WHO KIPAWLNA PAN A TAIKHIAT THU TANGKO

 WHO KIPAWLNA PAN A TAIKHIAT THU TANGKO

Pu Trump in kumpi tokhom tungah a tut ni masapen niin World Health Organization (WHO) panin a taikhiat thu official in hong tangko khia hi.

Pu Trump in WHO pan a taikhiatna hang tuamtuam gen a, COVID19 hang leh US in gam dangte sanga Fund tampi tak a piak zawkna hanga a lungkim loh thu zong gen hi.

Trump Announces U.S. Withdrawal from WHO on First Day of New Term

President Donald Trump has officially announced the United States' withdrawal from the World Health Organization (WHO), CNN reports.

DONALD TRUMP EXECUTIVE ORDER (galtai vai)

 

DONALD TRUMP EXECUTIVE ORDER (galtai vai)

Bangbang hi ta leh US upadi in thuneihna a piak bangin Pupi Donald Trump in a executive orders zangin US Refugee Admissions Program (USRAP) nuaia peemta-galtaite lak ding vai khempeuh khaktan in, hong dinkhawlsakta ahih manin khasia lo ding hi hang. I theih loh leh mang lam zong hi lo a, thei gige mah a vote i piak tantan ahih manin pasal ciin lungkia lo ding hi hang.

Hih order pen hong tung ding January 27, 2025 nitak lam nai 12:01 am (eastern standard time) liana kipanin zat pat hi ding hi. Cihnopna-ah January 27, 2025 nai 12:01 ma-in galtaite zong hong tung man lai cihna hi pah hi. 

Thu dang la dang a om kik masiah Secretary of Homeland Security in galtai vai khempeuh khaktan /suspend phawt ding cihna hi pah hi.

Ni 90 sungin galtai lak kik ding vai tawh kisai pen Homland secretary leh Secretary of State-te in Homeland Advisor tungtawn in president kiangah report pia ding uh a, galtai lakkik hun ding thukhensatna a om kik masiah, ni 90 (kha 3) halta in President kiangah report pia zel ding uh hi.

REALIGNMENT OF US REFUGEES ADMISSION PROGRAM: Cihnopna-ah Pupi Donald Trump in USRAP nuaia galtai lakdan pen gama dingin hoih sa zo lo ahih manin a khekna ding, lampi dang zong ding cihna hi pah a, galtai lakdan ding lampi dang, paidan thak leh hoihzaw a muh kik mahsiah galtai lakdan ding vai pen dinkhawl phawt ding hi leh kilawm hi.

Zan sawt khit, ihmutsuak, lusu kawmkawma a hampi kong teisuk buatbuat hi a, a kicing leh a kitel sinsen in hih a nuaia Link kong piak, Pupi Donald Trump Executive Order-ah na sim ciatta un.

https://www.whitehouse.gov/presidential-actions/2025/01/realigning-the-united-states-refugee-admissions-program/

INTERNET PAN LIM HOIH LO ET ZONGSATNA

INTERNET PAN LIM HOIH LO ET ZONGSATNA ( ADDICTION TO INTERNET PORN )

By Rev.Khual Lam Cin Mang

General Secretary, TVBA

THU MASA: Pornography ( a tomin Porn kici hi ) a khiatna bang hiam? Oxford English Dictionary in: Pictures, writings, or films that are intended to arouse sexual excitement, ci-in na gen hi. Tua ahih manin “ PORN / PORNOGRAPHY i cih ciangin nulepa omkhopna vai ah huukna leh lanna lust ) a khangsak lim, laigelh-thugelh ahih kei leh limcinte a genna ahi hi. Khantohna tawh kizui-in a neu a lianin i phone-te panin internet tawh kizangkhawm pahpah ahih manin internet panin porn en tam mahmah hi. Tua ahih manin tu-a kipanin Zokam tawh gengen nawn loin Mikang kam ‘ porn / internet porn’ cih kong zang ziau ding hi.

  Khristiante adingin internet porn a hoih lohna i gen ding uhi. Lai Siangtho in deih het lo ahihna zong i gen nuam hi. I galpa Satan in hih internet porn zangin Khristiante sungah mun hong la mahmah, innteek tang mahmahta ahih manin i kidop ding thupi mahmah hi. A neu a lian in smart phone i tawi kim theih-a kipatin khangnote bek hiloin  pastorte zong peng lo, upate zong peng lo, gam khangtote bangah numeite nangawn porn et zongsangta ( addicted ) uhi. Satan in tulaitakin a zat a galvan hoih mahmah internet porn ahi hi. Hih porn a hoih lohna thu tam lo kikumsukin internet porn et zongsatna pan suahtak sawm ciat ni.

INTERNET PORN ZONGSANG TAM MAHMAH HI: Covenant Eyes in a kankhiatna ah hi bangin mukhia hi:

( i ) Setkan ( second ) khat simin mihing 28,258 te in internet porn en  uhi.

( ii ) Setkan khat simin internet panin porn et nading sum US $ 3,075.64/ kizang bei hi.

( iii ) Porn limcin ( films ) 88% pen pumpi kigawtbawlna kimu thei-in, 49% pen kam tawh kikobawlna pian vive zang uhi.

( iv ) Porn limcing ( porn performers ) 75% te in kanza khamtheih ( marijuana ) zang uha, 50% te in lungsim thathosak khamtheih zatang ( ecstasy ) zang uhi.

( v ) Mobile phone 5 teh 1 in internet ah porn tawh kisai website zong uhi.

( vi ) Youth pastor 5 teh 1 leh Senior pastor 7 teh 1 in pongmanin ( regular basis ) internet porn en den uhi. 

( vii ) Senior pastor leh youth pastor 43% te in a beisa hunin internet porn tawh ka na buai ngei hi, ci uhi.

( viii ) Khristian kici pasal 64% te leh Khristian kici numei 15% te in kha khat teh khat vei porn ka en hamtang uhi, ci-in gen uhi.

( ix ) Pawlpi 7% bek in porn tawh a buaite hot khiat nading nasep ( ministry program ) sem bek uhi.

( x ) A tangpi ( average ) in pasalte kum 12 panin porn et kipan uhi.

( xi ) Khangmoi ( kum 13-19 kikaalte ) 71% te in online ah a et uh website-te a nu leh pate uh theisak loin phiat sim den uhi.

( xii ) Keylogger Review in a ciamtehna ah nisimin internet pan naupang porn ( child pornography ) a zong mihing 116,000 val bang pha den hi, ci hi. Nunglam deuha Kawlgama thupiang, tuni ciang dong a kibuaipih lai Victoria vai bang zong a dahhuaipi khat ahi hi.

2. LAI SIANGTHO IN PORN TAWH KISAI-IN BANGCI GEN HIAM?

Internet panin a kizong tam pen porn tawh kisai website te ahi hi. Tulaitakin a hoih het lo internet porn in leitung buppi ah kizelin natna dam thei lo bangin a zongsangte tawp pak, khawl pak thei nawn lo uhi. Satan in hih internet porn zangin lawhcing kisa mahmah hi. Hih internet porn hangin nupa kaal a kisia tampi om hi. Huukna leh lanna ( lust ) khangsak ahih manin kibuan ( rape ) zong pungsak tuam mahmah hi. Angkawmna ( adultery ) tamsak tuam hi. Hih internet porn in nulenu palepa kilunggulhna leh omkhopna ( homosexuality ) piangsakin, khangsak hi, kici hi. 

 Lai Siangtho in mawhna lianin a ciapteh thumte in: Cilesa kilunggulhna ( the lust of the flesh ), mit tawh kilunggulhna ( the lust of the eyes ) leh kiphatsakna ( the pride of life ), ( 1 Johan 2:16 ) cih teng ahi hi. Internet porn in cilesa kilunggulhna leh mit tawh kilunggulhna piangsak hi. 

 Filippi 4:8 ah - Sanggamte aw, a tawpna-ah ka hong gennop thu in, a hoih le a phattaak thute tawh na lungsim uh na kidimsak un. Tuate in: A man, a dik, a tang, a siangtho, a deihhuai, le a pahtakhuai thute ahi hi, ci-in na gen hi. Tua ahih manin internet porn in i lungsim pen hih thute tawh kidimsak het lo ding ahih manin internet porn pen Pasian in deih het lo pah hi. 

 Internet porn a hoih lohna Lai Siangtho in zong hih bangin na gen hi.

( i ) Mawhna-in na ciamteh pah hi. Internet porn in midang tawh mawhpih nopna lungsim piangsak ahih manin mawhna hi pah hi. Matthai 5:28 ah- Ahi zongin ke’n kong genin-ah: Mawhpih nopna lungsim tawh numei khat a en mi peuhmah in a lungsimah tua numei tawh a mawh ahi hi. 

( ii ) Internet porn’ sila kisuak thei hi. I zongsat khat peuhpeuh pen tua i zongsat ii sila cihna hi. 1 Korin 6:13 ah “Ka ut peuhpeuh ka hih theih nading thu om hi,” a ci omkha ding hi. Ahi zongin na khempeuh hih ding kilawm lo hi. Kei zong ka ut khempeuh ka hih theih hangin tua bang gamtatna khat peuhpeuh’ sila ka suak nuam kei hi. 2 Peter 2:19 ah .... Bang hang hiam cih leh mite pen, a hong zo peuhpeuhte’ sila ihi hi.

( iiii ) Internet porn in siatna ( destruction ) piangsak hi. Paunak 6:25-28 ah 25 Amau’ melhoihna iplahkha kei inla, amau’ hong zawlmitna khenglahkha kei in. 26 Bang hang hiam cih leh anlum khat tawh numei paktat khat kingahzo a, ahi zongin numei tawh mawhna in nuntakna bup siasak hi. 27 Na ang sungah meikuang pom lecin na puan kang loin om ding ahi hiam? 28 Mei-am tungtawnin pai lecin na khe kang loin om ding ahi hiam?

3. KOICI BANGIN INTERNET PORN ZONGSATNA PAN SUAKTA DING?  Internet porn zongsatna pen khamtheih zatui ( drugs ) zongsatna tawh kibanga a zongsangte nisimin internet porn en loin om thei nawn lo uhi, ci-in mipilte ( experts ) in gen uhi. Tua banga zongsatna in Khristiante adingin i kha nuntakna susia bek hi loin i pumpi leh i lungsim mahmah in zong thuaklawh ( side effects ) hi. Internet porn zongsatna hangin pumpi leh lungsim in a thuaklawh thute ( side effects ):

( i ) Kisuanna lungsim nei den uhi.

( ii ) Amau leh amau kimawhsakna ( guilty ) nei den uhi.

( iii ) Hawmkisakna ( emptiness ), khattang kisakna ( loneliness ) leh lungkiat nate ( depression ) nei uhi.

( iii ) Mi lakah om nuam kholloin tuam om den nuam uhi.

( iv ) Nupa kikhenna ( divorce ) piangsak hi.

( v ) Ihmut kham ngei lo uhi.

( vi ) Kibuanna ( rape ) piangsak hi.

( vii ) Ki-it kingaihna om lopi-in omkhopna ( sex ) piangsak hi.

 Tua ahih manin internet porn in hoihna khat zong a piansak om lo ahih manin a zongsangte in tawpsan ding loh ngal thudang om lo hi. Pasian in zong deih lo ahih manin hih zongsatna pen nutsiat ding, taihsat ding, zatkikel nawn lo ding mawhna lian khat ahi hi.

 ( i ) Hih internet porn zongsatna panin suahtak nadingin pianthak ( Jesuh sungah mithak suahna ) bek in hong gualzosak ding hi. Jesuh tawh mantaka kizopna bekin in hong gualzosak ding hi. Johan 15:5 ah “Kei pen leenggui ka hi a, note pen a hiang na hi uh hi. Note in kei tawh loin bangmah hih thei lo ding na hih manun kei tawh a kizomte in gah tampi na gah ding uh hi. 

 ( ii ) A piangthak khat na hih nak leh Kha Siangtho in hong gualzawhpi ding hi. Efesa 3:16 - note’ lungsim a thahat nadingin Pasian in a kicing ama vangliatna sung panin a Kha Siangtho tawh note hong thakhauh sakin,

 ( iii ) Pasian tungah i lungsim i pumpi apin kipumpiak ding leh i kipuahphatsak ding ahi hi. ( Roman 12:1-4 ; 1 Tua sahih ciangin sanggamte aw, Pasian in eite tam veipi tak hong hehpih ahih manin ama lungkim nading le ama nasep nadingin nomau mahmah a hingtangin Pasian tungah na kipiak nadingun ka hong thum hi. Tua banga kipiakna pen Pasian biakna man taktak ahi hi. 2 Leitung mihingte’ gamtat bangin gamta kei unla, na lungsim uh kikheelin Pasian kipuahphasak un. Tua hileh a hoih nate bang hi a, bangte in amah lungkimsakin, bangte a kicing hiam ci-in thei-in Pasian’ deihna na phawk thei ding uh hi. )

 ( iv )Topa tungah i lungsim ngaihsutna leh i mitte mahmah ap ding ahi hi. ( 1 Johan 2:16 - Bang hang hiam cih leh pumpi deihna, mit tawh mu-in i deihte, le mite’ kisaktheihpih nate ahi leitung nate khempeuh pen Pa Pasian tawh a kizom thu hi lo a, leitung tawh a kizom thu ahi hi. ) 

 ( v ) Hih internet porn zongsatna hoih lo na zawh nadingin Pasian kiang panin thahatna ngen in. ( Filippi 4:13 - Khrih in a hong piak vangliatna tawh hihte khempeuh nawkzawh nading thahatna a nei ka hi hi. )

 ( vi ) Lim hoih lo tuamtuam et nopna ze-etna panin Topa’n hong kep nadingin thu ngen in ( 1 Korin 10:13 - Na tuah uh ze-etnate khempeuh pen mite’ tuah ngeingeite mah ahi hi. Pasian in citakin a thuciamna lenkip ahih manin note’ thuak zawh loh ding ze-etna hong tuaksak lo ding hi. Ze-etna na tuah hun uh ciangin zong na thuakzawh nading uh thahatna hong guan ding ahih manin na suahtak zawh nading uh lampi hong honsak ding hi. )

 ( vii ) Na ngaihsutna na lungsim ah Pasian mun pia inla, Pasian lungkim nadingin gamta in ( Filippi 8:4 -  Sanggamte aw, a tawpna-ah ka hong gennop thu in, a hoih le a phattaak thute tawh na lungsim uh na kidimsak un. Tuate in: A man, a dik, a tang, a siangtho, a deihhuai, le a pahtakhuai thute ahi hi. )

 

 Hih internet porn thu i gen ciangin nu leh pa pawlkhat in thupi ngaihsut khollo kha mai thei ding hi. Ahi zongin i upmawh sangin khangno tampitak buai uhi, Khristian kici mi tampitak buai uhi. Pasian nasem kici pawlkhat zong buai uhi, ci-in mipilte in mukhia uhi. Na upmawh loh pipi hih ze-etna sungah na buai mahmah ( struggling ) uhi, ci-in gen uhi. Tua ahih manin nuleh pate in zong i tate in a phone koici zat uh hiam? cih a kanhuai thu khat ahi hi. Khristiante pen Pasian in lungsim pumpi a siangtho sinsen dingin hong sapte ihih manin hih internet porn tawh kisawhkhak loh limlim ding thupi hi. A zongsangkhinsate in zong i tawpsan ding ahi hi.

 

MUHDAH NEI DINGIN NUNTAK HUN TOM LUA

 MUHDAH NEI DINGIN NUNTAK TOM LUA

Muvanlai a len ciangin vanlai ah leng ahih manin vasa dangte'n buaisak ban lo hi. Khatveivei singtungah a tuan ciangin vasa khempeuh lak panin vaak in na buaisak ngam bek hi. Vaak in muvanlai tungah tuangin tutu a, muvanlai in bangmah lawhse loin vansang lamah lentohpih vingveng hi. Tua vaak in tutu ahih manin muvanlai in vansang lam a lengtohpih na phawk lo hi. Vansang mahmah ciangin huih na tawm a, vaak in huih ngah nawn lo ahih manin luvai-in kiasuk kici hi. 

I nuntakna ah vaak bangin hong tutu om thei hi. Nang mawhna zong hi tuan loin midang khat peuh a tuk kei uh leh lungnuam thei lo mi om hi. Hong kituktuk le ki-enpha inla, na hihna ahih leh kipuahphatna in nei in. Na hih kei leh nang hihna hi lo ahih manin awlmawh se ken. 

Vaak in a tuktuk ciang muvanlai in a sanglen tohtoh bangin nang zong thalakna in zang inla, kalsang suanna in na zang in. Nuntak hun tom ahih manin mi muhdahna dingin pammaih lua hi. Mitengin zong hong pakta dingin ngaihsun kenla, zong hong it kim dingin ngaihsun ken. Nang lam panin miteng na it zawh kei leh mudah nei kei lecin na vanzang ding hi. 

South Africa a apartheid (minam deidana) hunsungin mikangte'n mivomte simmawh cihtakin na simmawh uh hi. Mivomte'n kha (soul) a nei diam, cih nangawn simmawh kammal na zang uh hi. Tua bang simmawhna a thuak uh ciangin mivomte'n thagum tawh thuk kik ding hi leh zo ngei lo ding ahih manun "nui-hiuhiau" kawmin maitaina lak uh hi. Hehna khasiatna in ngaihsun loin a zawh theihna ding uh omsun ahih leh heh lo ding "nui mai" lak ding cih hi. Cihmawhna ahih hangin amau lungsim natna in nei loin maitaina lamin na la uh ahih manin gualzawhna nam khat ahi hi. 

Mivomte'n a gualzawhna thusim, Martin Luther King in, "The Strength to love," le "The Strength to Forgive," cih kammalte na zang hi. Hong simmawhte "itna" le "maisakna" tawh thuk leteh nang a gualzo na hi hi. Tua pen "Jesu dan" (Jesus way) ahi hi. Topa thupha.

By: Rev. Dr. JM. Ngul Khan Pau

GAMDANG TUNG ZOMITE - 8

 

GAMDANG TUNG ZOMITE - 8:

Rev. Dr. J.M. Ngul Khan Pau

US President kiteelna November kha ciang om ding tawh kisai tulaitak gamsung makaite’n buaipih mahmah, kua in hong ngah ding hiam cih kithei nai lo hi. Gam khat kiteelna ciatciat ah bang hangin gamdangte’n zong US kiteelna bildawh hiam cih leh America gam in leitung sum le pai zonna huzap zo lua mahmah ahih man hi. US 2022 census ah mi 333 million om a, tua sungah Mikang pen 58.9%, Hispanic 19.1%, Mivom 12.6%, Asia 6.1%, Multi-racial 2.4%, Native American 0.7% in kiciamteh hi. Gam khangto mahmah i cihte zong Pasian khut in a dom kei leh kiasukin dingkik zo nawnlo uh hi. British kumpi gam nidangin “nitum ngeilo” kici a, tuni-in leitung gam khat bangin kingaihsun lel hi. US gam zong leitung economist’n winter season (phalbi hun) tung dingin a gen pawl om khin zo hi.

US gamsung Mikang Pawlpite bang hangin kiam hiam, ahih kei leh thanem hiam? Hih dotna a dawnna tampi omkha ding hi. Pasian thutak kigenna sangin eima’ lunglutna lam bildawh zawkna, mawhna, tatkhiatna le sianthona gen sangin “thalawpna” ding (motivation) message lamah kipaizaw hi. Tua hangin kikhopnate sunglam kilamdanna sangin zaknop ciang bek tung hi. Kikhelna ciang kitung loin noptuamna ciang bek kitung hi. Lungsim a om thute pawlkhat kikum ni. 

Pawlpi Kikhenna: Tukum Pawlpi tuamtuam ka hawhna uhah khangno pawlkhatte’n hong gen uh ka bilkha ah gingging lai hi. Nu le pate’n Pawlpi vai buaina om ciangin ko a tate uh hong kuppih se loin Pawlpi dangah hong taipih uh hi. Tua pen ko khangnote lasa khawm, Lai Siangtho sin khawm le lawmta kingai mahmah lai Pawlpi hong kibat loh ciangin komau zong na thuak mahmah hi ung. Tangval khat in, “Pawlpi kitap ka thuakkhak a thumveina hi. Tutung pen kah cih takin ka kap hi. Nidang lai-in ahih leh ka hehna lian lua, kikhawm loin tawlkhat ka om khin a, Pawl kitap pen i puansilh lai balkek tawh kibang hi. I biakna sungah hih bangin kitapna om ahih leh Khris in hong gawmkhawm zo lo hiam, ahih kei leh ei pen a kilomkhat thei lo minam ihi hiam, ci ing,” hong ci hi. Pawlpi kikhen ciangin mittang tawh  muh loh hangin lungtang sung liamna kinei ciat hi. Tua liamna hangin “keimah ginat loh man hi,” cih sangin midangte hangin kigenzaw a, tua in ei le ei kidiksakna, midangte mawhsiatna kampau hong tam mahmah hi.

Tua ciangin Pawlpi pen “kei Pawlpi,” “kei phuhsa” cih kampau hong tam mahmah a, Pawlpi pen Khris in a sisan tawh a phuh hi a, a neipa’ deihna bangin i kem hiam cih ngaihsuthuai hi. Keima phuhsa i cih manin i Pawlpi sungah “ei a phutte” kilian lua in Jesu Khris zong ta zo nawn lo hi. Tua lungsim a sia lamin hong pai ciangin ei deihna hong thukimpih lo hong om ciangin nawtkhiat theih nading ciangkhut tawi bangin kigamta thei hi. Dr. Job Thawngno in, “Pawlpi founder i om kei a, a founder taktak i Topa Jesu Khris hi,” a cih ka phawk kik hi. Pawlpi neipa deihna bangin i makaih kei leh i thuak ding hong tam mahmah ding hi. A peuhpeuh in Pawlpi kikhen pen baih ngaihsut het loh ding deihhuai hi. A hangin i biakna in hong zo mahmah ahih manin innkuan khat nangawn Pawlpi hong kibat loh ciangin i vai kituak thei lo hi. 

Pawlpi i gen lai-in a milip tamna a nuam kisa a, mihing muhna panin zong lawhcing kici hi. Ahi zongin Pawlpi gol manin a hoih pen hi masa loin a neu manin zong a sia hi masa tuan lo hi. Pawlpi milip i tam ciangin mission ading, cimawh huh nading tamzaw kipia zo ding cih lamin i et kei leh i tam pen Pasian Gam adingin na phatuam tuan lo thei hi. Pawlpi neu ahih hangin nungta mahmah, mission ah hat mahmah zong ka muh tampi om hi. A thupipen ahih leh Pasian ompihna ngah Pawlpi hih ding ahi hi. Ka muhna ah Pawlpi nungta mahmah i cihte Pasian a buan tangtang mi tam lo mite hang ahi hi. Amau’ thungetna le Pasian’ ompih mite ahih manun amau omna Pawlpi nungta a, i kikhop ciang zong kithei hi. 

Khamitna: Kha sung nuntakna vai ah Pasian huhna tawh dangtakna kinei hi cih ka mu hi. Tua bangin a dangtak mite amau sung panin nuntakna tui phul ding Topa’n a cih bangin a phul mi zong om cih ka mu hi. I minam sungah Kha thu a kigen ciangin Pawlpi khenkhat in amau bek neih bangin ngaihsunkha thei uh hi. Kha Siangtho mi khempeuh tungah kibua a, Pawlpi tawh kisai loin mimal kihonna le thumanna tawh kisaizaw hi. Topa’ ompihna sungah kibual taktak leng, eima angsung khualna cih khawng, thupi kisakna khawng bei dingin ka um hi. Pasian kha in zang mahmah ahih hang a nuntakna mawhna tawh kidim cih bang kiza thei hi. Tua bang mite Pasian Kha hi takpi ding hiam? Khuamial le khuavak kihelkhawmin om kici thei ding hiam? Kha sung nuntakna pen thumang a gamtatna hoih tawh kizom tawntung hi. 

Ei sungah i lungdam man hiam, tuate kikhopna ah ka pai leh “Kha hong kibua,” cih bang kampau kiza thei zel hi. Kha kibua kei a ci ka hi kei a, ahi zongin ei lawpna ciang khat i ngahna munah Kha kibua a kici i hiam? A kibuak taktak leh bang hangin kimaisakna, ki-itna, kipumkhatna piang thei lo hiam? Korinth Pawlpite zong Kha sungah nungta kisa mahmah uh ahih hangin Peter pawl, Apollo pawl le Paul pawl cih bangin na kikhen uh hi. Sawltak Paul in “Khris kikhen hiam?” ci-in tai hi (1 Kor.1:12-13). Kha hong kibua ahih leh nupa kilem lote i kilem hiam? Zite khawng Khris itna tawh it loin simmawhna tawh ho zanzanin ahih hangin Kha sung kibual ung mah i ci hiam? Veng le pamte’n thuakhak hong sa mahmah in ei lah khami mahmah in i kigen hiam? Mi’ zite tungah thusiam mahmahin, ei innsungah gilo mahmahin i om hiam? Kha kibuakna khawngah mi’ zite tungah lawitung tuan bangin i tuang hiam?  

Kha letsongte kilunggulh mahmah in tua letsongte i zat dingin Pasian hehpihna hangin hong kipia ahih lam i phawk hiam? Letsong hong kipiate eima nopsak nading, hauh nadingin i zang hiam? Kha letsongte midangte picinsak nadingin hong kipia hi a, i siamna lahna hi loin Ama’ minthan nading ahih lam i phawk hiam? Kha letsongte lunggulh lo ding hi loin, khami hihna taktak pen letsongte hi masa loin Kha gah tawh nuntakna hi (Gal. 5:22-23). Letsongte bek tawh i nuntak manin “ki-itna, lungdamna, lungnopna, lungduaina, migitna, hoihna, cihtakna, lungnemna, pumpi ki-ukzawhna” kinei lo hi. 

Lai Siangtho sinna: Lai Siangtho sinna Pasian huhna tawh Pawlpi thahatte’n hong pan uh a, a diakin Full Gospel International, Far East Mission Church, Zomi Baptist Churches of America le Bowling Green ah Kawlkam tawh zong om cih ka za hi. Pasian thusinna hong kihongte hangin Pasian i phat hi. Tua bek hi loin Pasian thuthuk theih ding deihna tawh hong kipan hih sangte’n i mipihte tampi khuamuhna hong hi dingin ka lamen hi. Lai Siangtho sangkah mite’n i sangkahna hang i tel ding kisam mahmah dingin ka mu hi. Ahang in sangkah khempeuh hunbit nasema kizang ding hi tuan lo hi. Pastor, evangelist le missionary nasem dingte Lai Siangtho sinna ahih kei leh, sin sungin sapna (calling) ngahte a hi uh hi. 

Tuhun ciangin ka lunghimawh ahih leh ken zong B.Th., M.Div., B.D zo ing, ka siapa ka sianu uh tawh degree kikim ka hi uh hi, cih lungsim nei om cih ka mu hi. Tua degree siksanin hunbit a nasemte dinmun tuh nopna le sia hih nopna thuging kiza hi. Sia hih nopna pen khasum ngah ding, thuneihna ciangkhut tawi nopna ahih leh tua bang siate kisam nawn lo hi. Pasian in hong sap manin ama na ka sem ding a, gimna tawlna om leh zong tuate thuak dingin a mansa ka hi, cih kipiakna neite’n i kisam hi. Tua ciang degree zong tuhun ciangin sabaak hawm a i hawmkhak ding zong lauhhuai ka sa hi. Kum 20 khawng a paisa-a Dr. Renthy Keitzer in Eastern Theological College, Jorhat ah a lunghimawh a gen ka phawk kik khat ahih leh, “I’m afraid we will produce unemployable graduates,” “Nasem dinga zat theih loh laizo i neih khak ding ka lau hi,” a cih zong ngaihsuthuai hi. 

Gen kizom in doctor ngah zong kitam mahmah ta hi. Pasian in hong zatsak, ngahtak i sak mahmah tampi mah i om a, lungdamhuai hi. Doctorate degree pen a ngah mite laisiam man khawng a ngah zong om ding a, Pasian nasep citak takin a sep manin kipia zong om ding hi. Doctor cih pen a min ngaih mahmah a, tua min putak ngahtak hih ding kisam kasa hi. Lunghimawhhuai ka sak ahih leh mite laigelh khawng copy ziau a degree ngah, Pasian nasem hi napi amau’ laigelh lohpi khawng amau’ gelh bangin a bawlziau i om ding lauhhuai lua hi. David in Goliath a do ding ciangin kumpi Saul in a galvante David pia a, amah in a lu tungah sumngo lukhu khusakin, sik puan silhsak hi. Tua ciangin David in a galdalnate tungah a namsau khih a, amah kingeinaseh lo ahih manin lam pai dingin a kithawi leh pai thei lo hi. Tua ciangin David in Saul kiangah, “Hihte tawh lam ka pai thei kei hi; bang hang hiam cih leh ka kingeinaseh kei hi,” a ci hi. David in tuate suahkhia hi (I Sam. 17:38-39). David in Saul galvante tawh galdo loin ama siamna tawh gal na do hi. Topa’n hong piak siamna tawh galdo dingin i kihansuah nuam hi.

English Service: A beisa kum nga kum guk lai-in US ka zin uh ciangin hong kidong thei thu ahih leh, “I pau a bei diam?” cih tam veipi hong kidong hi. Ka dawnna pen, “En i zat nawn kei leh a bei hi ding a, i innsungah i zat tangtang laiteng beilo ding hi,” ka ci hi. Nidangin Kawlgam khawngah i tate Mikangpau a siam nadingin sanginn hoihpipi ah kahsak ding i hanciam uh a, Mikangpau khawng hong pau theih uh ciangin i angtang mahmah uh hi. Tuhun leuleu ciangin Mikangpau bekbek tawh hong pau ziahziah uh ahih manin, Zopau a theih ding uh i deihsak kik uh hi. Sunday School bangah Mikangpau zang loin Zokam tawh tate hilh ding deihna hong lian mahmah ta hi. Ahi zongin, Sunday School pen Pasian thusinna hi a, pau sinna hi lo hi. Amau’ telsiam penpen dingin hilh thei leng, i tate’n Pasian hong muh uh leh i minam kip paisuak ding a, Pasian tawh hong kigamlat leh i minam kiam ding hi. 

US sunga Zomi laitan 5 sangnaupang khat kiangah a sianu in, “Nipi kalkhat sungin bang hun cimtakhuai nasapen hiam, ci-in dong hi. Tua naupangpa’n, “Nipi ni kikhop sung mahmah cimtakhuai ka sa pen hi. Zokam tawh thu kigen ka telvet kei a, ka nu le pate’n kikhop sung nai thum sung hong tutpih teitei uh hi,” ci hi. Hih bang naupangte’n nu le pate thu a zuih nawn loh ciangin hong kikhawm lai diam cih ka ngaihsun thei zel hi. Tua hangin thutak a teltheih nadingun amau’ teltheih pau tawh gen ding kisam ka sa hi.

Mikang kam tawh biakpiakna neih ding nidangin a kigen ciangin nu le pate’n sanhak sa uh hi. Ahi zongin tuhun ciangin Pawlpi tampite’n Zokam, Mikangkam le Kawlkam tawh biakna nei thei uh a, hih zong mainawtna lianpi-in ka mu hi. Tua ciang Pawlpi i gen laitakin Sia Go Cin Zam gendanin Dotloh Komiti bangin gen ding hi leng, Pawlpi minte zong gamdang i tun ciangin i minam min tawh kiphut na om kawikawi hi. Tuate sia cihna hipah loin tuban khangthakte adingin tua minte mah a hoihpen ahi diam cih ka ngaihsun thei zel hi. Zomi Church cih pen tukhang adingin hoih mahmah ka sa hi. Ahi zongin i tate i tute khangah Mikang Mivom hong kikhop theih nadingin tua min tawh Pawlpi om pen hoih suak nawnlo kha ding hi. Gentehna-in i Pawlpi min Agape Church a kicih ciangin mi khempeuh hong kikhoppah loh hangin midangte deidanna om lo ahih manin mailamah tua min tawh paisuak thei ding hi. Khang masate’ hunsungin i Pawlpi min i khek kei zongin khangthakte’n mailamah khek ding hong deih ding uh cih ka mukhol hi. 

Thukhupna: Tutung kong gelhte i ngaihsutzia kibang khin lo ding hi, cih ka thei hi. Keima awlmawhte kong gelh hi a, i phattuampih ding lametna ka nei hi. Topa’n i omna ciatah hong kem henla, thupha hong

HEZBOLLAHTE DRONE IN BENJAMIN NETANYAHU INN KHA, IRAN LEH ISRAELITE VAI NASIA SEMSEM

HEZBOLLAHTE DRONE  IN BENJAMIN NETANYAHU INN KHA 

Tuni ni Isreal lamte adingin zanni (Saturday) nitak lam nai 2:30pm kim pawlin Hezbollahte in, a makaipi uh Sinwar phulakna ahi thei mai tam cih zong khentheih mel loin, Lebanon gam panin Rocket/projectiles 180 kim pawl mah tawh Isreal gam phial kap gawp leuleu hi ci uh hi.

Hi bang kawmkalah Hezbollahte drone 3 in Isreal mal lam, Caesarea khuapi a, Isreal kumpipa tenna in bitum a, (holiday home) Isreal galkapte in drone 2 na khiangtan manin na kapkhiasak uh a, khat pen leng mualsuaksak kha uh hi ci hi. 

News tuamtuamte gendan kibang khin lo a, pawlkhat in Drone leng mualsuak pen in Isreal kumpipa tenna inn kap kha hi ci uh a, ahi zongin tua hun laitak in Isreal kumpipa leh a zii, a innkuanpihte kua mah om lo ahih manin a liam a bai kua mah om lo hi ci uh hi. 

Pawlkhat in bel Isreal kumpipa tenna huang sunga om, (acre) moto khat kha in mi khat in sihlawh hi ci uh hi.

A bangbang ahi zongin leitung leh Isreal galkapte in a theih nop zawk thu uh pen Iran tawsawn Hezbollah singnuaimite in Isreal kumpipa thah sawm takpi mah uh hiam (attempt to kill) cih pen a theih nop thu uh leh a buaipihpen thu hi lai phawt uh hi.

Iran kumpipa, supreme Leader, Ali Hosseini Khamenei in ballistic missile tawh Isreal gam kap ding thu a piak lai in, Isreal galkapte in na mittuuk sim pian pah uh a, ahi zongin Pupi Biden in gam khat kumpi lawmlawm kithahsak liang ding pen na awi mel nai lo phawt hi. 

Bangbang hi ta leh zanni Hezbollah singnuaimite in Rocket/projectiles 180 kim tawh Isreal gam a phial kap gawpna hangin Isreal gam kuamah patau dak kisat a, mi khat in sihlawh a, 13 liam hi cih thu kiza hi.

———

ISREAL LAM ZONG KIGING SEMSEM

Zanni thu piang hangin Isreal gam pen uitui khu lo sa a cihdan pian in, Isreal galkapte hehna pen phuulkhia loin so litlit, so nehneh hi ci uh hi.

October 7 ni a, Hamas singnuaimite in Isreal gam mite a lomthahna hangin Middle East gamah a buai lo ding teng kitaklah mahmah uh ahih manin, Middle East gam kuamah Irante in meiphualpi sat a, tawh pan litlit uh a, gawt mun meikuang kawngkhak hongta hi ci uh hi. (Iran has opened the gates of hell)

Mi pawlkhat in a gendan in Isreal galkapte zong kiging ta mahmah uh a, Isreal pana Iran gam direct a kap thei ding, tai 4038 miles (6498km) ciang a tu thei, Nuclear warhead kilotons 400 a lenpih veva thei, Jericho-3 missiles zong phut veva ta uh hi ci a, warhead bel thuah lian nai lo hih tuak hi

Isreal kumpipa Benjamin Netanyahu bel in, Iran leh a pankhoppihte (proxies) ka zo ding uh hi ci a, kua mah in hong khawlsak zo lo ding a, ong kho zo lo ding hi ciin  reporter te dotna dawng hi.

Reporter: So…Will something deter you? 

Benjamin: No 

Hezbollah singnuaimite in drone zangin Isreal kumpipa thah sawm cih thu a zak ciangin kei zong hong kisawm ding hi ciin lau lua kisa in ling setset kawm in meen piahpuah ta hi ci hi.

Irante in Isrealte a man a that pah dingte bangin awngawng nawn kei uh hen, zo mah nung gap mah ung a cih takpi uh leh hong kisa uh hen. 

Ka lei nuai vanleng tual/airport khawng uh a thei nai uh hiam ciin lahna nei uh hi. Muslimte in lei nuai lamah kua na kheuh gai hi leh kilawm hi. A takpi mah a hi diam?

Anuai ah Play azum mekle cin lei nuai ah vanleng kuan Irante aa thupi hi! 

INDIA LEH CANADA KIKELKI, IRAN LEH ISRAELI BUAI ZWL

INDIA LEH CANADA KIKELKI   10/14/24

Nung kuma Canadian social activist, Canada gam mi, India lutuamte (Sikh minam) sihna tawh kisai, Canadian policete in india kumpi kigolh hi ciin a evidence kician tak a neih man un,  Canada kumpi in india palai, Ambassador/ High Commissioner leh mi dang 5, (convoys/diplomats) Canada gam panin hawlkhia uh a, a thuhkikna dingin India kumpi in Delhi khuapi a om, Canadian High commissioner leh mi dang 5 (convoys/diplomats) mah hawlkhia kik leuleu uh hi cih thu kiza hi.

Nih gel kal sinthu khau bang kikaiawk semsem hi leh kilawm hi.

IRAN TEN NGAWTNA TUAK LEULEU

US in Iran galkapte in Isreal gam ballistic missile tawh a kap manin  gakna (sanctions) pia uh a, tu niin Iran kumpi in Russiate ballistic missile a piak manin UK, Germany leh France-te in Iran kumpi gawtna (sanctions) piakthuah kik leuleu uh hi.

Hih gawtna sungah Iran's national airline, Iran Air, travel bans leh Irante ballistic missile bawlna tawh a kimehmat, a kikaiawk, mimal leh pawl tuamtuamte ngakna pia ding uh hi ci hi. 

A om lai teng Isreal ten kapzaansak lai ding uh a, Iran kumpi zong bak ningneng paat ningniang ta ding uh hi.

———-

Hezbollah makaipipa  a sih khin ciangin kua mah a zaa laih kik pak ding mi kimu zo nawn lo uh ahih manin, Hezbollah singnuaimite a uk a makaih dingin (supervisor) Iran galkap mang khat ahi, Deputy commander of the IRGC-Quds Force, Mohammadreza

Fallahzadeh, Iran kumpi in panmun piak sawm cih thu kiza hi.

—-

Isreal kumpipa Benjamin Netanyahu in Iran galkapte munpi (military infrastructure) a kap ding thu uh hilh a, sawt nawn lo ding hi ci a, ka sawt mahmah uh leh zong, US kitel ma hi hamtang ding hi ci hi.

Zanni Hezbollah singnuaimite in drone tawh Isreal galkap, Golani Brigade

Training Base a kapna mun, Isreal galkap mangpipa, General, Herzi Halevi in tuni in va pha hi.

Training lai mi 4 in sihlawh a, mi dang 40 kim liam hi ci uh hi. Isreal galkap mangpa in, Mai…mai… Hezbollahte hong kiphasak vial ve uh e…a mangsia sia man hi…ciin drone in a suksiat Training Base sunga om, zato inn/clinic, Biakinn/ synagogue, ansai/canteen leh dining hall-te en kawikawi hi ci uh hi.

Sihna a tuak mi 4te pen kum 19 vive hi ci uh hi.

1) Sgt. Omri Tamari 

2) Sgt. Yosef Hieb 

3) Sgt. Yoav Agmon

4) Sgt. Alon Amitay

ISREAL GALKAMTE IN HEZBOLLAHTE BUKUALPI LUH

Isreal galkap, Defense Force's 91st Division-te in tuni in Lebanon gam sim lamah, Hezbollah galkap muan leh suanpen pente ahi, Elite Force-te bukualpi luh uh a, a sungah living room, bed room, kitchen, command centers, an leh tui leh moto saikel khawng om hi ci uh hi.