KUM THAK AH NGAIHSUTNA LEH NUNTAKNA THAK

NGAIHSUTNA THAK, NUNTAKNA THAK

2Kor 5:17

Tua ahih manin mi khatpeuh, Khrih tawh a kipawl ciangin mi thak suak a, a mi lui ngeina bei-in a mi thak ngeina a neita ahi hi. 

Joshua 3:5 Tua ciangin Joshua in mite kiangah, “Nomau mah kisiangsak tawm un; bang hang hiam cih leh zing ciangin note' lakah Topa in na lamdangte hong bawl ding hi,” a ci hi.

Mihing khat ih nuntakna sungah Ngaihsutna thak, nuntakna thak akisam tawntung ih hi hi. Mi hing khatin nuam asakna ding leh a hauhna dingin Ngaihsutna thak, Nuntakna athak a kipat kisam hi.

Tua ahih manin Mihing khat, Christian khat ih nuntakna Aungmyan, lawhcin theihna dingin Ngaihsutna lui pan in athak a ngaihsutna, Nuntak lui panin Nuntakzia athak a nuntakna kitang sam mahmah na hi hi.

MILUI ngeina:

Mi lui cihtak ciangin ih mihing nuntakna sung ah ihsep ih bawlna, ih nuntakzia ahizongin, ih kampau zia ahizongin, nisim ih nuntakna ahoih lo khempeuhte ih milui ngeina ah hi hi. Tuate nusia in Pasian deihna bangin nuntakna pen Mithak suahna ahi hi.

MITHAK:

            2Kor 5:17 ah agen bangin Kha thu taksa thu ah lawhcinna leh Jesuh tawh lampi manin ih kizop theihna dingin Mithak ih suah phot akul ahi hi. Mithak bangci bangin suak ding ih hiam cih leh, abeisa nuntakzia, Pasian deihloh sepna leh, Ngaihsutnate akipanin Ahoih lo lam pang vive a ngaihsut leh nuntakna alui, Kum lui sung a ih nuntakziate ki-enpha in ahoih lo nate ih sep ih bawl, Pasian deih loh bangin ih gamtatna leh Kampau akipanin ahoihlo lungsim puakziate, khel a, athak nuntakzia, kampauzia leh gamtatna tawh ih nuntak takciangin mithak kisuak ahi hi.

Leitung deihna leh ngaihsutna tawh ih nuntakna te Paikhia in, athak a nunta in, Pasian deihna bangin nuntak ding ih khensatna pen Mithak suahna kipatna hi a, tuaciang tawh hi lo in Ih nuntakna, taksa-in a zuih ding pen kitang sam mahmah hi. tua bangin ih nuntak takciangin Kha thu, Taksa thu ah thupha a kisang thei pan ding na hi hi.

 

Leitung ah Taksa ah ahi zongin, Khathu ah ahi zongin Lawhcinna, gualzawhna leh, thupha tuamtuamte ih san nop ahih leh Joshua 3:5 ah agen bangin ei leh ei Kisiansuah ding kisam mahmah na hi hi. Ei leh ei ih kisiansuah kei leh Pasianin tua a kisiang sak lo, a kihah lo Bel sung ah tui hongdim lo ding a, tuabel pen hawm den ding cihna ahi hi.

Ei leh ei kisiansuah a nuntak ding pen Pasian hong deihna leh thupha nasan nop leh na sep ding thu masa ahi hi.

Kumlui ngaihsutna hoihlo te leh Ngiahsutna luite nusia in, Kum thak tawh, a thak ngaihsutna leh athak a nuntakna tawh nungta in Lenmuang ih kai zawh ding kitang sam mahmah hi. Tua bangin ih nuntak a, ih lungsim ih khensat nak leh Taksa thupha Khathupha pia dingin Kong biang ah Jesuh Kong keu in hong ding gige ahih manin, tuni in tua bel hahsiangin kongkhak na hon nak leh nang thupha pia dingin hong tum dinga, Nang tawh ankuan um khawm in, Taksa thupha, khathupha na san kumthak hong suak pel mawh ding hi.

Kumthak tawh lungsim thak, ngaihsutna thak, gamtatna thak, nuntakzia athak tawh akal suanciat dingin Mimal khat ciat kideihsak hi hang, tua hi leh taksa le kha thu ah thupha ih sang pel mawh ding hi.

 

JESU KIANG PAN AHONG PAI KILEMNA, NOPNA LEH DAIHNA IN, KUM THAK SUNG AH TAKSA THUPHA, KHA THUPHA NA INNKUAN LEH MIMAL TUNG AH HONG TUNG KIM CIAT TA HEN CI-IN HIH PANIN THUPHA KONG PUAK UH HI.

By: Siam Khaute innkuan 
Dec 30 2014

CHRISTMAS THUPHA

TOPA JESUH SUAH DING AKIGEN KHOLHNA:

@ Bang hang hiam cih leh eite-a' dingin naungek khat hong suak a,
eite' tungah tapa khat hong kipia hi. Amah pen eite hong ukpa hi ding a, ama min pen
“Lamdang Thulakpa,
Vanglian Pasian,
Tawntung Pa,
Nopsakna Kumpi,” kici ding hi.  Isaiah9:6 

# “Nungak khat gai-in tapa khat nei ding a, ama min dingin
Emmanuel kiphuak ding hi,” ci hi. 
Emmanuel a khiatna in, eite tawh Pasian hong omkhawm hi, a cihna ahi hi.  Mathew1:23

&. Tuni-in David khuapi sungah, note a hong honkhia ding Khrih Topa a suak hi. Luka 2:11

Tuni in ani apawite leh gualnopna te bek athupisak hi lo in ahong suak Jesuh pen Nang leh kei a dingin Lamdang thulakpa, Na vanglian Pasian, Na tawntung Pa, Na Lungsim Nopsakna Kumpi taktak ahi kha hiam?

Emanuel kici ding ci in Vantung Mi in agen bangin Nang leh kei tawh hong omkhawm taktak mah hiam?

Luke in agen bangin Nang leh kei a dingin Kha thu le taksa thu ah Honkhia pa ahi taktak na hiam?   Cih hih dotna thumte kisittel in Christmas leh Kumthak  azang tek dingin Kong deihsak hi.

Hih ah hong suak Jesuh hangin Amah tawh ahong tawn khawm thuphate Nang leh Na innkuan tung ah Kha thupha, Taksa thupha hong tunna leh Kipat kum hong suangtek ta hen.Amen

By: Siam Khaute

NGAHNA SANGIN PIAKNA AH THUPHA OM ZAW HI

NGAHNA SANGIN PIAKNA AH THUPHA OM ZAW HI

Ka lawm Paul in a Upa piak Christmas letsong mawtaw thak sitset hoih mahmah khat hong nei hi. Christmas ma diak ni khat, Paul a a zum panin nasep ciah hong pusuah leh tangvalno khat in a mawtaw hoih sa lua-in, kimkotin na velvel keii hi.

Paul a mawtaw gei hong tun ciangin, tangvalno in mawtaw a et bek tawh lungkim zo lo hi diven "U aw, hih nang mawtaw maw?" ci-in dong hi. Paul zong a lukun in, "he himah! ka Upa in Christmas letsong ding a hong piak ai ve" a cih leh tangvalno zong kilatvat liangin, "haa.. na U in a mawkna a hong piak maw? tua leh nang sum pia khat zong bei kul lo ding a hi ve maw?" Ah la.. ka thunget ngah ding hi leng bel.." ci-in a pau zom loin hong khawl hi.

Paul in thunget ngah ding hi leh tangvalno in, "nang U bang khat kei zong U nei leng ut mah sing ci ngel ding ahi ve maw" ci-in ngaihsun dep hi.

Lamet khak het loh, tangvalno in a pau hong zomin, "Kei zong tua bang dan U khat suak nuam tak ing ei" hong cikhia hi. Paul zong tua kammal a zak ciangin a khuasikmul tho zo zah dongin lamdang hong sa lua peuhmah hi.

Tangvalno pa hong en-in bang teng ngaihsun kha hiam thei lo, "ka mawtaw tungah na tuang nuam hia?" ci-in dong hi. "tua nuam tham mah ing" ci-in hong tuang hi. Tawmvei a hawl khit uh the tangvalno in Paul lam ngaphei-in, U aw a hih theih ding leh ka Inn lam vuah nong hawl thei dia?" ci-in dong hi. Paul in tangvalno pa lawpna a maipuak en in, nuihsan hi. Hih naupang pa in bang teng ngaihsun ai zel diam cih hong ngaihsun hi. Mawtaw thak hoih mahmah khat tawh hong kikha hi, ci-in a inn veng teng muh ding ut hingel dan ai ve maw, ci dep zel hi.

A hizongin Paul in himunah zong hong ngaihsun khial zel mawk hi. "Hua teng a, kah-lei gei ah nong khawl sak thei dia?" ci-in tangvalno in a inn kawk hi.

Tangvalno a kahlei vuah tai-in va kahto hi. Tawmvei khit the hong kumsukkik hi. Hong kumkik ciangin naupang khat tawi kawm ahih manin de-naa bangin hong nawh tai zo lo hi. A khe a hoih lo a naupa kahlei nuai dong hong tuahsuk a na hi hi. A naupa lenin mawtaw ngeiah damtakin hong pai pih hi.

"En dih ve nau aw! de-naa inntungah kong gen pen, hih mawtaw pen a mah a Upa in Christmas letsong ding a piak ahi ve, a ma sum piakhat zong bei kul lo, Ni dang ciang kei zong hibang dan mawtaw nang a dingin hong leisak ding ka hi aw, tua ciang bel van kizuakna sumbuk thupi tengah nanglenang na ut bangin va pai-in, va en zong ding na hive" ci-in lawp takin gen hi.

Paul zong mawtaw sung pan hong tuakkhia-in, tua khe hoih lo naupang domin mawtaw maibuk sungah hong tu sak hi. A upa zong lawp mahmah kawmin a nau' geiah hong tusuk pah hi.

A thumun tua ni a a vakkhiat khawmuh pen a mangngilh theih nawn loh dinguh tuahkhak thu khat hong suak hi. A diakdiak in Paul in Topa Jesus gen "Ngahna sangin piakkhiatna ah thupha om zaw hi" a cih kammal a maan lam hong muh khiat lawh hi.

*Hih thu a za, asim ngeisa tampi om kha ding hihang, a hi zongin Christmas hun in eite in, bang letsong ka ngah tam, Pasian in bang hong pia tam maw, cih bebek I ngaihsut sangin, letsong kua ka pia tam? tu kum Christmas mi bang zah letsong ka piakhia zo diam? cih lam I ngaihsut theih ding deih sakna tawh hong at khiatkik ahi hi.*

Tangthu min "A Brother Like That" by Dan Clark hi a, U Phe Myint in zong kawllai tawh gelh ngei khin hi.

Khat Thang

KHEDAP NUL NAUPANG

Tuma kum 60 lai pawlin mi zawng innkuan khat in sum-le-pai haksat luat manin a tapa khat uh kum 10 a cin teh sang hong kah sak zo pan uh hi. Tapa no kum 2 sung bebek laisim zom zo-in, kum 12 a phak teh Innkuan gentheih luat manin kongzing ah tu-in, mi khedap nul sakin nasep hong kipan hi. Khedap nul sak ding mi a ngah kei leh nek ding nei lo-in an ngawl zelzel hi.

Nitak khuamui kuan, mihau khat khedap nul sak dingin hong pai hi. Khedap nul nuam in gilkial naupang no thum in hong delh uh a, "Pu aw, Sia aw, na khedap kei man hong nul sak ning", ci-in khedap nul ding hong kituh-uh hi. Mihau pa zong naupang thumte a vekun hehpih huai sa-in, a sawl zawk ding sang thei lo ahih manin, naupang thumte kiangah, "Ka khedap nul man dingin pek 2 kong pia ding hi. Tua pek 2 ngah le-uh teh bang na ci zat ding uh hiam?" ci-in hong dong hi. Tua hun lai khedap nul man pia sawm nih khawng bek hi napi pek 2 ngah ding a zakuh ciangin naupangte hong lawp semsem uh hi.

Nau pang khat pa in, "Sia aw,  kei nasep hong pia in, zingsang a kipan nek ding bangmah ka neih loh manin gilkialin sun niloh ka om hi. Tu nitak ka nek ding om kei leh gilkialin ka si zo ding hi" ci-in hong gen hi. Naupang dang khat pa in, "Pu aw, kei pen ka innkuan bup ai ding nasem ka hi hi. Ka Pa si khinin ka Nu lah dam lo hi. Ka Innkuan un an ka ngawl zawh uh ni 3 pha khin ta hi. Na khedap kei hong nul sak tapeuh in" ci-in khitui luangin hong thum hi.

Tua leh naupang khat a cian lai pen in, "Sia aw, a zenzen in kei tua sum pek 2 hong ngah sak hi le teh, hih ka lawmte nih pek 1 tuakin ka hawm sak ding hi" hong ci khia hi. Mihau pa leh naupang dang nihte in hih kammal a zakuh teh lamdang hong sa ciat uh hi.

Naupang pa in "A mau gel pen ka lawm it pente hi. A Nuntakna uh ka theih pih hi in, an nek ding a nei lo takpi mah uh ahi hi. Kei ka hih leh ka Nu' mawngphal zuak tawm ka nek sak a, ka tha om lai buang hi, na khedap kei man a siang penpen dingin kong nul sak nuam hi, Sia aw! a cih leh mihau pa zong a lungsim lawngkha lua ahih manin tua naupang pa khedah nul sakin sum pek 2 pia pah hi. Naupang pa in sum sangin a lawmte nih hawm sak pah lian hi.

Tua mihau pa in, naupang pa nitak an nekpih in, nasep ding vaihawm sak hi. Khedap nul sangin nuntak nuam hong sa zawdiak ahih manin, naupang pa in a mah sang-a cimawh zaw a lawmte tungah na hoih a sep manin, a ngah hamphatna thu hong tel khia ta hi.

Naupang pa kum 14 hong phak ciangin copper processing factory  khat ah operator ngah in nasep kician hong nei ta hi. Kum 19 a cin ciangin a veilam khatme khat nasepna set in gawitan kha ciciat hi. A company in zatui, zaha bawl sak pak lo ahih manin, tua a kipanin Workers' Union ah lut ding hong lung gulh hi. Kum 21 hong phak ciangin Workers' Union ah lut in nasemte a ding hanciamin hamphatna tampi hong bawl hi.

Kum 45 a cin ciangin Workers' Party hong phuankhia hi. 1986 kumin Gam kiukna upapawl (congressman) hong suak hi. 2002 kumin "Gam mi khempeuh ni khatin an thumvei maantakin ka ne sak zo ding hi" ci-in kumpi kitelna hong lut hi. Mipi deihna ngah ahih manin tua gam ii 35th President pa hong suak hiau mawk hi. Tua gam tangthu ah nasem mi mawkmawk panin President a suak masa pen pa hi in, leitung tangthu a lumlette lakah khat hong suak hi.
2006 kum ciangin President a term nihna hong ngah to suak lai hi. A kamciam om bangin a gam mite ni khatin an thumvei ne sak zo takpi ban ah, kial a tung den, an kham zo ngei lo a gamuh, leitungah nasep hoih pen gam 10 na dong hong tunto zen hi.
A mah pen 2010 kumin President term nih a zawh khit ciangin a tawlnga Brazil gam President Mr. Luiz Inacio Lula da Silva ahi hi.

Eite zong nuntakna bangzah takin genthei, haksa hi ta se leng, I lungkiat loh ding thupi hi. I nuntakna-ah a piang thei lo bangmah om lo in, a piang nai lo bek om hi. Sang ginatak a kah zo lo, an gilvah a nek ding a nei lo, khedap nul-a, lampi gei-a khangkhia Luiz Inacio Lula da Silva nuntakna tungtawnin laisim mimal kim in tha I lak theih ding I lunggulh hi. 

EMANUEL, EITE TAWH PASIAN HONG OM KHAWM

EMANUEL, EITE TAWH PASIAN HONG OM KHAWM

Lungdam thu puak Sweet December kici hong tungta ahih manin Lungdamna Emanuel, eite tawh Pasian hong om Khawm acih mah bangin
leh Isaiah sung ah agen Bangin :
Vanglian Pasian
Tawngtung Pa,
NOPSAKNA Kumpi kici ding hi, ah cih bang mahin,

Hih lai asimkha Zomi te tung ah ,
Emanuel ahi Atawntung in a Kha Siangtho ompihna
Leh Nopsakna in Na innkuan sung, Mimal ah Tuni a kipan in Hong om denta
hen. Amen

TEEK LEH MO BY: KHAT THANG

TEEK LEH MO

Zhou dynasty khit, 206 BC pan 220 AD dong Sengam a ukcip zo Han dynasty hun lai-in, Xio Li kici melhoih nungak khat in pasal hong nei hi. Tua hunlai Sente ngeina om mah bangin nungaknu a teekte belin hong om khawmuh hi. Sente zong Zo-ngeina mah bangin teeknu in mo-te tungah thunei mahmah uh hi. Kum khat khit pawl ciangin teek-le-mo kikal lungsim galdona hong kipan ta uh hi.

Teeknu in a hih leh "numei in a ma khuat, sumkuang in a li khuat" kici hi, na teknu nong mai-et ding mah hi, cih lungsim tawh keksa-in om den hi. Mo nu in zong "kei no sila sem ding-a hong pai hizenzen keng, na tapa uh ka hehpih man bek-a tuciang a thuak keiikaii hing" cih lungsim tawh keksa mahin om den ta hi.

Nisim in khat kampau khatin a hoihin kisan sak zo nawn peuhmah lo uh hi. A pasal in lah "khat lah ka tem khat lah ka paii" ci-in gup ngam mel nei lo-in sip dide mai hi. A pasal tua bangin a om dide lel pen Xio Li in hawmthawhin thuak hak hong sa semsem hi. Ahi zongin Sente ngeina ah teeknu thuthu a tapa ai zongin, mo-nu in aizongin, zahtakin nial ngam peuhmah lo mai uh hi. Mo-nu Xio Li zong lungsimna luata a hih manin "kei si zaw ding maw, ka teeknu si zaw ding" cih zah dong hong ngaihsun ta hi.

Xio Li a Pu lamte zatui lam a siam khat kiangah va hawh hi. A Pu tungah a teeknu thuak hak a sak luatna teng va sutin va kap liang hi. A Pu in zong "lungkia peuhmah kei'n ka tunu aw! nang kong huh ding hi" ci-in a innkhan sungah va lutin zatui nahtang teh tawh kitun lillel khat hong tawi hi.

"Hih zatui pen, zatui mawkmawk hi lo hi. Gu-za ahi hi. Na teknu thakhatin hong si vat leh mi khempeuh in nang hong muangmawh kha dinguh hi. Tua ahih teh, Na teknu nek ding an na bawlsak simin hi zatui sikeu nih ta an lakah na helsak ding hi. Tua hi leh na teknu a mah-le-mah, a natna kithei lo-in kha thum, kha li bang khitciangin hong si ding hi." ci-in zatui hong pia hi. Xio Li zong lungkim sim pian pahin a Pu zatui hong sang hi. A Pu in zong Xio Li thu khat vaikhak beh lai hi.

"Ka tu nu aw, kuamah in hi thu a theih zawh lohna dingin, tu ni a kipan na teknu lungdamna ding na hanciam kul ding hi. A sawt lo-in a si ding hi lel a hih manin na mai-et bawl ding a, a kisap bangbang, hong sawl bangbang zahtak bawlin na sem ding hi. Hong awi-lohna omin hong tai khak leh zong dawng se lo ding hi teh. Tua hipeuh leh na pasal a kipan kua mahin hong thei zo lo dinguh hi" ci-in hoih takin vaikhak hi.

Xio Li a Pu piak zatui tawh Inn hong ciah hi. A Pu sawl bangin na hong sem hi. Kha thum khit zawh ciangin Xio Li a Pu kiangah hong hawhkik hi. Nuih mai sim deidai in a Pu hong notset hi. A Pu in zong "na teeknu in hong sih san petpet ta hi maw Xio Li?" a cih leh Xio Li in a lu pei san hi. A Pu in "zatui deih beh na hiam leh?" a cih leh Xio Li in;

"Hi kei ee Pu aw, ka teeknu a sih ding ka deih nawn peuhmah kei hi. Ka nihun ki-it, kilemin nuam ka kisa ta uh hi" ci-in hong gen hi. A Pu zong hong nuih mai hiuhiau ta hi. Hi bang dingmah deih a, zatui hoih tha-za Xio Li a piak na hi gige banah, Xio Li in a teeknu zahtak bawl leh a teeknu in zong a mo it lua mahmah pah lel ding, khat in itna lak masa peuh leng ki-itna khang semsem a hih lam tak thei a hih manin a Pu in hi bang sem ding a sawl ahi hi. Xio Li in zong a Pu kiangah lungdam koh zukholhin, a teeknu kiangah a zuankik hi.

Khat Thang

SAWM AH KHAT ZEKDAN DING TAWH KISAI

SAWM AH KHAT ZEKDAN DING TAWH KISAI

Thuhilh kikna 14:22-28,29

28"Kum thum simin tua kuma note' anpiang sawmah khat khempeuh hong paikhiatpihin na khuasung uhah na khol ding uh hi.

29Topa na Pasian un na sepnate khempeuh uhah thupha hong piak theihna dingin, note tawh kibangin amaute in tanh ahi a, luah ahi zongin neilo uh ahih manin note khua sunga om Levi mite, peemtate, pa neilote, leh meigong numeite hong pai-in tua ante ne-in a gilvah ding uh hi.

Malakhi 3:8-12 sung leh Gamlak vakna18:21-28 sung ah, Sawm ah khat Piakna ding, kuate Tanh le Go or Gamh cih ih theih khit tak ciangin bang ci dan teng azang ding cih pen LST tung tawn in tawm kikum khawm ding hi hang. 

Sawm ah Khat thu genin Siate ading hi Pasian in a gamh ding, tanh dingin apiak hi cih ka gen teh mi pawlkhatte in itsikin, Siate Piak khit mawkin ah ci uh hi. Tulai khuahun zui in zekdan ding anuai ah kikum suk ni. 

Mi pawl khatte in Sawm ah khat pen Thupha san na ding bek in gen leh thei a ahi zong in thupha pen kisang thei taktak lo-in Zomi-te ki-om hi. Ih piak hangin ih zatna ih zatdante hang hi ding hi cih kei muhna ahi hi. 

1.     Levi Mite Gamlakvakna 18:20-32

Hih levi mite cih tawh kisai in ci leng Siampi nam or siate cihna hi a, hih a neu 29 na Laisiangtho sung ah akhatna in ana koih ahi hi. Tua ahih mah bangin Pawlpi makaite in Sawmah khat piak ding thei mahmah Biakinn ah tun ding cih thei mahmah na pi in Kuate GAMH ding akipia cih pen tello thei hetlo mawk uh hi. 

Christiante in ih theih ding ah, ah khatna ah Siampi, ih siate akhamtak ding piak ding cihna hi a, tuakhit tak ciangin acian lai te koi teng ah zek ding cih ngaihsut ding hi.

Sia pa bek gawl vak ding hile hang haksa lo a, Innkuan nei ahih manin tuate ading tawh kicing dingin vai hawm ding pen thupi mahmah ding hi. Tua hi le siate sum tawh buai cih hong om lo pah lel ding hi.

2.     Peemta te Thuhilhkikna10:19

19Tua ahih ciangin peemtate it un; bang hang hiam cih leh note zong Egypt gamah peemta na hi uh hi.

Nihna ah pemta te ci hi. 

Pemta ih cih kuate hiam cih leh ihkhua ah hong pem lut tungte, ahih kei leh Khistian 

hongsuak tung mite haksatte samin nesak ding, huhding, piakding ci ahih manin Siate khamding ih gensak khitteh tua pemta pawlpi sung a om mite panpihna in zang ding cihna ahi hi.

3.     Paneilo, Tagahte

James1:27

Pa Pasian in a siangtho biakna citakin a ngaihsut thu in: Tagahte leh meigong numeite a haksatna uhah hoihtakin kemin, leitung siatnate tawh kisawhkha loin siangtho takin omna ahi hi.

Thuhilh kikna 10:18

18Amah in pa neilote leh meigong numeite adingin thutang semin, peemtate itin an leh puan a pia hi.

Paneilo ta gahte tung ah piak ding cih ih laisiangtho in hong hilh hi. Tua hi a, tuni in ih theih ding in ah tagah gen thei Nu le pa nei lote, Pawlpi sung ah aom leh tuate tung ah huhna piak ding in hong hilh hi. Tuni in Khathu sung ah hong makaih ih siate limtak in ih piak khit tak teh tagahte huhna a zat ding pen Pasian hong lamlah na ahi hi, cih phawk in mang ngilh loh ding thupi ding hi.

4.    Meigong numeite

Thu hilhkikna10:18,19

18Amah in pa neilote leh meigong numeite-a' dingin thutang semin, peemtate itin an leh puan a pia hi.

19Tua ahih ciangin peemtate it un; bang hang hiam cih leh note zong Egypt gamah peemta na hi uh hi.

Ali na ah sawm akhat tawh kisai zek dan ding pen Meigong numeite na ci hi. Tuni in, ah it mahmah alawmpa in anutsiat khit teh amah bek a khuangai lungleng meigongte huh ding piakding pen Pasian in deih  hi. Tua ahih manin ih khua sung ih pawlsung ih nam sung, ah meigongte leh tagahte pen Pasian in Sawmah khat ne dingin na thukim hi. Agil vah in ne ding uh hi ci ngiat hi.

Tuni in Sawmah khat tawh kisai pen BiakInn ah khiakhia tek na pi hangin, thupha taktak ih san theih lohna uh pen, a kizatna ih et tak ciangin thupha ngahna ding mun ah na kizek lo, na kikhia lo, na kipia lo, ahih man ahi hi. Tua ahih manin ih sawmah khat zekna uh kisit tel pha mahmah ding thupi ding hi. Hih hangin mipawl khat te in, Sawmah khat kizekna pen sit teltel veve uh hi.

Temsawn pa tangthu dan in en leng, kua pat hiam aw hong kici veve ding a, Sawm ah khat piak ziau bek tawh thupha ngah ding kihi lo a, a kizatna aman kei leh Temsawn pa tangthu bangin apiate in apiakna manlo hi hong kici kik veve kha ding a, tua hangin mi pawlkhat in 1/10 paina zeknate sitkik, sumzatna report akipiak ciangin sitkik tangtang na pen tua hi. Tudong in Sawmah khat na piakpiak hang thupha ihsan theih lohna tua hi thei gige hi.

THEIH HUAI

Sawm ah khat zekna ding ah Siate kham ding ih piakkhit teh, Pemtate, Meigongte, Tagahte en in, i budget acin nak leh Buildingte leh Missionte ah ih khen pat ding pen sialo ding hi.

Siate ading ih genteh pawlkhat in itsik lua mahmah siate piakhin cih bang cithei uh hi. LST ih tel lohman hizaw ding hi. Thupha ih san nop leh Pasian deihna bang ah ih zek sak ding kisam hi. 

Pawlpi in sumzekna man kei cihna theih a na khiat teitei ahih leh thupha sangtuan lo ding cih thei-in la, a zekte sang nang hong kimawh sak zaw lai ding hi, cih pen phawk gige in.

Thukhupna

Sawm ah khat ih cih pen Pasian a hi a, Pasian deihna bang in ih zeksak ding pen thupi mahmah ding hi.

 1.)Pasian deihna in ama na sem Siate lungkim tak a Pasian na asep theihna dingin Inn kuan kham ding a Tanh,GAMH uh ahih mah bang in ih piak ding thupi ding hi. 

2.)Siate ading hoih tak in ihkhen khit ciangin Pemtate, Tagahte leh Meigong numeite Pawlpi sung ah huh ding i neih leh tuate tungah huhna ih piak ding pen Pasian deihna bangin akizek hia, Tua khit teh a Omlaite ah Pawlpi kitang sapna bang in  zek leh zat ding, cih pen tuni in LST tungtawn in akithei sak ih hihi. 1/10 leh Anpal thu ah Siate sangin adang ah zekding ih ngaihsut leh aman lo lam atawn kihipian pah lel hi. A nuntak pih ding leh azang thei dingin mimal kim nuntak na Topa in hong tel sak hong theisak ta hen.

Note: Piangthak Upa kideih a, thuthei zong upa kideih hi. Nidang ciangin Pasian ading Pawlpi ah ahi a, makaihna khat peuhpeuh ah ih theihsiam na ding deihna tawh…KEI MUHDAN

Siam Khaute
2013

PASIAN IN KI-ITNA HI, TUA HIH LEH EITE IN E LEH

PASIAN KI-ITNA HI, TUA AHIH LEH EITEN E...?

ITNA ih cihciangin nule pa ki-itna hi lo a, Love is feeling leh Love is emotion hi lo a, Love is Care ahi hi.

Itna taktak in Huhding lam etna tawh pia, ngahkikding lam etna hi lo a, Huhna panpihna itna hi in akileh kikding lam etna hi lo hi.

Tua itna pen Christian kici khat in ih neih ding akisam hi a tuapen ut bangin kinei theilo a, Jesuh ih neih teh tuabang itna kinei thei pan ahi hi.

7Ka it lawmte aw, Pasian pen itna hong pian'khiatna bulpi ahih manin eite khatlekhat ki-it ni. Itna a nei mi peuhmah, Pasian' tate hi a, Pasian a thei uh hi. 8Pasian pen ki-itna ahih manin itna a neilo mite in Pasian theilo uh hi.

12Kuamah in Pasian mu ngeilo hi. Ahi zongin eite khatlekhat i ki-it leh eite tawh Pasian hong omkhawm a, ama itna eite lakah a cingtaakin a om ahi hi. 

15Jesuh pen Pasian' Tapa hi, ci-in umin a sang mite, Pasian in ompih a, tua mite pen Pasian tawh a omkhawm ahi uh hi.

16Tua hi a, Pasian in eite a hong itna thu, eite mahmah in thei-in i um hi. Pasian pen ki-itna hi a, itna a nei mite pen Pasian tawh omkhawm uh a, Pasian zong amaute tawh a omkhawm hi.

20Mi khatpeuh in, “Pasian ka it hi,” ci napi-in a Khristian mipihte a muhdah leh a zuaupi a gen ahi hi. Bang hang hiam cih leh a muhtheih a Khristian mipih a itlo mi in a muhtheihloh Pasian it theilo ding hi. 21Khrih in eite tungah hong thupiakna in: Pasian a it mi in a Khristian mipihte zong it ding hi, cihna ahi hi.

1johan 4

NA LAWM HOIH PEN LEH NA GAL LIAN PEN KUA HIAM?

NA LAWM HOIH PEN LEH NA GAL LIAN PEN  KUA HIMAWK HIAM?
Lawm hoihpen Jesuh: Jer 29:11 ¹¹Bang hang hiam cih leh Topa in kong cihin-ah, mailamah lametna note kong piakkik ding, na siatna ding uh hiloin na phattuamna ding uh geelna ka neihte kei bek in ka thei hi.
       Na lawm hoih pen kuadang hisak kei in la, Na lawm hoih pen Jesuh hi sak in. LStho sung ah acih mah bangin, Pasian in ei adingin asia hong gelsak ngeilo hi. Nisim a hong kemden thusia lasia hong gelsak ngeilo lawm hoih Jesuh, Nalawm hoih pen hi sak tawn tung in.

Gal lian pen:Johan 10:10 Gutate pen a gu ding, a that ding, leh a siasak ding bekin hong pai hi.
1. in kua hiam cih leh Satan hi a, LST sung ah gen mah bangin amah pen asusia ding, athat ding, bawlsai ding in hong pai ahi hi. tua bek hi lo Leitung khempeuh apheklet ding a hong pai hing ci lai hi.
2. Na gal lian pen in Nang na hi hi.
Satan in Na lungsim pan  in asia theithei ngaihsutna tawh nang akhut zat in hong zang a, tualam na phawk mahmah ding thupi hi. 

Pasian in amite adingin thusia gel lo, a cih mah bangin, Na lungsim sung ah thusia la sia hong lut nak leh tuapen Pasian kiang pan hi lo a, Satan kiang pan hi cih phawk in.

Nang ngaihsut khawlh zong ahi lo, Na ut zong ahi lo, thuleh late hong ngaihsun sak in hong khemkhem ding a, Khatvei leh Innkuan pihte asi amang bangin hong ngiahsun sak ding, Ka lawmpa, ka lawmnu, tate ci-in asia lam vive hong ngaihsunsak ding a, tuabang ahoih lo lam ngaihsutna na lungsim ah khaici bangin hong vawh ding a, tua hun ciangin hih pen Pasian kiang pan hi lo Satan kiang pan hi cih na pawk tawntuang ding kisam mahmah ding hi.

Satan pen a bawlsia ding, susia ding athat ding ahong pai LST in acih mah bangin, Na innkuan sung, nupakal, lawmleh gual kim leh pam, na pawlpi sung hong susia ding ahih manin tuabang sutsiatna i vanzat na hih khak lohna dingin kidawm kawmin nungtain kampau ding kisam hi. Thusia leh lasia te na zi or pasal midangte ngawh kei in, Satan na sepna ahih lam phawk peuh leh cin tua pen Na do ding alian penpen na gal ahi hi.

Tuadan Ngaihsutna bangci do ding:
1.    Tuabangin thusia lasia, Innkuan sung ah, midante gensiatna akipan lungsim hoih lo hong lut phek in, Hih pen Pasian kiang pan hi lo hi. asusia abawlsia ding ahong pai SATAN kiang pan hong pai ngiahsutna hi cih phawk pah in.

2. Tua bang na phawk khit petin Lungsim galdona, leh Lungsim thungetna tawh tuate DO in, na hawlkhat ding kisam hi. Hih bang ngaihsutna, kalawmpa tung, kazi tung, katate tung, kim leh pam lawm leh gualte tung a, ahoih lo lam ngaihsutna leh gensiat nopna te Satan aw Kakiang panin paikhia in Thukong pia hi, Jesuh min tawh paikhia in ci-in lungsim ngaldo na ih zat ding, lugnsim ah thungetna tawh gal ih do ding kisam hi tua hi leh tuabang ngaihsutna te in nang hong zolo ding hi.

Peter Kiang ah Jesuh in Satan aw kakiang pan paikhia in ci hi. Peter pen Jesuh in Satan aci hi lo a, a ngaihsutna hoihlo pen Satan kiang pan a, hong pai ahih lam tel lua ahih manin Satan aw ka kiang panin paikhia in acih san ahi hi.

Thuhialna:
Tuni in Na lungsim tawng ah ahoih lo lam vive, Nalawmpa maw, nazi maw? natate maw? Midang khat peuh2 ahoih lolam in na ngaihsutna ahong om nak leh, hih pen Satan sawlna hi, Satan khutzat suaknuam keng ei, ci a, lungsim thungetna tawh do a na hawlkhait ding kisam hi. tuabangin an hih kei leh tuate in hong zoding a, Na nuntakna tom or kiam lawh in, innkuan sung, lawm leh gual tawh kisiatna kitawtna piang ding a, Satan in, agal pan in hong nuihsan ding ahih manin, Ih nuntakna ki-en kik ciat ni.

1. Thusia lasia leh ngaihsut hoihlo pen Satan kiang pan hong pai hi cih phawk den in.
2. Pasian in aminte ading na sia gel ngei lo ahih lam pawkden in, tua hi leh Thusia lasia lungsim sia, ngaihsutna te in hong zo lo ding hi.



Lungdam
Siam Khaute

KIKHUALNA TAWH NUNGTA UN.

KIKHUALNA TAWH NUNTAKNA

Cor13:13

13Tu laitakin a omlai thu thumte pen upna, lametna, leh itna hi a, tua thumte sung panin itna mah a thu lianpen ahi hi.

Itna ih cih takciangin itna namtampi in kikhenthei a Agape akipan atuam2 namtampi om thei hi.

ITNA
Itna ih cihin bang hiam? Kei muhna ah itna ih cihin , Kiniam khiatna, thukhualna, hehpihna etkolna(Care)cileng kikhial lo ding hi. Mipawlkhat te in itna pen Feeling khawng in ngaihsun uh ahih manin, Nupa kal ahi a, lawmta kal ahi zongin ngahding, lemlawh ding(ngahding) aom loh takciangin ah itna uh bei in, khualzawhna hehpihna nei lo uh hi.
Itna ih cih in hehpihna tawh en, Khual, English in cileng “ Love is not a feeling, it is CARE”. Ngahding, muhding, hamphatna ding omta kei leh, itzawhna, sepsak zawhna, huhzawhna, panpih zawhnate etc, pen Itna man taktak ahi hi.
Tua mah bangin Upna, Lam etna, Itna lak ah Itna athupi zaw acihna pen ah Jesuh mah athupi zaw acihna Agape na hia, Jesuh na neih nak leh upna lametna cihte pen amanin nei in na hangsan ding a, Itna mantaktak ahi “Care in any times and anywhere” cih pen nang tung ah hong tung ding hi.
Tua ahih manin koi munmun ah na om zong in Itna ahi Jesuh na neih nai kei leh na neih sawmin la, Itna pen Feeling hi lo in, duh leh deih te ngaihnopman a itna hi lo in, tuate lam etna om kingkeng lo a itna pen Itna man ahih lam phawk ni.
Thukhupna
Zomi pih Christian akici peuh mahin na omna mun2 khua leh tui sangkahna mun ah Itna ahi hehpihna, khualna, huhna, sepsakna, Love is care tawh, na nungta kim ciat theihna dingun in biak Pasian in hong om pih ciatta hen, Lungdam.
By: Siam Khaute

Tuni in itna tawh kisai ah mimal khat ciat kidong nuam hang. Itna ih cih in bang hi mawk hiam?

Corinthians sungah  leh Lai Siangtho mun dangte ah ih et teh, Itna mah na kigen hamtang a, Itna ih cih bang hi mawk hiam?

1Cor 13:13 Hih Lai siangtho in itna gen nopna gen masa ni. Itna ahi Jesuh a gennuam ahi hi. Tuni in Bangbang siamin Pilna sangpen na nei a, Vantungmite nabang phial zongin Itna ahi Jesuh na neih kei leh tuate Christian khat a dingin amawkna pi ahi hi.

SUNGLAM HOIHNA NA BUL PHUH UN

SUNGLAM HOIHNA NA BUL PHUH UN.

1 peter 3:1-4,7

¹Tua mah bangin zite aw, na pasalte uh Pasian thu umlo ahihkhak leh na gamtatna hangun Pasian thu a uptheihna dingun na pasalte uh thu na mang un. Kampau kul sese loin, * ^2 3Na hoihna dingun puatham kizepna ahi sambawlna, kham leh suangmanpha tawh kizepna, puan hoihnono silhnate na bulphuh kei un la, * ⁴Pasian' muhna-ah a manpha mahmah ahi lungsim puakzia, a tul theilo sunglam hoihna na bulphuh zaw un.

⁷Tua mah bangin pasalte aw, note sangin na zite uh a thahatlo zawdeuh ahihna thu na phawk un. Note mah bangin Pasian' piak nuntakna a ngahte ahih uh manin na zite uh zahtak bawl un. Tua hi leh na thungetna uh bangmah in hong nawngkaisak lo ding hi.

ZITE

Zite tawh kisai in Laisiangtho in muntam pi ah na gen a, tate ading ahi zongin Pasian na sepna ah ahi zongin, Ruth nuntakna leh Sarah nuntakna te akipan Esther nuntakna te ih mu thei hi. Christian nuntakna, Piangthak numei or Zi khat in nuntakdan dingpen muntam pi leh etteh ding Laisiangtho sung ah agentampite ih gen man keiding hi.

Tuni in ih gennop thuin Innkuan sung ah ahi a, Nupa kal ah ahi zongin Pasian hoihna ih muh theihna dingin, leh nupa kal anuam thei pen in khat leh khat ki-it, kikhual a nuntak theih na dingin, athu pi mahmah zite theih ding akilawm hih LST tungtawn in tam en suk ni.

Tulai Christian nuntakna ah Piangthak taktak ding pen Numei hi in pasal hita leh haksa mahmah hi. Christian cihciang bek tawh kilungkim in A Nungta taktak pen kitawm mahmah hi. Hih Lai siangtho tangte in agenna ah :

¹Tua mah bangin zite aw, na pasalte uh Pasian thu umlo ahihkhak leh na gamtatna hangun Pasian thu a uptheihna dingun na pasalte uh thu na mang un. Kampau kul sese loin, * ^2 3Na hoihna dingun puatham kizepna ahi sambawlna, kham leh suangmanpha tawh kizepna, puan hoihnono silhnate na bulphuh kei un la, * ⁴Pasian' muhna-ah a manpha mahmah ahi lungsim puakzia, a tul theilo sunglam hoihna na bulphuh zaw un

Inn kuan sung ahi a, Nupakal anop theina dingin Zite in nuntakzia kisam a Kamtawh na ci lo hi. cih pen tuni in zi or nupi ahis ate in, Na pasal Pasian thu-um lo khat ahih zenzen leh hih Lai Siangtho na sim kiki le cin kideihsak mahmah hang.

Lai siangtho hong deihsakna ah Na gamtat hoih tawh na lawmpa kikhel sak sawm ih cih hi a, na kam tawh ci lo hi. apualam hoihna te thupi in na ngaihsun masa kei in la sunglam hoihna tawh Na zawh sawm in ci hi. Christian Piangthak akici khempeuh in, ih theih ding ah Thu-um lo khatin ih nuntakna te uh hong muh ciangin Pasian amuh theihna ahih ding na thupi mahmah a, sunglam hoihna tawh nuntak ding Pasian in ei Christian te hong deihsak hi.

Kampau zia nupa kal leh tate kal ah

Kawmpau tawh kisai ah Lai Siangtho tang ah agen loh hangin, Nupa khat ih hih nak leh ahoih thei pen, azak nop pen a kiho, kidawng theih ding pen nupa kal ah cidamna hoih penpen ahi hi. Kamkhum/siam daldal thei takei le cin Nupa kikhal ah kingaih lai bangmah in kam khum tawh kiho a kidawng kik ding hoih hi. ( khat in Ilove You hong cih leh ken zong hong ngai ing, ci a, ih dawn kik theih ding kingaihlai ahih loh hang in kisam hi.) Pawl khat te in zum bawl thei a, hih dan te pen nisim nuntakna ah akisam mahmah kammal hi in, na lawm thagui, thatang in na huh theih loh hangin na huhna lian penpen khat ahi hi cih phawk leng deih huai sa ing. ( hong it hong ngai ing, na zi/pasal leh na tate in hong cih leh kei zong hong it ing cipah in. (Tua hong kicih ding lam en uh cihna hi pah hi.) Midangte in hong it ngai ing acih leh lungdam or thank you cih theih ding kisam hi.) Tua dan in na innkuan te in hong cih pen na dawn kei leh alungsim uh a, kalawm aw e, ka nu/pa aw e, bangci dan? Cihdotna tampi lungsim sung ah, om thei ahih manin nalawm na huhna, na tate na huhna in I love you too na cih theih kik ding pen thupi a zumna ding hi loin, nupa kal, tate tawh kikal ah zatmun ding kisam a, tuain innkuan sung nuamsak in, kimai ngapna piang sakin, kikhualna hong tam ding hi. akilawm tampi kicih zelzel ding om ahih manin ngaihsun tek ni.

Zite in Pasalte kam tawh cih lala sangin gamtat hoih tawh lak ding, athu mang ding pen Pasian in hong deih sak aw a, tua bek hi lo, Pua lam kizekna tuamtuam ahoih thei thei Sam bawlna, Kham leh ngun, suangmanphate,  Puan hoih nono tawh kizepna ten a bul phuh kei un la, Pasian muhna ah ahoih mahmah Lungsim, leh atul theilo sunglam hoihna, te bul phuh un la, Sarah in Ka topa aw ci-in a pasal cihbangin sunglam hoihna bul phuh ding Pasian deihna ahi hi.

PASALTE

Pasal te ih ih theih dingin ah, Jesuh pumpite pen Christian thu-um te ih hih bang mah in, Nang adingin Na zi pen na pumpi phel lang khat ahih manin na zi pen Nazahtak in ci hi. Numei te akam uh khat veivei atha hat sam hangin, ataksa un LST in thahat lo zaw acih mah bangin thahat lo zawtak pi ahih manin hehpihin, ih it mahmah ding kisam hi. It (love)cih takciangin bang ahiam? Pawlkhat te in ih ngaihsutna tampi om kha ding hi.

Mi tampi te in It or Love cih pen akhiatna taktak thei lo hi leh kilawm sa ing. It or Love ih cih pen English in ci leng Care cihna na hi hi. Itna ih cih Jesu in agengen pen Feeling ukna hi zenzen lo in, Care na hi zaw hi. Itna in hehpina, khualna, sepsakna hi ci leng, ei pau in man mahmah ding in lam en ing.

Tua ahih manin Na zi pen nangsangin thahat lo zaw ahih manin Zahtak in. (It=hehpih, khual, sepsak, huh) tua hi leh na thungetna uh bangmah in hong nong kaisak lo ding hi ci hi.

Nang kai cihtak ciangin Mihing pen ih kinai luat pih loh, midang khatin hong hehsak hong kin kei leh ih lungsim sung ah zong sawt kiciamteh se lo, kipua se loa, ih keinai pih mahmah nupa leh sanggamte akipan, adiakdiak in sun leh zan a na kimuh pih det na lawmnu lehtate in hong nong kaisak pen in na lungsim hong ngawnkaisak penpen hi cih kei muhna ahi hi.

Ihzi tate in hong lungnopsak loh pi tawh thu nanget ding pen baih in kuitung dingin lam en zo kei ing. Tua ahih maniin na thungetna kuitung ding leh hong ngawngkai sak, hong dal lohna dingin na zi pen itna tak tawh huh, panpih a, na CARE mahmah dingpen thupi mahmah ding hi cih ahi hi.

Atawpna ah: Nupa kal ah numei hi in pasal hi ta leh ih lungsim hong nawn kei sak thei mahmah pen ih innkuanpih sun lehzan a ih ompih dette mahin ih lungsim leh ih ngaihsutna , ih thu ngetna hong nawng kai sak thei penpen ahih manin Khat leh khat ih kikhual a ih nuntak ding un kampau mukpau om dan khawldan te ah ih kikhual mahmah ding, ahoih lam ah ih kiphatsiam a, I kik ho ciangin zong kidawng a, ahoih pen in ih nuntak siam ding pen tuni in kihan thawn leh tha ih kipia nuam hi.

Christian mimal khat ciatnuntak na ah zong, akitang sam mahmah sunglam hoihna hi a, tua gamtatna pah te mite in amuh ciangin ka nungzui na hihna uh hong thei ding uh hi. cih Jesuh kam mal ahi hi. Asim kha mimal khat ciat Topa in thupha hong pia kim ciatta hen. Amen. Lungdam

Siam Khaute.  9/25/14

A HOIH AKILAWM IN NUNTAKNA

A HOIH A KILAWM A NUNTAKNA

1Peter 1:4Pasian' thu na mang un la, na theih nailoh uh hun lai-in na gamtat ngei uh bangin na gamta nawn kei un.

15Note a hong sampa a siangtho ahih mah bangin note zong na gamtatna khempeuh uhah na siangtho un.

16Lai Siangtho sungah zong, “Keimah siangtho ka hih manin note zong na siangtho un,” na kici hi.

Christian Khat ih hih khit takciangin ih nuntakzia ding pen a siangtho a nuntak ding pen Pasian hong deihna leh akilawm ahi hi. Eima deihna bang a nunta naw lo a, Pasian hong deihna bangin nunta in Siangtho ding pen Pasian deihna ahi hi. Kei ka siang tho bangin note zong na Siangtho un.

1.      Christian:  Christian cih pen Namdangte in a ngaihsutna ah, apiangthak khin a angaihsut uh na hi pah hi. Ei Zomi te Christian cih leh Namdangte Christian cih pen kilam dang na hi mawk hi. Namdangten Christian acih na leh Jesuh nuntak bang a nungta a A Siangtho ding in hong um pah in Born a Gain Person ding in hong um pah uh hi. Tua hih manin Nang Christian na hiam ci kidotna na zang uh hi.

Tua mah bangin Christian khempeuh pen ahoih anungta dingin hong lamen pah uh a, ahoih in ih nuntakna ong muhloh man, ih Siangtho zaw loh manin Christian ahilo lawm ka neih sunsunte tungpanin ka theih leh zakin, Christian hih ding bang ut lo zaw tham uh hi.

Midante in Christian acihnak leh Jesuh nuntakzia thei lo na pi in a siangtho a nunta dingin hong lam enpah uh a, Tuazong alamdang pi mah hi pah in, Christian hing ih kicih leh Siangtho a nuntak ding mah na hi pah gige na hi hi.

2.      Kampauna: 1Timothy 4:12 sung ah agen mah bangin mite etteh dingin nuntak ding na ci hi. Christian ih nuntakna sung ah A Siangtho a nuntakna sung ah Kampau kidop zawh mahmah ding, Kampau kikhial zel thei mah a ahi zongin tua ih kampau tawh midangte ading asia hilo in , nuntakpih ahih theihna dingin Kampau Siangtho a nuntak zawh ding pen Pasian deihna ahi hi.

LStho in zong Leithupitna leh ahoih lohna na gen a ih lei, ih kampau ih kepzawh ding pen akitang sam mahmah Zomi Christian te ading kitang sam ka sa pha diak hi. Englishte Migensia mizakdah ding pau2 cih pen kiza ngei pha lo hi. amau ngeina dan zong na hi in, thupi sa ing. Christian nuntakna pen ih kampau a ih khialh sangin Pau lo a om theih kisam hi. Kampau ah siangtho ding Pasian in hong deih mahmah hi.

3.      Gamtatna: Nisim ih nuntakna sung ah akitang sam mahmah te lak a khat ahi ih gamtatna ih sep ih bawlna te pen mite muhna ah Siangtho in etteh tak ih suah ding pen Pasian deihna ahi hi. Ih gamtatna ih sep ih bawlna peuhpeuh ah, mite ading phatuam hi ding a, mite supna, mite dahna, asuah loh ding thupi ding hi.( Min a vaguksak, mina hihsiatsak, mina khat peuhpeuh ahiding bang a omsak lo a va khoih hih) vv.15

Gamtatna tawh kisai a, na tampi huam a, Kham theih guih theih ah Siangthona, Mit tawh siangthona, Kamtawh siangthona, Khuttawh Siangthona, Ngaihsutna tawh siangthona , Na pumpi na khempeuh te nuntakna gamtatna ah amau muntekah siangtho sakding kisam a, Siangthona tawh kisai ah, SIANGTHO dingtampi om hi, tuate khempeuh gamtatna in huam khin ahih manin tampi ih gen nawn kei ding hi.

4.      Ahoih a nuntakna: Christian ih hih mah bangin Nisim ih nuntakna leh ih sepih bawlna ah mite phattuamna ding ahoih a nungta ih hih ding kideihsak hang. Tuihai khat na suahna nangawn pen thaman om ding ci in Jesuh in agen mah bangin, Nisim ih nuntakna ah nikhat in na hoih khat peuh mah midangte tung ah sepsawm le hang tua hi leh ih nuntakna hong kikhel bek tham lo in, midangte in Christian ih hihna thei-in, ih Biak Pasian Hong muh lawh ding uh hi. Mite in Pasian amuh lawhna dingin na nuntakzia na om zia leh nagamtat hoihnate a muh uh teh Jesuh nungzui ih hihna atheih na dingin ih nuntak siangtho a ahoih anuntak ding kisin ciatni.

Tampi gelh man kei ni, atawpna ah ih theih ding thupi pen in Jesuh in acih bangin Nagamtat hoih uh mite in muh ciangin keima nungzui nahih na uh hong theihna dingin Khat leh khat ki-it in, kihuhin, Nuntak na Siangtho un acih bangin, nisim ih nuntakna ah Mite phattuamna, miten Pasian amuhna dingin ih gamtatna, ih kampauna leh ahoih a nuntakna tawh Pasian min thang sak ciat ni. Lungdam

Siam Khaute. 9/23/14