ISAAC & REBEKAH, KHUKDINTE NUPA

ISAAC & REBEKAH, KHUKDINTE NUPA

Isak leh Rebek te nupa in haksatna atuah uh ciangin Pasian kiang a zuatdan uh tawm genkhawm ni.

[1] ISAAC IN BUAINA LEH HAKSATNA ATUAH HUN IN PASIAN KIANG ZUAN
Isaac in kum 40 aphak in Rebekah tawh kiteeng uhi. A zi Rebekah tawh a kiteen zawh kum 20 sung bang  nau nei theilo in om uhi. Hih bangin anuntak sungun Isak in numei dang tawh zinei ding cih na ngaihsun het lo hi. Azi’n nau a paai theih na ding mipil, misiamte kiang zuanin na kibawl tuan lo hi. Isaac in Pasian kiang ah a haksatna tun a, Pasian mah a belh tinten man in Pasian in gualzawh pih a, Rebekah in nau hong paai hi.

[2] REBEKAH IN BUAINA, HAKSATNA ATUAK HUN IN PASIAN KIANG ZUAN
Pasian in Isaac ngetna leh thumna dawng in Rebekah kum tampi gaai theilo a om hihmah leh a hong gaai ta hi. Rebekah in nau ahong paai ta a, hitamah leh a sung a nau omte kilai zel uh ahih man un thei siam lo-in lungsim nuamlo tak in om hi. Tua bang hunin Rebekah in alawm-le-gualte kiang zuan lo in Pasian kiang ah a buaina gen khia hi. Rebekah in a haksatna Pasian kiang ah  tunzaw in Pasian in Rebekah hopih a, a sung ah nau nih om ahihlam leh nau hong piang ding te mabaan, mailam ding hoih tak in Pasian in hilh hi.

--------------------------------
Tulai Mi tampi tak ten buaina leh haksatna atuah hun ciang in Pasian kiang zuat ding sawmlo in, Zu Inn leh khamtheih Innte na zuan zaw uh hi. Zu-leh-sa, khamtheih nam tuamtuam, Numei-le-pasal kal ha thaangtatna cih leh adangdang in a lunggimna uh kihehnep sawm uh hi. Tua te tawh kihehnepna in sawt khawmlo a nai kha leh nih kan khomlo uh hi. Khamtheih in ilunggim na a beisak tuan lo-a phatuamna zong omlo hi. Tuabek hi loin ih taksa hoih lai sawt lo kalin hong kisia hi. Hih bangte tawh ih kihehnep hangin ih buaina leh lungkhamna beituan lo a, ei le ei a kisusia, gawt kisuak zaw hi. Hih bang a ih kihehnepna leh ih kungkham, buaina ih hihveng sawm pen Pasian deihna na hihet lo mawk hi.

Mi pawl khatte in hih bang haksatna leh buaina atuah uh ciangin Innkuanpihte leh lawmte kiang zuan uh a, Pasian sangin lawmte leh Innkuanpihte muang zaw uh hi. Mi a tamzawte in Jesuh vako ning cihsangin midangte, lawmte kiang genzaw, Kozaw thei nak uh hi. Ih lawm ih gualte kiang leh ih innkuan pihte kiang ah ih haksatna vagen kei ni aci ih hikei a, tua ih genkhiatna in ih lungsim hong nuamtuam kha mah ding hi. Ahi zongin damna lungkimna taktak om tuan lo hi. Tua hih manin Pasian kiang zuanzaw le hang ih lungkhamna leh ih buainate hong lakkhiatsak, vengsak zaw ding a, aman hong puakpih ding hi.

Buaina leh haksatna ituah hun ciangin Isak leh Rebekah bang in Pasian mai ah khukdin in amah kiang ah tunpih, paipih zaw leng aman ih lunghihmawhnate hong hihveng sak  zaw ding hi.

ASIM MIMAL KHAT CIAT TOPA’N HONG GUALZAWP PIH HEN!

Ih sim khitteh share leng mikhat peuh in nuntak pih ding hi.

Lungdam

Siam Khaute

March 15, 2016

CHRISTIANTE PEN GALVIL A DUTY GIGE AHI HI

CHRISTIANTE PEN GALVIL A DUTY GIGE AHI HI

European Airlines a kihon’ cil ni in, tua vanleng sungah thu-um tangvalno khat zong first class section ah tuang hi. First class section dei sungah a kihih ngei bangin vanleng sunga nasemnu (air hostess) in dawn ding zu san hai khat hong tawi in, tua tangvalnopa zong va pia hi. Zu ahih manin tangvalpa’n aw neem takin na nial hi. Vanleng a nasemnu a sawt loin hong pai kik in zu hong tawi kik leuleu a, a kilawm mahmah kuang sungah zu koih in tangvalpa va pia kik nawn leuleu hi. Ahih hangin tangvalpa’n kam damin, “Hong maisak in, ken zu dawn ngei lo hi’ng,” ci’n na nial leuleu hi.

Vangleng nasemnu'n zong lamdangsa lua in vanleng sunga ulian -managerpa kiangah hih thu va ko hi. Managerpa'n zong kuang kilawm zaw khat sungah a zu koih in, a kilawmsakna dingin a zu hai kiim ah paak koih dimdiam in amahmah in hong tawi in va pia hi. Ahih hangin tangvalpa'n na nial leuleu in, “Kei pen thu-um mi khat ka hih manin zu dawn lo hi’ng na ci kik hi. Na nial kik mawk ahih manin managerpa zong lamdangsak leh kisuanlah thuah kawmin, “Lawm aw, hih zu leh, a hai leh a kuang kilawm sa lo na hiam? Ahih kei leh ka nasep zia uh siangtho sa zo lo na hiam? Ahih kei leh cit lahna nei ka hi uh hiam?” ci’n lamdangsakna lianpi tawh dongin hong dawnsak ta peuh in, a man bei hi lel hilo ahi hiam? Dawn in la, kilungnuam sak hoh in ci’n a dawnna dingin kun ngaungau hi.

A managerpa in a dawnna dingin kun teitei ahih manin tangvalnopa in zong, “Tua nong cih teitei leh vanleng hawlpa va dawnsak masa in, managerpa aw’’ na ci hi. Managerpa’n “Bang hangin vanleng hawlpa’n zu dawn zenzen ding ding ahi hiam? Amah pen vanleng hawl a nasem lai (duty) ahi hi. Dawn mawk leh hih vanleng hong kiatpih dinga, a sunga tuang khempeuh in i nuntakna suplawh ding hilo i hi hiam?” ci’n dawng kik hi.

Tangvalnopa zong a mit panin khitui hong taak keuhkeuh in, “Managerpu aw, kei zong Christian ka hi hi, ka UPNA ka kepcing tawntung theihna dingin galvil tawntung a DUTY den ka hi hi. Tua ahih manin hih zu dawn leng ka NUNTAKNA leh ka kha ka suplawh ding a, hell sungah hong kiatpih ding hi. Kei pen a tawntungin gal a vil den, 100% duty tawntung ka hihi,” ci'n kam khum takin dawng kik hi.

By: Thang Khan Lian

A MAWKNAPI I HIHI

A MAWKNAPI I HIHI

Pa. Khup Za Go Phawkna in:,,....

1. Pil kisa-in tangthu khangthu i mal ziahziah hangin,
I minam itna i neih lei leh a mawknapi i hi hi.

2. Nei kisa-in taih innpi leh mawtawpi tawh i kitun luapluap hangin,
Mi zawng daipamte i hehpi kei leh a mawknapi i hi hi.

3. Thei kisa-in B.A., M.A. laipi i ngah deda hangin,
I gam i lei i khual kei leh a mawknapi i hi hi.

4. Pasian thu phawk kisa-in pulpit tung pan i kiko lualua hangin,
Ama bawlsa mihingte itna i neih kei leh a mawknapi i hi hi.

5. Mi a pil a cimte in a mi a sate uh kemin a don uh hi.

6. Mi a nei a lamte in tangpi tangtate panpihin a huh uh hi.

7. Mi a thei a siamte in a gam a lei uh khangsakin a puah uh hi.

8. Mi Pasian a phawkte in Ama thupiakna zui in a gamta uh hi.

-Rev. Khup Za Go
(Lungdamna Aw, Vol. XII, No. 1 Jan. 1988, laimai 20 panin a kitei khia ahi hi).

A ETTEH HUAI NAUPANG PA

A ETTEH HUAI NAUPANGPA

Ni khat naupang khatin a teek mahmah a pa hotel ah annekpih dingin tonpih hi. An hong nek ciangun a pa'n a khateh nengte a puanak leh a pheituam ah kiasak in, puante nin gawp ahih manin hong etlawm het lo hi.

Tua hotel a anne ten kih bawl in hem-et gualgual in, phunsan ngeingai uh a, ahih hangin tua naupangpa'n dai dide kawmin a pa'n an lim takin a kham dong nesak hiathiat hi.

Mi dang ten zahpih bawlin a et gega hangun tua naupangpa'n a pa zumpih het loin a pa' an kham ciangin khut silna munah tonpih a, tua anneng bangte lim takin hah siangsak hi. A pa lim takin a hah siang khit ciangin a sam lim takin hiatsak in, a mit limlangh maante zong lim takin hah siangsak kik in, a pa bulhsak hi.

Khut silna buk panin hong pusuak khiat ciangun hotel a tu khempeuh in lamdangsakna tawh dai khikhe in tua patate en uh hi. Tua puteekpa a zahpihna uh hangin kam khat beek a keek ngam om loin kisuanglah mahmah uh a, lim takin zong tua patate en ngam nawn lo uh hi.

Naupangpa'n a pa tutna nuam mahmah khatah tusak in, a sum bei teng pia dingin sum kaikhawmpa omna bill counter a pai in, a sum bei khempeuh va pia hi. A man khit ciangun hotel panin pusuak dingin hong kithawi uh a, naupangpa'n a pa a khut ah len hi.

Tua lai takin hotel sunga khangham pen khatin tua naupangpa kiangah, " Ka tano aw, nusiat lianpi khat nei ing cih lam na kithei hiam?" ci'n dong hi.

Naupangpa'n, "Sia aw, nusiat khak bangmah nei keng e," ci'n kam dam takin dawng hi.

Tua khanghampa'n, "Nusiat lianpi na nei hi ka tano aw. Pa kici khempeuh leh ta kici khempeuh adingin a etteh huai lianpi khat sinna ding lianpi nong nusiat hi," ci'n dawng hi.

Phawk ding: I nu-le-pa pen i pian'khiat ma panin hong kem hong khoi ahih man un hong nuntakpih sung lai tenguh lunglengsak loin, i khasiatsak loh ding thupi hi. A sih uh ciang kohsa, puanbuk i kengsak zo kei zongin a nuntak sunguh i lungkimsak ding pen thupi zaw hi. Hong it hong kemte pen i it a, i kep ding i tavuan lian pen ahi hi. Nu-le-pa pen it ding, zahtak ding leh i kep ding cih pen i leibat lian pen ahi hi.

-'Evening Dinner with a Father' -http://www.moralstories.org/

NA LAWMNGAIH AH PILVANG IN

VII. NA LAWMNGAIH AH PILVANG IN

Sol. 8:6 “Itna zong sihna zahin thahat a, ngaih na zong sihna zahin khauh hi. Itna, mei bangin kuang khia a, meikuang lian pen a suak hi”.

Itna Pasian in ama lim-le-mel sun a hong bawl na hih manin itna leh ngaihna cihte nang nuntakna ah zong a om ahi hi. Nungak khat na ngaih a, tangval khat na ngaih leh a lamdang hilo hi. Pasian in pasal khat guak a om ding hoihsa lo ahih manin ihmu sak a, a naakguh khat lakhia in numei a bawl hi (Gen.2:21-22). Tua a bawl numei pen pasalpa in a muh ciangin, ‗Hih in keima ci, keima sa ahi hi‘, ci-in amah it thei hi (Gen.2:23). Pasian in pasal-le-numei pen ki-it, kingai-in, kiteeng a, suan-le-khak a nei dingin hong deih hi. Tua Pasian geelna na tangtun‘ sak nadingin lawm na ngaihna ah na pilvang ding thupi mahmah hi.
Pasian in nang adingin geelsa a a koih hi a, tua Pasian hong geelsakna na ngaklah khak leh haksatna tampi na thuaklawh kha ding hi. Pasian zia ngakzo leteh nang adingin a hoih pen hong hi ding hi. Pasian hong sehsaksa tawh na kituah khak masiah na lungkim zo ngeilo ding hi. Pasian hong sehsaksa tawh na kimuh khak masiah lawm na ngai kha phial zongin na kikhenkhen lel ding hi. Tua ahih manin na lawmngaih tawh kikhen a, na kiteenkhak kei le zong ‗Pasian in kei adingin hong sehsak pen tawh kituak kha nai lo ka ve maw‟ ci-a na puak siam ding kisam hi.

Duke of Wellington
Eton sang panin laisin kipan a ahi zongin inn sung haksatna leh lai a siam melloh manin a sang nusia in mun dangah a pai hi. A nu‘n ‗Ka tapa bangmah suaklo ding hi; nungak, zu leh sum kitah in buai hi‘, ci-in a lungkhampih mahmah khat ahi hi. A ngaih mahmah a nungaknu a zi dingin a dawp leh, ―Bang tawh ka tanu uh vak ding na hiam?‟, ci-in a nu-le-pate'n na nolh uh hi. Tua panin heh lua ahih manin hong hanciam kik a, a laisin hong zomto hi. Galdo dan ding amah-le-amah-in hong kisin tawmin hong kalsuan leh leitung bupin a kihtak mahmah Nepoleon galphual ah a hing tangin man zo hi. Leitung bup galhangpa a hing mat zopa hong suak hi. A minthanna leitung ah bei nawnlo ding hi.
Hih mipa bangin na lawmngaih in hong khen khak leh zong hanciamna in nei zaw in.

‗Sing zong a pak khempeuh gah kim lo‘ cih paunak khat a om mahbangin ‗a kingai khempeuh zong kiteeng kim lo hi‟. Na lawmngaihna ah pilvang mahmah in. Mi pawlkhatte pen a lawmngaih in khen leh nasa lua-in a nuntak na a beilawh om thei hi. A diakin numeite a lawmngaih in khen leh na sa lua-in a nuntakna beilawh thei uh a, pasalte leuleu a lawmngaih in khen leh siatlawh ngiingei thei uh hi. ‗Lawmngaih khat nei ning ei‘ na cih leh na ngaih sawm pa/nu bangci dan mi hi-a, Zeisu gumpa leh Topa in a sang takpi hiam? bang dan lungsim ngaihsutnate nei ahi hiam? cih na tel sawm masak ding thupi hi. Tua hileh a nungsang ciang vai haksa lua tam nawnlo kha ding hi.

Lawm na ngaih ciangin kidop ding thu pawl khat:

Na lungsim khempeuh na pia kha phial zongin na pumpi khempeuh pia kei in! Na lungsim khempeuh zong pia khin pah kei in!
Ama tungah ngaihmuang lua pah kei in!
A piangthak takpi hiam cih thei in!
A tangthu (a pu, a pa tangthu) kan masa in!
Amah bek pasal/numei danin ngaihsun kei in!
Ama deihna bekbek zui kei in!

Na lawmngaih in hong khen khak leh:
o ‗Sian‘ gawm loh hi‘ ci thei in!
o Nasa lua-in kap kei in!
o ―Tangval/ nungak dang tam lua lai‖ cih san ziau in!
o Thungetsak in!

A kidophuai thu pawl khat:

Na lawmngaih hangin na nuntakna beilawh sawm
kei in!
Na lawmngaih hangin na nuntakna siatlawh kha kei in!
Amah ngai-in na vulvul hangin ama‘n hong phawk kha nawnlo ahih manin mangngilh sawm in!
Heh ngaihsut leh khasiat ngaihsut kha kei in!
Ama hangin na nuntak loh mahbangin ama hangin zong sih sawm kei in!
 Na kisiasak gawp a, na kithat phial zongin hong phawk kha nawn lo hi!

“…Banghangin nang kisiasak tawm ding na hi hiam?”. Eccl. 7:16b
“…Banghangin khansih laizang ding na hi hiam?” Eccl. 7:17b.

KUNG ZUAN IN TAI

KUNG ZUAN IN TAAI

Mihingte ih nuntakna sung ah Kung cih pen a kitangsam mahmah khat ahi hi. Kung neilo mihing khat pen a nuntakna ah gualzawhna, mite ading thupha, lawhcinna cih te haksa in, Christian khat ahih leh zong a nuntakna hangin Mite in Pasian hoihna mu thei tuan lo hi.

Sanggamte aw, tua hamphatna a ngah khinin ka kingaihsun kei hi. Tua ahih manin a beisa thute mangngilh bawlin mainawtin ka hanciam a, ¹⁴Khrih Jesuh nasepna tawh vantung nuntakna-ah Pasian' hong sapna ahi hamphatna ka ngahtheihna dingin, a kung lam zuanin tangtakin ka tai hi.( phi 3:13-14)

NGIMNA OR KUNG

Mihing khat ih hih leh Kha thu hi-in Leitung thu hi ta leh Ngimna or Kung neih ding kisam hi. Bawlung suite in Kung nei lo-in Bawlung kisui leh a muhnopna om lo ban ah Gualzo leh gual lel cih kitheithei lo hi.

Tua mah bangin ih nuntakna sung ah Ngimna or Kung neilo pi a ah mawk paipai ih hih leh lungkhamna leh guamthuk pi sung bek in ih nuntakna hong ngak lel hi. Mi gualzo ih cih te pen Pasian tawh kizom tawntung a, Haksatna omta mah leh Paul bangin “Kung” zuan a ah tai tentante mah in gualzawhna mu ding hi.

Hih leitung pen Haksatna bei ngei lo ding a, tua haksatna te Nawkzawhna tha aneite mah gual zo hi. Tua haksatna te tawh kipelh ding pen leitung ngeina hi lo a tuate paltan, phutan, a nawkzote in gual zawhna ngah bek hi. Tua bangte nawkzawhna dingin Nang tha tawh na hi zo kei ding a, Napaina peuhpeuh ah,Topa tawh tawnkhawm den peuh le cin Nang a dingin, Haksatna omlo hi lo a haksatna kizo thei cih a la ih saksak hong tang tung panin na “Kung” na tung thei ding hi.

KUATE GUALZO

Christian ih nuntakna sungah ih gualzawh theihna dingin Topa Pasian Um in Muangtakpi le hang ahong tungding kum sung ah, Ih Kung tungin gualzawhna na mu pelmawh ding hi. Taksa Kung leh Kha lam Kung ih tun theihna dingin Jesuh Um bek lo in Ih muang ngamtaktak ding pen athupi mahmah ahi hi. Jesuh pen thei bek hi lo in Nei in, Jesuh pen Um bek hi lo in Muang taktak leng(Muang cihteh nuntakpih) Kum thak sung ah gualzawhna ih mu pel mawh ding hi.

·         Jesuh pen Emmanuel ahih bangin Nisim na nuntakna khempeuh ah Na paina, na sepna, na lupna, na pauna leh na ngaihsutna ah Na kiomkhawm sakden tak pi hiam?(Mtt 1:23)

·         Nisim na nuntakna sung ah thu na kilaksak den takpi hiam?

·         Na nuntakna sung ah a lian penin na koih den takpi hiam?

·         Amah tawntungpa ahih lam na phawk den takpi hiam?

·         Amah bek Na Nopsakna ahi den takpi hiam?(Isaiah 9:6)

Kum thak sung ah taksa thu, Kha thu ah agual zo ih suah theihna dingin Na khempeuhte sangin Jesuh mah lian sak zaw peuh leng Ih nginna, ih tupnate , “Ih Kung” ih tung thei ding hi.  Christian ih nuntakna sung ah Ih pumpi mahmah mite adingin khuavak ahih theihna dingin, Mite in ih nuntakzia, omzia khawlzia tawh Pasian amuh theihnang Aphat theih nangin Nungtak hoih kisam mahmah hi cih zong Kum thaksung adingin kipulak nuam hang.(Mtt5:16)

Ahong tung ding KUM THAK sung ah A gualzo Nu,Pa ih suah theihna dingin Atung ate ih pulak mah bangin:

o   Kung neih kisam,

o   Topa tawh ih nuntakna khempeuh ah Tawnkhawm det kisam,

o   Haksatna omlo hi lo a, tua haksatnate hong zawhpih ding Jesuh tawh kalsuan det kisam,

o   Leitung pen haksatna beina ding mun hilo ahih manin, Haksatna tawh hong kipelhsakin hilo in, Haksatnate hong nawkzo sak in cih theih ding kisam,

o   Nuntakna siangtho leh Gamtat hoih kisam, tua hi leh Ih tupna Kung tung zo ban ah Mite in Pasian mu thei, phat thei ding uh hi.

o   Taksa bek hi lo lungsim hauhna na ngahding a, Lungsim hauhna in ih nuntakna hong lungnuam sak , hong lungdam sak, hong maitaisak den zaw hi…

Asim kha mimal khat ciatin hong tungding Kum Thak sung ah A Gualzo mikha ih suahtheihna dingin Topa in Thupha hong piaciat ta hen! Amen

Lungdam

Siam Khaute

12/30/2015

USA.

CHRISTMAS THUPUAK

CHRISTMAS SHORT MASSAGE

LSTho sung ah Jesus hong suahna tawh kizui-in eite adingin a hi takpi mah hiam!

 

1. Jesuh Immanuel ah Hih bangin Nangtawh hong Omkhawm den takpi hiam?(Mtt1:23)

 

2. Note ading in David Khuapi sung ah Honpa ... Nang adingin Honpa ahitak Pi hiam?(Lk2:11)

(Isaiah 9:6)
3. Lamdang takin Thu Hong lak Pa ahitakpi hiam?

4. Nang a Dingin vanglian Pasian ahitak pi hiam?

5. Nisim nuntakna leh Kha adingin Tawntung Pa ahitak Pi hiam?

6. Kha Thu , Taksa Thu ah Nopsakna Kumpi Na hisak takpi hiam?

 

KUATE IN VABIA
1. Leitung ah Aksi lam Siam mahmah Mipil Scientists te, Nang Leh kei in Jesuh Biak peuh haivai ihsa kha hiam?

2. Tuucingte in Va bia, sun Leh Zan a tuucing nasem ten vabia uh, Leitung ah lametna neilo pen2 hita leng, genthei pen miniam pen hita leng Jesuh aphawkte hong domto, hong lamto in Hong it veve na phawk hiam?

 

JESUH NANG LEH KEI ADINGIN

1. Leitung Amun niam penpen Na mun Bethlehem ah kiniam khiat in hong suak, Nang Leh Kei Kiniamkhiat ding deih hi.

2.Mite I ut lohna mun pen Bawnginn ah hong suakin Bawng an kuang sung Hong kisial Na pen Nang Leh Kei Hong khual man hi.

3. Tua gam sung ah a Khuata pen Bethlehem ah hong suak Na pen Nang Leh Kei Hong khual man hi.

4. Mary Paubanna anei lo nu Hong zat pen Eite zong Amah tawh kizom a Paubangna tuam om lo ding Hong deih a, ...

 

Nagam tat hoih uh mite in amuh ciangin Pasian aphat theihna ding...(Mtt5:16) Hih Mary te Nupa Tung pan Hong musak.

 

Mihau inn khuapi pen2 ah suak Leh ei pawl2 in Ih mukha Zo Kei ding hi, nang Leh Kei Hong khual man, Hih Dan in Aniam pen2 teng tawh Hong kipan hi.

Ih telsiam Leh Nang Leh Kei hamphat nang hi,

Topa thupha, Christmas thupha nang Leh Na inn kuan Tung vuah Hong Tung Kim hen!

Lungdam
Kh Sian Siam 12/18/2015