ZOMITE KAMMAL MANPHA MAHMAH PAWLKHAT:

ZOMI TE KAMMAL MANPHA MAHMAH PAWLKHAT:

Kammal khat in mi thanem sak thei a,kammal khat in mi thalawp sak thei hi. Pasian in leitung na khempeuh akammal tawh piangsak a, Zeisu in cina adamsak atampi te kammal tawh damsak hi. Tuni in Zomi te kammal manpha deuh kazak ngei pawlkhat hong tangko nuam ing.

1. Sia Enno kammal:

Thulian te ah semkhawm bawlkhawm ni, thuneu nono te ah suahtakna kipia ni,tua hileh igualzo ding hi.

2. Bishop Felix Liankhen kammal:

Mopawi ni in video khui tampipi bei in ikizaih nuam a, kum 10 khit ciangin izaihkik nuam nawn kei hi. Zomi te kipum khat keileng eiteng mah isum ding hi.

3. Pu Cin Sian Thang kammal:

Tamvei pi tak Zomi ka it manin kolbulh khaukhih katuak ngei a, ahizongin Zomi ka itna lungtang kuamah in khaukhih thei lo hi.Ka pumpi athanem hangin ka lungtang thanem lo hi.

4.Sia .Do Kham kammal:

A guallel te lamto inla, agualzo te pahtawi in.

Asia pendingin kiging inla ahoih pendingin sem in.

5.Sia.Khual kammal:

En' Zogam puah kei leng , Pasian in Zogam puahding midang sehlo ding hi. Pasian amasa in na it nakleh Pasian in athupha hong masak ding hi. Zeisu pen i upngam naciacia hongpha thei den hi.

6. Sia Do S Mung kammal:

Pasian i itleh Pasian itte i it ding ahihi.

Pasian it ten amipih Zomi te itding hi.

7. Sia. Mungtawng kammal:

Pasian napiak atam leh Pasian hongpiak kik tawmzaw ding hi.

Leitungah nanuntakna "o" natun leh Pasian adingin gualzawhna kalthak asuak ta nahihi.

8.Sia JM paupu kammal:

Pasian kamciam i upngam leh Pasian gamciam ingah pan ding hi.

Hong lamto khutpawn imangngilh ni-ni in hong khiasuk khut sukthei khutpawn suak ding hi. Na hih lohna pipi hong kigensiat leh hilo nahih manin hehkei in,nahihna pipih hong kigensiat leh hi nahih manin hehna ding om tuanlo hi.

9.Sia Tuanno kammal:

I Khantohna dingin thuthum kisam masa pen hi, kikhel theihna; ahoihlam in demtheihna leh midang te tawh kipawlkhop theihna ahihi.

10. Sia Thawngno kammal:

Khuaizu iduh mahmah a ahizongin khuaibu i susia pahpah hi.

Khedap neilo in phungphung kei in, midangte kheneilo zong om cih phawk in.

Mipil ten damlo te hehpih a, mihai te damlo simmawh hi.

11. Pa Dai Lian Pau kammal:

Midang te hauhna kangaih sut ciangin kalung gimsemsem a, nidanga ka gentheihna sate kangaihsut ciangin tu a kadin mun pen kalungdam mahmah in ka tha honglawp sak hi.

12. Sia Kap Mang kammal:

Zeisu kiangah akitun thulian penpen sihdaan nangawn suahtakna suak thei hi. Pasian bawlsa humpi neelkai nangawn Daniel tawh kilem thei mawk hi.

13. Sia Kam Hau kammal:

Hai minte khum in lawh baih a, haipuam te thuk in lawh hat hi, Pasian thu azak te aum ngam pahpah te Haimin bang hia, a um hakte haipuam bang ahihi. Umngam lehcin Pasian in semngam ding hi.

14. Sia Do Khup kammal:

Midang te ihehpih na zahzah Pasian in eitungah hehpihna hong tungsak den hi. Pasian in khasungah laivuan hongneisak den a, ikahtoh nadingin kisin ngam kul den hi.

15. Sia Pau Lian kammal:

Midangte muhloh a Pasian na isepkhak sunsun te pen Pasian in midangte muh in ahoihna tawh hong pho laak zelzel hi. Pasian muhna ah aneupen inasep nangawn alian mahmah in hongsansak denhi.

16. Sia Kaptawng kammal:

Pasian thu amang mahmah Abraham, abiakpiakna ah atapa aitangin tuutal tawh kilaih sak napin, eite mawhna tangin sihna athuak Zeisu alaihding kuamah omnawn lo mawk hi.

Eite pen Pasian neihsa kemdingin Pasian in tanupi dinmun hongpia hi.

17.Sia Paulianmung kammal:

Pasian adingin na dang ataak semsem leh Pasian hongitna lim nasa semsem ding hi.

18. Pu Pau Lun:

Zosiam nasepna sungah kum 7 kaki hel khitteh Topa in tua nasep mah ahi, Health Department honglensak in lamdang akasa a, ka khaici tuhna mah asem kha kahihi. Lametna om ta kei leh isep khat peuhpeuh denciangin agah kimu thei hi.

19. Pau Khai:

Pasian a it mahmah te Pasian in amah ait mahmah ding geelsak den hi.

Thusia ukmahmah a thupha ngah cihbang omngeilo hi.

Motor cycle in gear aneih banging inuntakna ah akisam bangbangin igear ilaihsiam nakleh kigualzo den hi.

I pumpi ninbung kisuak sak kha pahpah a, nin pen ninbung sungah koih leng ipumpi tawldam mahmah hi.

Vantung gam hong tunpih zoding Pasian in leitungah zong hong makaih zo mahmah ding hi.

Ka zakpak leh kaphawk pak kammal manpha kasak pawlkhat hipan hi, adang mitampi omlai hi.

Thupi asa,

Sia Pau Khai.

May 142016

ZOMITE MINAM LIANIN KICIAMTEH TA!

KAWLGAM BUP CENSUS AH
ZOMITE MINAM LIANIN KICIAMTEH TA
SK. Gin Khan Pau
Census Committee, Kalaymyo

Piancil 12:2
Thupha a ngah dingin “MINAM LIAN khatin nang hong bawlin, thupha hong pia-in na min kong liansak ding hi“ a cih bangin ZOMITE MINAM LIAN i suah theih nadingin kumpi le UN thukimna hangin suakta takin ihihna (Identity) pulaka zingvai hong hawmpih ZOMITE hong ai-tuam it Pasian tungah lungdamna i ko masa hi.

1.ZOMI vai i gen teh a kimangngilh thei lo le a kinawlkhin thei lo Pu Chin Sian Thang ahi hi. Kawlgam haksat mahmah laitakin ki-mat, kihen thuak taleh ZOMI a dinpih cintenna Radio tungtawnin VOA, BBC, RFA panin ZOMI a gensak denden i Pupi hi a, ZOMI a itna gah tu’n hong tungta cileng kikhial lo dingin ka um a, Census Committee tungtawnin zahtakna i pia hi.

2.Hih Census ah simple form i ngah baih theihna Zomi Congress for Democracy (ZCD) party-te hanciamna ahih manin nakpi takin lungdamna i ko a, a kigen theih a kipan ZCD in hong makaihpahin 914 ZOMI gelhdan ding a nuai-a munte ah hong tangko uh hi.

1) 30.12.2013-Yangon TBCY ah mipi tawh holimna
2) 17.1.2014-Yangon TBCY ah GZA tawh holimna
3) 24.1.2014-Kalaymyo Galilee Biakinn ah mipi tawh holimna
4) 27.1.2014-Kalaymyo Bethel Biakinn ah Beh, Khua, Kipawlna tuamtuam tawh kikupna
5) 3.2.2014-Tamu le Nanphalong ah mipi tawh holimna
6) 20.2.2014-Zominam ni Tuithang ah khua tuamtuam tawh holimna
7) 23.3.2014-Chanthagyi le Zozang khuabup tawh thugenna hong nei uh a, Census tangkona hong pankhia ZCD ahi hi.

3.ZBCM gambup in a 7 veina GM khawmpi March 8-11, 2014 hun sungin 914 ZOMI-a gelh ding thukhensatna hong neih uh tak ciangin mipi kilungmuang tuam mahmah hi.

4.A 1 veina Census Committee ZCD, ZYA, ZOFA, MZCYF, ZBCM kipawlkhawmin 23.3.2014 ni-in ZBCM zum pan Rev. Dr. Gin Khan Khual GZA makaihna tawh kiphuankhia hi.

5.25.1.2014 TVBA-MC Khawmpi, Buangkung panin Pasian nasem khempeuh in Tamu gamsung 914 ZOMI-a gelh ding thukimna nei uh a, tua a kipanin Pasian nasemte’n tavuan hong la uh hi.

6.ZOMIBUP kipawlna lianpen a i ngaihsut GZA hi a, amau tawh semkhawm a, hong makaih dingun kilunggulh mahmah hi. 2011 GZA makai khawmpi, Singapore panin i minam min ZOMI cih ding thuzawhna om sa ahi hi.

7.GZA khawmpi, a 2 veina March 13-16, 2014 Tedim panin gambup Census hun teh 914 ZOMI-a gelh dingin thukhensatna kinei hi.

8.Hih pen Party, Biakna, Khua, Beh kipawlna tuamtuam-a’ bek hikei in, i minambup vai ahih manin ci-in , Census Committee munpi 5 ah kiphuat beh a, a omsa Kalaymyo tawh munpi 6 hong pha hi.

9.Committee omnate Cikha, Tonzang, Tedim, Kalaymyo, Tamu, Zanggam teng adingin Yangon hi-in, 16.3.2014 GZA Tedim panin a kisam ding TA kihawmkhia pahin ei’ mun ciat ah kikuankhia pah demdem hi. Hih thu hong om teh GZA GS a sem ngei Rev. Dr. Chin Do Kham in a vision 24.3.2013 ni-in ZCD zum Kalaymyo ah a gen, a sawt loin ZOMI ihihna khua kim ah gospel pai-in i gen kul ding hi, a cih ka phawk a, hih bang vision a nei makai hoih kimangngilh thei lo hi.

10.A thu le thatang bek tawh septheih hi lo a, sumlepai kisam ahih manin sum hong sik a diakin tuipi gal-a om ZOMI khempeuh tungah i minambup in lungdamna i ko hi.

11.Census vai-in Committee-te’n i mun ciat ah pan i lak bek tham loin Kipawlna, Khua, Beh, Biakna tuamtuam i pankhop manin 90% bang lawhcinna a ngah ihi hi.

12.Hih vai-in leitungbupa om ZOMI khempeuh ma kipangciat a, minam khat vive mah kideihsak luatna hangin mun tampi tak ah kitot kiselna hong om kawikawi hi. Bang hang hiam cihleh vai thupi, na lianpi a pian ding teh ze-etna a om gige den ahi hi. ZOMI zong minam lian khat pian nading thu ahih manin buaina a om ding mah ahi hi. Ahi zongin tu’n veilua kisa-in Moses bangin i kithat liang zongin a khiatna om nawn loin ahun hong beita hi. Asuk, ato ah an ngawl liangin a sem zong ki-om a, inn ah tu hithiat kawmsa-in a langpang zong ki-om veve hi. Kuamapeuh khasiatna, hehna, thangpaihnate kimaisak in, maban ah i pankhop ding thupi mahmah ding hi.

13.Hih Census vai-in minambup in 914 ZOMI ah gelh ding cih thukimna om taleh pawlkhat in ei Code, eima nambat, ei kampau, ei beh, ei khua, ei biakna, ei bawng teng ci a, ZOMI hinapi in, a makaite’n i taipihkhak i tu, i tate’n hun khat ciangin hong mawhsak hun om dingin ka lamen hi. Hih mawhsakna a omloh nadingin i maban ah ZOMIte’n vai thupi i neihkik hun ciangin, ei beh, ei kipawlna guak ci nawn loin i mipite tawh kipawlkhop ding hanciam ni. Kawlte paunak in “Bawnga hon lak pan tangtat leh sahang in pet“ a cih bangin kuamah tangpek loin minam vai ah kigawm sawm ding hi hang.

14.914 ZOMI vai-in leitungbup mi khempeuh i siam tawpin ma kipang ciat napi-in, a sem le a makaih ding a kilawm makai pawlkhat, Census Committee in kimukha hetlo ahih manin i siamna, i panlakna tawm khanin i ZOMIte ading hong hanciam dingun kilunggulh hi. Midangte ading bekin i hun beisak kei ni, ci-in GZA Census Committee in deihsakna tawh kong hanthawn uh hi.

15.GZA makaite pen biakna zui-in Siampi vive ahih manun i zuih diamdiam theih leh i minam minthang dinga, i lehpan leh eile-ei a kilehpan ihi ding hi. Pawlkhat in hawmthawh bawlin kei thu hong kidong kei ci-a, a langpang khat le nih ki-om hi. Kei muhna ah tu’n makai le thudot-a nang hong kineih nai keileh mipi in hong muang nailo ahih manin mipi’ muan dingin i kipuahphat ding thupi mahmah ding hi. Tua hileh mipi in a kik teh thu hong dong ta ding uh hi.

16.Tutung bang a, Kawlgam mi kisimna man taktak hong om, a khat veina hi a, ZOMI a it le a it lo kitel mahmah ta ihih manin tu-a kipan ZOMIte in makai hoih i neih hong kipan ta ding hi. Bang hang hiam cihleh i minam, i biakna, i hausa upa dingte ZOMI a it vive teel ta ding ihih manin i minam sung hong nuam mahmah ta ding hi.

ZOMITE MABAN LIMCI LUA (VISION)
1)Census lai mah bangin Pasian nasemte le Minambup pangkhawm tading hi hang.
2) A sawt loin Zomite Minam lianin Topa’n hong kipsak ding hi.
3)Zomite’n a tuamin State i ngah ding a, Gunkhawm tungsiah Kumpi tungah i ngen ding a, i gam hong hi ta ding hi.
4)Zomite mah in Zogam Kumpi i sem ding a, gam tuamtuam Kumpite tawh zingvai kihawmkhawm ta ding hi.
5) Zomite gamh Gullu mualpi, Zomi company-te’n i to ding a, Zogam ah Dollar bekbek kizek ziahziah ta ding hi.
6)Mawtaw line tai khempeuh tungah Zogam Bus bekbek kigelh dinga, Kawlgambup i kimvel ding hi.
7) Zomite’n Vanleng i lei tading a, Zogam Air Line ci-in Puandum, Puanlaisan le Vaphual tawh i zem dinga, leitung i kimkot ta ding hi.
8) Thangmual dungah Neino Vanleng tual (Neino Airport) kibawl ding a, a kiim-ah Cing Khup le Ngam Bawm-te tawlngakna Hotel i lam zihziah ding hi.
9) A mualdawn sangpen ah Peng Lam Cinema Hall i lam ding a, Zomi Film i et kawmin Census vai i gimna khempeuh hong bei ta ding hi.
10. Tua hun ciangin ZOMI a ut lo a langpang i om nawn kei ding a, i minambup i pangkhawm dinga, Vaphualte’n Zogam zuanin hong ciah diamdiam ta ding hi.
11)I lamet-et “Eden Huan thak i Zogam Nuam” ci-a la-a i saksak, a taktak hong hita ding hi.

Hih khempeuh hong pian theih nading pen 2014 March 29 - April 10, 2014 Census vai a, asuk ato ah gilkial dangtak i thuaklawhna, sumlepai neilo pipi-a i piakkhiatnate a gah hong hi ding hi. Hih hangin sumlepai, thalengal a zang khempeuh leitungbupa om ZOMIte i tu le tate’n i Pu i Pate vaihawmsa ci-in Pasian itna nuai-ah zingvai a hawm theih nadingun tangthu a gelhgelh ihi hi.
Hih lai a sim khempeuh in mailam muhkholhna (vision) tawh sim ciat ni.

ZYA Tin Jubilee Magazine Article 19 Na

By:ZYA

May 13,2016

A GUALZOTE IH CIH Mi PEN:

A GUALZOTE IH CIH Mi PEN:

1. Pasian tawh a kalsuan khawnden mi.

2. A tupna sepna ah hangsan leh citak tak a, kalsuan asem mi

3. Tangval nungak lai ahih leh tupna ngimna, sepna bawlna ah Nu le pa sanggamten a tawsawn back up mi.

4. Zinei pasal nei sa ahih leh Azi/pasal tate in lungkiatna ding lam hilo in gualzawh theih na dingin tawsawn backup mi hihamtang hi.

Migual zo atam zawte pen innkuanpihte sum leh pai ahi zongin, thu leh la ahi zongin, support  thapiakna hiham tang hi.

May 1016

Siam Khaute

NUPA KAL KI-IT KINGAI SEMSEM LAWMTA BAT NANG

NUPA KAL KI-IT KINGAIH SEMSEM NANG LEH LAWMTA BAT NANG

Hihtawh kisai in Nupa ki-it in kingaih semsem na ding muhdan khat gelh pak ni.

Gentehna: Inn ih tun teh Ui or Zawhmeng in hong na dawn ih tutna ah hong kitat in a mei hong pek leklek leh kihawl khia lo in kizut in hong maingap uh a, Ganhing ahih hangin ki-it semsem in kipakta kiphawk, in kikhual in mihing leh ganhing ki-itna leh kikhualna hong om semsem hi.

Tuadan lian mah in Nupa ih cihpen Zite in Pasalte kiang ah kinel or kingeksak dan phial a Va kinel vakitat ciphial ding maw a om theih ding pen thupi mahmah in ki-itna , kingaihna khang semsem sak in mu ing.

Nupa pen kinel mel lo kiho mello, kiciamnuih ngei mello in ih om ciangin Ki-it lo ih hih loh hangin kinel , kimai ngap leh kikhualna tawm mawk hi.

Tua ahih teh Om gemgam or sanggam bangin kisap ciang bek kiho lo in, nupa te pen Khangno in Uhamta leng Kinel kitat, kihopih sipsip ding pen thupi mahmah in mu ing.

Ui leh Meng ih gen bangin Numeite Pasalte kiang hong kinel mahmah leh Ki-itna khang, kikhualna khang, kilawmtatna khang in kicimtak cih om ngeilo hi.

Numeite Pasal kiang hong kinel kitat phat loh ciang kihehsak hilo napin kiitna kikhualna kihehpihna kilunglutna tawm thei hi.

Tua ahih teh Khangno in uhamta leng ihpasalte kiang ah kinel in ciamnuih gen, kimawlin huntam ih lak khoppih leh nupa kalpen nuamlo thei lo, kiit kikhuallo theilo in, lawmta bangin kigamta kiho thei, kimawl khawm thei ding a Nupa nang tawh hih mah leitung ah nuampen hi cih Napasal in genngamlo in Feel nuamsa mahmah ding a nisim nuntak zia nuam mahmah ding hi.

Numeite mahin na khat peuh2 zo a pasal om gemgam lo in ih kinelsiam ding Innkuan nuam ding ih ut leh cih kigen hi hang, share le cin khat peuh in phat tuam puh ding hi.

Pasalte gilo samlo a nupite na kinel loh man hi. Lim a ih muh bangin na lawm va nozel le cin a lungkham, asinkham, agim atawl dam zel ding hi.

Lungdam
Siam Khaute
April 82016

A GUALZO NUNTAKNA NGAH THEIHNA DINGIN:

A GUALZO NUNTAKNA NGAH THEIHNA DINGIN:

1. Anungta Pasian tawh kizom den ding.

2. Midangte lungdamna ah lungdampih zo ding.

3. Thusia mun ah kidiah lo ding.

4. Sepna khat peuhpeuh ah kipumpiak zoding.

5. I dinmun ah lungdam thei in mainawt thei ding.

6. Hamsatna pen gualzawhna kahlei ahih lam phawk ding.

7. Thuhoih khat peuhpeuh thupi sim thei ding.

8. Gualzawhna pen Pasian tungah ko siam ding.

9. Ineih zahzah tawh kipan khia ngam ding.

10. Isepna peuhpeuh ah Lungsim khempeuh tawh sem ding.

11. Ei sangin apilzaw , ahauzaw, asiamzaw te langpan lo ding.

12. I tunga hong kipia tavuan te thalawp takin mainawt pih ding.

13. Khasia pahpah lo ding.

14. Midang khat phatnuam lua kisa in midang khat gensia phot lo ding.

15.Vision kician leh ahoih nei den ding.

16. Pahtawina ingah teh midang te hawmsawn thei ding.

May 9.

Sia Pau Khai

PA IN A TATE TUNGAH A THUHILHNA

PA IN A TATE' TUNGAH A THUHILHNA

• Na nu khasiatna dingin, gamta, kampau kei in la, na nu simmawh kha kei in.
• Na nu' hong itna na thukkik zo kei zongin, na nu' hong itna a mawkna suaksak ngei kei in.
• Na nu' ading tanu/tapa hoih khat na suah zawhna ding hanciam den in.
• Na zi'/pasal' hangin na nu mudah ngei kei in.
• Nang nu' na it mah bangin na zi/pasal nu it zawh sawm in.
• Na nu' deih loh, na nu' phal loh khat peuhpeuh sem/bawl kha kei in.
• Na nu pen, nute' ni leh ni thupite bekah a pahtawi leh a it hi loin, a tawntungin pahtawi-in, it zawh sawm den in.
• Na nu na lungkim/lungdam sak zahzah ama thupha ngah ding hi teh cih phawk gige in.
• Na nu' na khasiatsak zahzah hamsiatna ngah ding cih phawk in.
• Na nu' tungah Pasian in thupha tampi tak hong koihsak cih phawk den in.
• Midang ten bangbangin na nu hong gensiat sak ta leh nang adingin na nu zah-a a hoih kuama dang om tuan lo cih phawk in.
• Na nu' lametna leh ama lungmuan'na in nang bekmah na hih lamtak phawk in.
• Na nu' adingin na khatpeuhpeuh hih/sep sak ding thasial kha kei in.
• Na nu' tungah itna lak tawntung in la, thupha ngen zelzel ing.
• Na nu pen pilna, siamna a neih loh hangin nang adingin leitungah a zahtakhuai pen ahi hi.
• Na nu' deih khempeuh na pia zo kei zongin na nu' kisap bangbang a pia zo ngiat dingin hanciam den in.
• Na nu in hong dampih lai ahih leh a damsak Pasian' tungah lungdam ko khial kei in la, sawtpi tak mah hong cidam pihin, a khansau theihna ding thungetsak den in.
• Na nu in a kimu thei kipahtawinate sangin a kimu thei lo nangma itna lungtang deih zaw hi cih phawk den in.

# A nu simmawh in,a khasiasak mite in leitung thupha a ngah loh banah khansauna ciam kha lo ding uh a, a nu it in, a lungkim/lungdam sak mite in ahih leh leitung thuphate leh khansaunate ngah ding uh hi.

-David Tuang

KAMSANG A KINEIHKHEM HONG PIANG DING

KAMSANG A KINEIHKHEM HONG PIANG DING

THE FALSE PROPHETS.

Mat 24:11Kamsang kineihkhem mi tampi hong piang ding a, mi tampi tak umkhialsak ding uh hi.

24Bang hang hiam cih leh Khrih a kineihkhemte leh kamsang a kineihkhemte hong piang ding a, ahih zawh leh a teelsa mite nangawn a khemna dingun lim leh na lamdang lianpipi hong bawl ding uh hi.

1Johan 4:1 Ka it lawmte aw, kha ka nei a ci mi khempeuh' thugen um kei un la, tua thute Pasian kiang pan mah ahi hiam, ci-in kantel un. Bang hang hiam cih leh leitungah kamsang a kineihkhem tampi hong om khinta hi.

Marka13:22Bang hang hiam cih leh Khrih kineihkhemte leh kamsang kineihkhemte hong piang ding a, ahihzawh leh, a teelsa mite nangawn a khemna dingun lim leh na lamdangte hong bawl ding uh hi.

Hih thulu tawh kisai in Topa tusung teng hong hopihna leh Khatlekhat kitheisakna ding danin ngaihsun ing. Topa’n ka hun hong naiciangin zuauthei or kineihkhem kamsang tampi hong piang ding cih agenna tung tawnin Thu-um mite pilvang huai mahmah kha ding hi cih khatlekhat kihanthawn, tha kipia in Lai Siangtho isim tangtang ding Topa in hong deih hi. Paul thugen pen Mite in man maw manlo cih atheihna dingin Lai siangtho asim tangtang uh hi cih bangin Khristian nuntakna ah et, sim tangtang ding kisam mahmah ding hi.

Nikhat Biakinn ah ka kikhop leh Crusade dan kibawlin Pasian thugen minthang khatin thugen ziah2 Hallelujah ci ziah2 in tha ngahthei mahmah in, kei anung lam deuh a ka tu a, Pawlkhatte tu in, Pawlkhatte ding in thugen ngai zihziah uh hi.

Tua thugen papen thangahlua ahih manin stage tung ah zong ding lo-in mipi lamah hong tuaksuk in thu hong gen ziahziah laitakin Pulpit tungpanin Church Pastor pa in Lai Siangtho hong lem in atung a Lai siangtho ih gelhte hong sim hi. Avekpi in asimma Ka hun hongnai ciangin Zuauthei kamsang or Kamsang kineihkhem hong piangding hi cih hong simlian leh Tua thugenpa tukvual a, ka omna panin kimu nawmlo-in mipi in hong liah hi. Ka dinna panin tawlkhat sung dindel liangin ka ethangin ka muzo kei hi. Tua pan in amai lam deuh ah pai phei in tutna tungpan ka dingin ka en a ka muthei tuan kei hi.Tualai takin Biakinn bang hong kiling zaizai liangin, atawp ah tua atuk thugenpa bangci om cih munuam ka hihmanin Biakinn apang a kongkhak pan paikhia in Pulpit tunglam paina kongpi ah ka lut a stage tung pan ka et leh minhong liah veve in ka muzo tuan kei a, thugen pa kua hiam cih ka tel zotuan kei hi.

Tua laitakin Biakinn sung a meipi kivak hong mitdek diaidiai ahih manin Tangval khat pulpit tunglam hong diangto in Tua meipi hong mutin hong tang hoih kik hi. Thu gen atuk pa ka-etet hangin ami katelzo tuan kei hi. Tualai takin Kakhang lovat a, Ka mang na hi mawk hi.Tua tangval pa pen, tulaitakin tua Pawlpi sungah Pastor sem khat ahi hi.

Hih thupen 1998 kumin Kamang hi a, ka khanlawh phetin tua atukpa kua hiam ci-in katheih nop manin ka mang bang kabawl phapha hi. A hih hangin Topa in ami ka theihding deihlo a, thei leng kigenkhia khading ahih manin Topa in Ami hong theisak lo mawk hi. Kum hitan sawt napi in ka mangngilh theihloh thu khat ahi hi.

Christian ih nuntakna sungah kamsang kineihkhem or Kamsangin Pasian kiang pan maw, hilo kamsang ci-a itel loh mitampi hong omta hi. Kamsang or thusuak nei in, milak ah gentuak, gentuaklo theilo ban ah, hih ka thusuakpen Agenkhiat ding kal ngaklah in hih pen Pasian kiangpan maw? Kalungsim pan maw? Evil Spirit or khanin kiangpan maw cih dongtel lo, theitel lo-in agenkhia ziau2 mitampi omta hi.

Kamsang tuak2, thusuak ngah tuak2 kilemlo tam mahmah ta hi. Tua ahih manin ei Christiante in Paul cih bangin Pasian thu hong kigen leh thutuam2 te Pasian Kammal Lai siangtho tawh kituak maw kituaklo cih Lai siangtho en in ih sittel detding pen, Kideihsak mahmah hang cih hi tungtawn in ih lungngaih det ding deih hang. Siate cihbangin

:

#Thusuak ih neih leh zong, Pasian kiang ah dongtel ni manmaw manlo, man taktak itheih teh genkhia pan ni.

# Thusuak man taktak cih ihtel teh Mipi zak agentuak leh Mimal tung ah gentuak khentel thei ni.

#Mimal theih ding kilawm pen mipi tung gen lo-in, athei ding nu/pa tung ah ih gen kei leh kilem lohna kigalbawlna cihdante  kipiangsak thei hi.

Tua ahih manin Christian nuntakna sung ah Pilvang takin nungta in kalsuan ding kisam mahmah hi.

Pasian kammal tawh akop tawntung Pasian tate ihih ding thupi mahmah ding hi cih kithei sak hang!

Lungdam

Siam Khaute

May 7, 2016