung tomvei nuntak sungin a thupi pen leh vangam malep bang ahih manin innkuan sung nuam sa-in ki-iplahin kilemna, pumkhatna tawh I innkuan lamzawhna dingin I kideihsak pen thu ahi hi.

Kawlte in Innkuan pen (eng-Thawng) acih zah khat un Nuam asalote adingin Thawng(jail) hi thei takpi a, Nuam asate adingin Vangam malep asuak thei lua ahi hi. Cilbawl lo-in ih siamna, ih diknate innkuanpihte adingin pia mengmeng ni. A mau hong lunggulh pi pen tua mah ahi hi. nupa suaksa kikhen ding pen pammaih lua ahih manin ki-itna en itundong delhni, kitelsiamna tawh inkuan nuam asuak dingin Topa itna thupha I kipaih hi.

            Innkuan nuam suah ding deihsakna tawh, Topa thupha.

Tongluan hawm 48na Jan, Feb, Mar-2016 pan 

June 22016

CSM TUNG TOPA A HOIH HI*$$

CHARITY SIAM MINISTRIES nasep pulakna

Topa ka phat hi. Haksapi mah in kanungta a, Haksapi mahin USA ka tung hi. Topa tung ah ka thungetna in Mite ading thupha hong hisak in ci-a ka thungetna Topa in hong gual zawh pih toto hi cih ka mitin mu ka hih manin ka lungdam mahmah in Topa tung ah lungdam ka ko hi.

Mite adingin thupha hong hisak in ci-in mikhempeuh in thu ngen dingin zong ka lamen hi. Mite ading thupha hihna pen Sum lepai neihlelam ih Hauh ciangin mite tungpia zo, semzo ih hih teh Mite ading thupha akihipan, semthei pan  kihi lo hi. cih zong hong hanthawn nuam ing. Mi tampite ngaihsutna ah Ih hauhciang in mite adingin thupha a kihizo pan dingin ngaihsut thei uh hi.

Tuni in ih kiphawk sak kiknop thu in, Mite ading thupha hih ding leh Pasian nasepna ih cih pen Hauh ciang leh siam ciang bek a, Mite ading thupha, Pasian na akisem thei bek hi lo in Lungsim thu hi ci-in tuni in gen nuam ing.

Mite ading thupha pen gen leng,
@ Mihaksate ading thu nanget sak zawh zong mite ading thupha hi.
@ Mikhat in vangik pua kaikai na muh a na huhna zong mite ading thupha mah na hi hi.
@ Pau lek sak, appointment pai pih, mikhat ih hihtheih lo maw, mikhat i kitang sapna na huhpen mite ading thupha hina na higige hi.
@ Mizang khat, migenthei khat puan, nik, khedap, an, tui, leh atuam2 na huhna pen mite ading thupha ahi hi. Hih bang a na hihna khempeuh pen Pasian Nasem na hih lam phawk in. Pastor or Evangelist sep ciang bek a Pasian nasem ahipan in kingaihsun zenzen kei in. (Matt 25:1--) pan atawp dong sim le cin Pasian nasem nahihna na kitel mahmah ding hi.


Tua ahih manin kei zong USA ka tun akipan mite ading pek 1 or 2 cih bang leh na khat peuh2 ah ka huhtheih bangin ka huhna pen Pasian nasem ka hihna Topa in hong telsak semsem ahih manin CHARITY SIAM MINISTRIES cih ka pat khiat ahi hi. Pasian huhna tawh natampi kisem khin a, adiakin singkang khuhsakna pen Pasian panpihna tawh Inn thum kikhuhsak khin suak hi. Topa min thang hen! amau sang kei lungdam zaw mai ing!

Mimal khat ciatin ih pan nop leh kipangkhom thei den ahih manin tuni a pek khat bangma lo-in na zat sangin, mihaksa khat peuh in anuamtuam ding Pasian nasep na ut leh anuai ah contact theina om hi.

Contact Person: Siam Khaute (Thang Sian Siam)
                  Ph: +1 515-988-5064
         Email     : khsiampu@gmail.com

Hih anuai a pen Vaivet (Cizam) ah April, 2016 in CSM nasepna hi.